जातभातले निम्ताएको एक असमान्य चौरजहारी घटना

A+ A A-

जाजरकोटकाे भेरी नगरपालिका-५ का नवराज बिक ३ बर्षदेखि चौरजहारी नगरपालिका–८ रुकुम पश्चिमकी १ मल्ल थरकी युवतीसँग प्रेममा थिए । यी २ बीचको सम्बन्ध दुवै परिवारलाई पहिल्यै थाहा थियो । मल्ल थरकी युवतीकी आमा यो प्रेम जसरी पनि असफल पार्न खोजेरहेकी थिइन् । तर, सफल भएकी थिइनन् ।

कतिसम्म भने युवतीका परिवार केटा पक्षको घरमा पुगेर सम्बन्ध टुंग्याउन विभिन्न समयमा मानसिक तनाव दिइरहेका थिए । तर, नवराज जसरी पनि प्रेमलाई सफल पारेर समाजमा जातभातको नजिरलाई बदल्न चाहेका थिए । त्यहीँ योजनामा युवती भगाउने भन्दै आफूसहित १८ जना युवाको समूह लिएर नवराज शनिबार साँझ चौरजहारी नगरपालिका–८ स्थित मल्ल थरकी केटीको गाउँमा पुगे ।

यसअघि पनि सम्बन्धमा फाटो ल्याउनका लागि केटी पक्षले गरेका व्यवहारबाट नवराज पूर्ण जानकार दिए । त्यसैले युवासहित उनी चौरजहारी नगरपालिका–८ स्थित त्यी युवतीको घरमा पुगेका थिए । युवाको टोली आउने जानकारी केटी पक्षकी आमालाई पहिल्यै थाहा थियो । त्यसैले उनले छोरी भगाउन आएकाहरूसँग प्रतिकारका लागि छिमेकी गुहार गरिन् ।

गाउँका मानिस १/२ हुँदै ५० औँ आए । अवस्था असामान्य बन्यो । केटी पक्षका गाउँलेहरू युवाको समूहमा अरिंगाल झै झम्टिए । यो घटनामा चौरजहारी नगरपालिका–८ का वडाध्यक्ष डम्बरबहादुर मल्लको पनि प्रत्यक्ष संलग्नता रहेको बताइएको छ ।

मल्ल थरकी प्रेमीकालाई भगाउन चौरजहारी आएका भेरी नगरपालिका–४ जाजरकोटका नवराज बिक र उनका २ जना साथीको मृत्यु भएको छ । प्रेममा जातभातमा कुरा नमिलेपछि चौरहजारीमा भएको यो घटना देशभर चर्चामा छ । कोरोनाले देशलाई आक्रान्त पारिरहँदा नेपाली समाजमा व्याप्त छुवाछूत र जातीय विभेद यो घटनाले छताछुल्ल बनाएको छ । जातीय विभेद उन्मूलनका कुरा मात्र कागजमा सीमित भएको तर व्यवहारमा कार्यान्वयन नभएको पनि यो घटनाले पुष्टि गर्छ ।

चौरजहारी आएका १८ मध्ये १० जना सकुसल भाग्न सफल भएका छन् । घटनामा २ जना घाइते भए । घाइतको मिसन अस्पताल चौरजहारीमा उपचार भइरहेको छ । ३ जनाको शव भेटिएको छ भने अझै ३ जना वेपत्ता छन् । घाइते भएकाहरूको टाउको लगायत विभिन्न अंकमा चोट लागेको छ । घटनामा मृत्यु हुनेमा नवराजसहित, टिकाराम सुनार र गणेश बुढामगर रहेका छन् ।

उनीहरू ३ जनाकै शव भेरी नदी किनारमा फेला परेको इलाका प्रहरी कार्यालय चौरजहारीका प्रहरी निरीक्षक धर्मसिंह विष्टले जानकारी दिए । बेपत्ता भएका लोकेन्द्र सुनार, सन्जीव बिक र गोविन्द शाहीको खोजी भइरहेको उनले बताए । घटनामा संलग्न भएको आशंकामा चौरजहारी नगरपालिका–८ का वडाध्यक्ष डम्बरबहादुर मल्लसहित १२ जनालाई पक्राउ गरी थप अनुसन्धान भइरहेको प्रहरी निरीक्षक विष्टले जानकारी दिए ।

‘जाजरकोट र चौरजहारी यी २ ठाउँ वारीपारी छन् । बीचमा भेरी नदी छ । चौरजहारीमा केटी पक्षका गाउँलेले लेखेटेपछि उनीहरूमध्ये कतिपले ज्यान बचाउन भेरी नदीमा हाम फालेका रहेछन्’, प्रहरी निरीक्षक विष्टले भने, ‘घाइते र सकुसलको बयान लिँदा गाउँलेबाट ढुंगामुडा भएपछि ज्यान बचाउन युवाहरूले खोलामा हाम फालेको बताएका छन् ।’

१८ जनामध्ये पौडी खेल्न नजानेको भन्दै ७ जना खोला वारी नै बसेको बताइएको छ । पौडी खेल्न जानेको भनेर ११ जना हाम फाल्दा ५ जना मात्र खोला पार गरेको र ६ जना बेपत्ता भएकोमा ३ जनाको शव फेला परेको उनले बताए । शव अहिले जिल्ला अस्पताल जाजरकोटमा रहेको छ । मृतकका परिवार अहिलेसम्म शव बुझ्न तयार भएका छैनन् ।

चौरजहारी नगरपालिकाका प्रमुख विशाल शर्माले नगरपालिकामा दुःखत घटना भएको र यसबारे प्रहरीले अनुसन्धान गरिरहेको बताए । ‘घटना दुःखद भयो । अनुसन्धान हुँदैछ सबै कुरा बाहिर आउँछ ।’ उनले भने ।

लकडाउनको समयमा १८ जनाको युवा नगरपालिका भित्र पवेश गर्दा गाउँलेहरू आक्रोशित भएको र घटना हुन गएको उनले बताए । ‘यो बेला विवाहको समय थिएन । संकटको बेला अर्को गाउँका युवाहरू आफ्नो गाउँमा प्रवेश गर्दा स्थानीय आक्रोशित हुनु स्वाभाविक पनि हो ।’ मेयर शर्माले भने, ‘त्यसै कारण नराम्रो घटना हुन पुग्यो ।’

प्रकाशित मिति: मंगलबार, जेठ १३, २०७७ ०७:२१