भाडाको यान प्रयोग गरेर नासाका वैज्ञानिकको अन्तरिक्ष यात्रा

A+ A A-

नासाका अन्तरिक्षयात्रीहरू बब बेन्कन र डग हर्लीले यही साता गर्ने अन्तर्राष्ट्रिय अन्तरिक्ष स्टेशन (आईएसएस) तर्फको यात्राका लागि पूर्वाभ्यास गरेका छन् ।

नौ वर्षपछि अमेरिकी भूमिबाट प्रक्षेपण हुने ‘स्पेस एक्स फ्याल्कन रकेट’ र ‘क्रु ड्र्यागन क्याप्स्यूल’ जडित मानवसहितको अन्तरिक्षयान एकै पटक अन्तरिक्ष कक्ष पुग्दैछन् । यो क्यालिफोर्नियास्थित अमेरिकी अन्तरिक्ष कम्पनीबाट अमेरिकी अन्तरिक्ष संस्था नासाले किन्न लागेको नयाँ ‘ट्याक्सी’ सेवाको प्रदर्शन हुनेछ ।

बुधवार स्थानीय समयानुसार साँझको ४ बजेर ३३ मिनेटमा प्रक्षेपण हुनेछ । यद्यपि फ्लोरिडास्थित केनिडी अन्तरिक्ष केन्द्र वरपरको मौसमका कारण त्यसमा केही परिवर्तन हुन सक्ने बताइएको छ ।

शनिवार गरिएको पूर्वानुमानअनुसार प्रक्षेपणका समयमा अनुकूल मौसम हुने सम्भावना ४० प्रतिशत देखिएको थियो । सो क्षेत्रमा बाक्लो बादल हुस्सु लाग्नुका साथै वर्षा र चट्याङ पर्ने सम्भावना रहेको बताइएको छ । यदि बुधवार अनुकूल परिस्थिति नभएमा शनिवार दोस्रो प्रयास गरिने छ ।

हर्ली र बेन्कन अन्तरिक्ष यात्राका लागि तयार भएका छन् । सप्ताहान्तमा भएको ‘ड्राई ड्रेस’ पूर्वतयारीमा उनीहरू स्पेससूट लगाएर टेस्ला कारमा बसी केनेडी केन्द्रको प्रसिद्ध प्रक्षेपण परिसर ‘३९ए’ सम्म पुगेका थिए । उनीहरूको स्पेस एक्स फ्याल्कन–९ रकेट बिहीबारदेखि त्यहाँ ठडिएको छ ।

अन्तरिक्षयात्रीहरू त्यसपछि लिफ्टको सहायताले क्याप्स्युल अर्थात् उनीहरू बस्न तयार पारिएको ठाउँसम्म पुगेका थिए । यस अभियानले अहिले धेरैको ध्यान खिचिएको छ ।

सन् २०११ मा ‘द स्पेस शटल्स’ भनिने अन्तरिक्षमा यान पठाउने प्रणाली बन्द गरिएपछि अमेरिकाले आफैंले अन्तरिक्षयात्री पठाएको छैन । पछिल्ला नौ वर्षमा अमेरिकाले रुसको ‘सोयुज रकेट एन्ड क्याप्स्यूल’ प्रणाली प्रयोग गर्ने गरेको थियो ।

यस पटक नासाले आफ्नो अन्तरिक्षयान नभई अरूको भाडामा लिएर अन्तरिक्षमा यात्री पठाउन लागेको हो । यो टिकट किनेर यात्रा गरे जस्तै हो ।

स्पेश एक्स र बोइङ दुवैले आफ्ना सेवाहरू अन्य अन्तरिक्ष निकाय, कम्पनी र व्यक्तिहरूलाई समेत विक्री गर्न पाउनेछन् । अन्तरिक्षयात्रीहरू हर्ली र बेन्कन आफूहरू बसेर उड्ने ड्र्यागनको नाम पनि यसअघिकै परम्पराअनुरूप दिइएको छ । नाम भने बुधबार नै सार्वजनिक गरिनेछ ।

प्रकाशित मिति: सोमबार, जेठ १२, २०७७ २१:४०