बाँकेको नरैनापुरमा राति ८ बजेदेखि निषेधाज्ञा, सेना परिचालन गरिने

A+ A A-

प्रदेश ५ को अति विकट मानिने बाँकेको नरैनापुरमा कोरोना संक्रमण रोकथामका लागि सेना परिचालन गरिने भएको छ ।

गाउँपालिकाले शनिबार मात्र कोरोना संक्रमण फैलिन सक्ने र स्थिति भयावह हुने भन्दै थप सुरक्षाकर्मी र स्वास्थ्यकर्मी माग गर्दै जिल्ला प्रशासन कार्यालय बाँकेलाई पत्राचार गरेको थियो ।

आज जिल्ला सुरक्षा समितिको बैठकले नरैनापुरमा राति ८ बजेदेखि निषेधाज्ञा जारी गर्ने र सेना परिचालन गर्ने निर्णय गरेको हो ।

बाँकेका सहायक प्रमुख जिल्ला अधिकारी दिर्घराज उपाध्यायले नरैनापुरमा भइरहेको अवस्थालाई ध्यानमा राख्दै सेना परिचालन गर्ने निर्णय भएको जानाकारी दिए ।

‘लकडाउन पालना नभएको स्थानीय तहबाट पत्रसमेत प्रशासनमा आएको थियो । समुदायस्तरमा पनि कोरोना नफैलियोस् भनेर राति ८ बजेदेखि लागू हुने गरी निषेधाज्ञा जारी गर्ने निर्णय भएको छ,’ उनले भने, ‘हामीले सेना पनि परिचालन गर्छौं ।’

मधेसी र मुस्लिम समुदायको बाहुल्य रहेको गाउँपालिकामा अझै पनि कोरोनाबारे अन्धविश्वास रहेको र कोरोना भाइरसबारे गाउँमा भ्रम फैलाउने काम भइरहेको छ ।

अझै पनि सुरक्षाकर्मी र स्वास्थ्यकर्मीलाई असहयाेग गर्ने, मनोबल कमजोर पार्ने र संक्रमित भगाउनेजस्ता क्रियाकलाप भएपछि गाउँपालिकाले जिल्ला प्रशासन कार्यलयसँग थप सुरक्षाकर्मी माग गरेको थियो । सेनाले अब क्वारेन्टाइन र गाउँपालिकामा निगरानी बढाउनेछ ।

गाउँपालिकाका ६ वटै वडा भारतसँग सिमाना जोडिएकाले अहिले पनि नाकाबाट प्रवेश गरिरहेका छन् । समुदाय स्तरमा सचेतनाको कमी भएकै कारण क्वारेन्टाइनसमेत व्यवस्थापन हुन नसकेको गाउँपालिकाले जनाएको छ ।

गाउँपालिकाले हाल १५ वटा क्वारेन्टाइनमा करिब ७ सय जना रहेको जनाएको छ । संक्रमणको संख्या अझै बढ्ने आँकलन पनि गरिएको छ । गाउँपालिकाका अध्यक्ष इस्तियाक अहमद शाहले जनताबाटै असहयोग भएकाले थप सुरक्षाकर्मीको माग गरिएकाे बताए ।

प्रकाशित मिति: आइतबार, जेठ ११, २०७७ १७:१९