नवराजका बुबा भन्छन्, ‘छोराको हत्या गरेर भेरी नदीमा फालेका हुन्’

घटनामा ज्यान गुमाएका नवराज बिक

A+ A A-

रुकुम पश्चिमको चौरजहारी नगरपालिका-८ मा प्रेमिका भगाउन पुगेका नवराज बिकको परिवारले छोरालाई ढुंगाले थिचेर हत्या गरेको बताएको छ । नवराजका बुबा मोहन बिकले छोराको टाउँकोमा ढुंगाले हानेर हत्या गरी नदीमा फालेको आरोप लगाए ।

शिलापत्रसँग कुरा गर्दै उनले शवको प्रकृति हेर्दा खोलामा डुबेर मृत्यु नभई ढुंगाले थिचेर छोराको हत्या गरिएको बताए । यद्यपि मोहनले अहिलेसम्म प्रहरीमा जाहेरी भने दिएका छैनन् । ‘घटना राती भए पनि छोराको शव अर्को बिहान खोला किनारमा भेटिँदा पानी खाएको थिएन । उनीहरूले ढुंगाले थिचेर हत्या गरेपछि मात्र खोलामा फालेका हुन्’, उनले भने, ‘पेट खाली थियो । रातभर खोलामा पानीमा डुवेको जस्तो शव देखिएको थिएन ।’

जाजरकोटको भेरी नगरपालिका-५ र चौरजहारी नगरपालिका-८ रुकुम पश्चिम वारीपारी छन् । बीचमा भेरी नदी छ । डेढ बर्षअघि लडेर मेरुदण्डका घाइते भएका नवराजका बुबा मोहन राम्रोसँग हिँड्डुल पनि गर्न सक्दैनन् । ‘मलाई हिँड्नै समस्या छ, त्यसैले उजुरी पायक पर्ने ठाउँमा गर्नुपर्छ भनेर भनेको छु’ उनले भने, ‘मैले भएको एउटा छोरा जातभातकै कारण गुमाएको छु । मैले न्याय पाउनुपर्छ । अनि सुरक्षाको समेत ग्यारेन्टी पनि सरकारले गर्नुपर्छ ।’

उनले मल्ल थरकी युवती आफ्नो घरमा बेलाबेलामा आउने गरेको समेत बताए । ‘मेरी छोरी पनि त्यहीँ मल्ल थरकी युवतीकै उमेर बराबर छिन् । सुरूमा छोरीसँग आएकी हुन् की भन्ने सोचेका थियौँ । तर, उनी छोराका कारणले आउने गरेकी रैछिन् भनेर पछि थाहा पाएका थियौँ । उनीहरूबीचको सम्बन्धबारे जानकारी थियो’ उनले भने ।

त्यी युवती १२ पुष २०७२ देखि १५ गतेसम्म आफ्नै घरमा बसेको समेत मोहनले बताए । ‘जातभातले गर्दा बिहेमा अप्ठयारो हुन सक्ने जानकारी मैले त्यी युवतीलाई गराएको थिए ।’ उनले भने, ‘केटी पक्षकी आमासमेत घरमै आएर विवाह हुन नसक्ने भन्दै धम्काउने समेत गरेकी थिइन् ।’

नवराज गएको शनिबार राती प्रेमीका भगाउन युवासहित चौरहजारी नगरपालिका-४ पुगेका थिए । तर, उनको त्यो प्रयास सफल त भए नै जीवनसमेत गुमाउन पुगे । प्रेमिका भगाउन गएका नवराजको गाउँलेको आक्रमणबाट हत्या भएपछि अहिले यो घटनाको व्यापक विरोध भइरहेको छ । उनलाई साथ दिन सँगै गएका २ साथी चौरजहारीका टिकारम सुनार र रानी गाउँका गणेश बुढा मगरको पनि हत्या भएको छ । अन्य ३ जना सन्दीप बिक, लोकेन्द्र सुनार र गोविन्द शाही अझै पनि भेरी नदीमा बेपत्ता छन् ।