पोखरा महानगरका ३३ वडामै क्वारेन्टाइन बनाइने

A+ A A-

कोरोना भाइरसको संक्रमण दिन प्रतिदिन फैलिँदै गएपछि पोखरा महानगरपालिकाले ३३ वटै वडामा क्वारेन्टाइन निर्माण गर्ने भएको छ ।

पोखरा महागनर कोरोना संक्रमण नियन्त्रण मूलसमितिका संयोजक मञ्जुदेवी गुरुङको अध्यक्षतामा बसेको बैठकले सबै वडामा ५० जना राख्न मिल्ने गरी क्वारेन्टाइन निर्माण गर्न वडा अध्यक्षहरूलाई पत्राचार गर्ने निर्णय गरेको छ ।

महानगरले हाल २ वटा मात्र क्वारेन्टाइन सञ्चालन गरेको छ । पोखराको मालेपाटनस्थित कृषिको होस्टेल र राल्पारोडस्थित लेकसिटि रिसर्च एण्ड हस्पिटलमा महानगरले क्वारेन्टाइन सञ्चालन गरेको छ ।

अगामी दिनमा थप ब्यक्तिहरू राख्नपर्ने अवस्थालाई मध्यनगर गदै सबै वडाका वडा अध्यक्षहरूलाई बढीमा ५० जना राख्न सकिने गरी व्यवस्था मिलाउन तत्कालै पत्राचार गर्ने निर्णय गरेको उपप्रमुख गुरुङले बताइन्, ‘क्वारेन्टाइन सञ्चालन र रेखदेख गर्ने जिम्मेवारी समेत वडाले गर्ने छ’ उनले भनिन् । ‘त्यसका लागि आवश्यक स्वास्थ्य सेवाको ब्यवस्थापन महानगर स्वास्थ्य महाशाखाले गर्ने छ ।’

त्यस्तै, महानगरले महिलाहरुका लागि छुट्टै क्वारेन्टाइन बनाउने निर्णयसमेत गरेको छ । महिलाका लागि एउटा छुट्टै क्वारेन्टाइन स्थानको छनोट र व्यवस्थापन गर्न महानगरको क्वारेन्टाइन ब्यवस्थापन समितिलाई निर्देशन दिने निर्णय गरेको उपप्रमुख गुरुङले जानकारी दिइन् ।

बैठकले पोखरा महानगरले उपलब्ध गराउँदै आएको सुत्केरी पोषण सामाग्रीलाई २० जेठसम्म निरन्तरता दिने निर्णय गरेको छ । महागनरले लकडाउन सुरू भएयता सुत्केरी भएकाहरूलाई १ केजी घ्यू, १ केजी हर्लिक्स, १ लिटर तेल र नगद ५ सय रुपैयाँ उपलब्ध गराउँदै आएको छ ।

त्यस्तै, लकडाउनका बेला महानगरले सुरू गरेको प्रसुती सेवा र मिर्गौला विरामीहरूलाई प्रदान गरेको निःशुल्क एम्बुलेन्स सेवालाई पनि २० जेठसम्म निरन्तरता दिने निर्णय गरेको समितिका सदस्य सचिव किरण कोइरालाले बताए ।

महानगरले नगरबासीको स्वास्थ्य सेवालाई र भविष्यमा आइपर्ने समस्यालाई मध्यनगर गदै एम्बुलेन्स खरिद गर्ने भएको छ । कोरोना संक्रमण नियन्त्रण मुल समितिको बैठकले महानगरले सञ्चालन गर्ने गरी एउटा एम्वुलेन्स खरिद गर्न पोखरा महानगरको कार्यपालिकालाई सिफारिस गर्ने निर्णय भएको उपप्रमुख गुरुङले बताइन् ।

त्यस्तै हाल सञ्चालनमा रहेका एम्बुलेन्स मध्ये २ वटा कोरोना संक्रमितको लागि मात्रै सञ्चालन गर्ने र अरु एम्बुलेन्स अन्य रोगका विरामीलाई ओसारपोरसारमा प्रयोग गर्ने निर्णय गरेको छ ।

पोखरा महागनरले कोरोना संक्रमणको उच्च जोखिम र आगामी दिनहरूमा संक्रमण फैलिन नदिन कास्की जिल्ला बाहेक अन्य स्थानबाट पोखरामा तरकारी तथा फलफुल भित्रन नदिन आवश्यक कार्य गर्न महानगरलाई सिफारिस गर्ने निर्णय गरेको महानगरका अनुगमन अधिकृत किरण कोइरालाले जानकारी दिए ।

प्रकाशित मिति: आइतबार, जेठ ११, २०७७ १९:०५