लकडाउन उल्लंघन : उपत्यकाबाट प्रहरीले नै पठाउन थाले विनापासका यात्रुबस

A+ A A-

सरकारले कोरोना भाइरस (कोभिड–१९) नियन्त्रण गर्न अपनाएको लकडाउन जारी छ । कोरोना भाइरस रोकथाम तथा नियन्त्रणसम्बन्धी उच्चस्तरीय समन्वय समितिको सुझावका आधारमा सरकारले देशभर लकडाउन गर्ने निर्णय गरेको हो ।

११ चैतबाट सुरु गरेको लकडाउन २० जेठसम्म पुर्‍याएको छ । सरकारले चरण–चरणको प्रक्रियाअनुसार लकाडाउन अवधि २० जेठसम्म पुर्‍याएको हो । सुरुमा १ साताका लागि गर्ने भनिएको लकडाउन नेपालमा कोरोनाको संक्रमण देखिँदै जान थालेपछि सरकारले लकडाउनको अवधि बढाउँदै गएको हो ।

हालसम्म नेपालमा ६ सय ७५ जना कोरोना संक्रमित छन् । ३ जनाले ज्यानसमेत गुमाएका छन् । ५ जेठसम्मका लागि भनिएको लकडाउन कोरोनाका कारण ज्यान जान थालेपछि ४ जेठमा बसेको मन्त्रिपरिषदको बैठकले लकडाउन २० सम्म पुर्‍याएको हो ।

उपत्यका भित्रिने यात्रुलाई मात्र कडाइ

पछिल्लो चरणमा बढाइएको लकडाउन भने उपत्यका भित्रिने यात्रुका लागि मात्रै कडाइ गरिएको छ । उपत्यका भित्रिने नाकाहरूमा प्रहरीसहित स्थानीय सरकारले समेत कडाइ गरेका छन् ।

त्योबाहेक उपत्यका छोडेर बाहिर जानेको हकमा भने प्रहरी आफैँले सहज गर्दै यात्रुबसहरूलाई पठाउँदै आएको छ । उसो त सरकारले पछिल्लो चरणमा बढाएको लकडाउन अवधिसम्म कडाइ गर्ने भन्दै गृह मन्त्रालयले एक जिल्लाबाट अर्को जिल्ला प्रवेशमा रोक लगाउनुका साथै सबै पास रद्दसमेत गरेको थियो ।

तर, त्यति गर्दासमेत लकडाउन उलंघन गर्नेको संख्या पहिलाको तुलनामा बढेको छ । उपत्यकाबाट रातिको समय गाडीका गाडी बाहिरी जिल्ला जाने यात्रुको संख्या अत्यधिक छ ।

उपत्यकाबाट यसरी गाडीका गाडी सबै यात्रुलाई पठाउँदा कोरोनाको डर गाउँगाउँसम्म पुगेको छ ।

पासविनै जान्छन् यात्रुवाहक बस

गृह मन्त्रालयले यसअघि जिल्ला प्रशासनले दिँदै आएको पास रोकेको छ । अति आवश्यक सवारीभन्दा चिनेजानेकै आधारमा पास वितरण भएको गुनासो आएपछि जिल्ला प्रशासनले जारी गर्ने पास रद्द गरेर गृह मन्त्रालयको स्वीकृतिविना कुनै पनि सवारी साधनले पास नपाउने निर्णय गरेको हो ।

तर, ५ जेठपछि मध्यराति उपत्यकाबाट बाहिरिने यात्रुवाहक बस भने कुनै निकायको पासविना सयाैँ यात्रु बोकेर बाहिरी जिल्ला जान थालेका छन् । प्रहरीले राति जाने यात्रुहरूलाई सहज गर्दै बसहरू रोक्न छाडेपछि पासविनाका बसले उपत्यकाबाट बाहिरिन जान खोज्ने यात्रुलाई बोक्न थालेका हुन् ।

बस सञ्चालकले महँगो शुल्क लिएर बस बुक गरेर यात्रु बोक्ने गरेका छन् । ५ जेठयता मात्र उपत्यकाबाट हजारौँको संख्याका यात्रुहरू बाहिरिएको विभिन्न नाकामा खटिएका प्रहरीहरू नै बताउँछन् ।

‘भीडभाड गर्न नदिनू यात्रुवाहक बसहरूलाई सहज तरिकाले पठाउनू भनेर माथिल्लो निकायबाट नै फोन आउँछ । त्यति भनेपछि हामीले रोक्ने कुरा भएन,’ नागढुंगामा खटिएका एक प्रहरीले भने ।

अधिकांश यात्रुबसहरू राति १० बजेपछि मात्र जाने गरेको उनले बताए । उता ट्राफिक महाशाखाका प्रमुख एसएसपी भीमप्रसाद ढकाल भने राति कुनै पनि बस नपठाएको बताउँछन् ।

‘हामीले पासविनाका कुनै पनि गाडी पठाएका छैनौँ, तपाईंले भनेजस्तो होइन,’ एसएसपी ढकालले भने ।

तर, विनापास २ दिनअघि एक यात्रुबसमार्फत बैतडी पुगेका एक यात्रुले भने प्रहरीकै सहयोगमा काठमाडौंबाट ५ देखि १० वटा बस विभिन्न जिल्लाका लागि छुटेको बताए ।

हिजोसमेत कोटेश्वर हुँदै २ वटा यात्रुबस वीरगञ्जका लागि छुटेका थिए ।

प्रकाशित मिति: सोमबार, जेठ १२, २०७७ १३:२८