बिहान ७ देखि राति १० बजेसम्मको काम : खाने चिउरा, लेख्ने बजेट

A+ A A-

गत २७ वैशाखदेखि अर्थ मन्त्रालयभित्र लक गरिएको बजेट ७ जेठदेखि कोर र सवकोर टिममा लक गरिएको छ । अर्थ मन्त्रालयले १५ चैतदेखि १५ वैशाखसम्मका लागि बजेट र नीति तथा कार्यक्रममा सुझाव माग गरेको थियो ।

७ जेठदेखि अर्थका अधिकृत र उपसचिवले पनि हेर्न नसक्ने गरी बजेट लक गरिएको छ । तोकिएका सहसचिव र दुई सचिवका साथै अर्थमन्त्रीले मात्रै बजेट हेरफेर गरिरहेका छन् । विगतका वर्षहरूमा भन्दा यस वर्ष अलिक भिन्न रहेको छ बजेट निर्माण प्रकिया ।

तुलनात्मक रूपमा केही ढिला गरी सुरु गरिएको बजेट निर्माण प्रकिया करिब २ साता अधिकृत र उपसचिवहरूलाई काममा खटाइएपछि विदामा बसाइएको छ । आवश्‍यकता पर्दा बोलाइने गरेको छ ।

अहिले अर्थ मन्त्रालयमा ६ जना दिनको करिब १५ घण्टा काम गर्छन् । त्यसका साथै अर्थमन्त्री डा. युवराज खतिवडा २ सचिव र नेपाल राष्ट्र बैंकका निर्दशक डा. रामशरण खरेल पनि १२ घण्टासम्म बजेट निर्माणको काममा खटिएका छन् ।

विगतका वर्षमा दिनको ४ समय खानपिन हुन्थ्यो । प्रत्येक ३ घण्टा फलफूल आउथ्यो । दिउँसो स्पेशल खाजा हुन्थ्यो । बिहान बेलुका चाहेअनुसार खाना त्यो पनि तोकिएको होटल तथा रेष्टुराँबाट आउने गरेको थियो । अहिले भने त्यस्तै छैन ।

कति त अधिकारीले घरबाटै खाजा-खाना बोकेर आउँछन् । कति मात्रै चिउराका भरका रहेका छन् । इलेक्ट्रोनिक भाँडोमा उमालेर चियाको सुविधा भने छ । अन्यथा अर्थमन्त्रालयले अहिले उपलब्ध गराएको चिउरा र तरकारी मात्रै छ । चिउरा र तरकारीको भरमा दिनभर काम गरिरहेका छन् । 'अर्थ मन्त्रालयको क्यान्टिन बन्द छ, बाहिरबाट मगाउने स्थिति पनि छैन । तरकारी र चिउरा खाएर काम भइरहेको छ,' अर्थका एक अधिकारीले भने ।

अर्थका ६ जना अधिकारी भने बिहान ७ बजे गएर बेलुका १० बजेपछि मात्रै घरमा फर्कने गरेका छन् जसमा ५ जना सह-सचिव र एक जना शाखा अधिकृतछन् । श्रीकृष्ण नेपाल, झक्कप्रसाद आचार्य, धनीराम शर्मा पौडेल, यज्ञप्रसाद ढुंगेल र यमलाल भुसाल र शाखा अधिकृत बालकृष्ण अधिकारी ७ जेठदेखि बिहान ७ बजे गएर बेलुका १० बजेपछि मात्रै फर्किने गरेका छन् ।

आइतबार पनि बिहान ७:३० नहुँदै उनीहरू अर्थ मन्त्रालयमा उपस्थित भएका थिए । यीबाहेक अर्थमन्त्री डा. युवराज खतिवडा, अर्थसचिव शिशिरकुमार ढुंगाना, राजस्व सचिव रामशरण पुडासैनी पनि करिब १२ घण्टासम्म अर्थ मन्त्रालयमा रहने गरेका छन् ।

अर्थमन्त्री स्वयम् प्राय: बिहान ८ नबज्दै अर्थ मन्त्रालय पुग्ने गरेको र बेलुका ८ बजेसम्म पनि रहने गरेकाे अर्थका अधिकारीको दाबी छ ।

हालसम्मको स्थितिमा सवा १६ खर्ब रुपैयाँको बजेटको तयारीमा रहेको अर्थ मन्त्रालयलाई थप बजेट बढाउन दबाब भए पनि यसभन्दा माथि नजाने मनस्थितिमा अर्थमन्त्री अडिक देखिएको अर्थ मन्त्रालय स्रोतको दाबी छ ।

प्रकाशित मिति: सोमबार, जेठ १२, २०७७ ०९:३०