किट अभावमा हेटौंडामा कोरोना परीक्षण रोकियो, स्वाब संकलन भने नरोकिने

A+ A A-

पीसीआर किट सकिएपछि हेटौंडास्थित किटजन्य रोग अनुसन्धान तथा तालिम केन्द्रमा रहेको प्रयोगशालामा कोरोना परीक्षण रोकिएको छ ।

राष्ट्रिय जनस्वास्थ्य प्रयोगशाला काठमाडौंले एकहप्ताअघि पठाएको करिब ४ वटा पीसीआर किट शनिवार सकिएको थियो । हेटौंडामा शनिवार मात्रै संकलन गरिएका प्रदेशका मन्त्री, सांसददेखि हेटौंडा अस्पतालका डाक्टर, स्वास्थ्यकर्मी तथा कर्मचारीको स्वाबको रिपोर्ट आएको छैन ।

किट नहुँदा आज आइतबार परीक्षण रोकिने भएको छ । प्रदेशको सामाजिक विकास मन्त्रालयले राष्ट्रिय जनस्वास्थ्य प्रयोगशालासँग माग गरेको १ हजार किट आइतबार साँझसम्म हेटौँडा आइपुग्ने मन्त्रालयले जानकारी दिएको छ ।

प्रयोगशालामा शनिवार १२ वटा स्वाबको रिपोर्ट आएको थियो । बारास्थित क्वारेन्टाइनको १७ वटा, सिन्धुली अस्पतालको १५ वटा र हेटौंडा अस्पतालको चिकित्सक र स्वास्थ्यकर्मी गरी ९० जनाको प्राप्त स्वाब मध्ये १२ जनाको रिपोर्ट नेगेटिभ आएको छ । बाँकी स्वाब परीक्षण हुने क्रममा रहेको मन्त्रालयलका प्रवक्ता पुरुषोत्तम राज सेढाईंले जानकारी दिए ।

हेटौंडा प्रयोगशालमा पीसीआर किट सकिएपनि स्वाब संकलन जारी छ । आइतबार बिहानदेखि अस्पतालमा प्रदेशका सांसदहरुको स्वाब संकलन भइरहेको छ । अस्पतालमा प्रदेशमा मन्त्री, सांसद, प्रदेशसभा सचिवालयका कर्मचारी, मर्यादापालकको शुक्रबारदेखि स्वाब संकलन गर्न सुरु गरिएको हो ।

शनिबार प्रदेशका मन्त्री, सांसद, मन्त्रालय र प्रदेश सभाका कर्मचारीलगायत ९६ जनाको स्वाब संकलन गरिएको थियो । हेटौँडामा संकलन गरिएको ९३ वटा स्वाब कोरोना परीक्षणका लागि चितवनस्थित भरतपुर कोभिड–१९ प्रयोगशालामा पठाइएको छ । काठमाडौँबाट किट आएपछि तीव्ररुपमा परीक्षण गरिने सामाजिक विकास मन्त्रालयले जानकारी दिएको छ ।

प्रदेशको ५ जिल्लाका २३ जनामा आरडीटी पोजेटिभ

बागमती प्रदेशको पाँचवटा जिल्लाका २३ जनामा आरडीटी पोजेटिभ देखिएको छ । शनिवार गरिएको १ हजार ९९ वटा आरडीटी परीक्षणमा काठमाडौंका १४, नुवाकोटका ३, धादिङका ३, काभ्रेका २ र मकवानपुरका १ जनामा पोजेटिभ देखिएको मन्त्रालयले जनाएको छ ।

प्रदेश भरी शुक्रबार मात्रै १ सय ३५ जनालाई आरडीटी पोजेटिभ देखाएको थियो । २ हजार ६ सय २१ ज्नामा गरिएको आरडीटी परीक्षणबाट काठमाडौंका १ सय २३, धादिङका ६, नुवाकोटका ४ र काभ्रेका २ जनामा पोजेटिभ देखाएको हो ।

प्रदेशभरी शनिवारसम्म कुल २२ हजार ८ सय ११ जनाको आरडीटी परीक्षण गरिएको छ । जसमध्ये ४ सय २९ जनामा आरडीटी पोजेटिभ देखिएको छ । आरडीटीमा पोजेटिभ देखाएकाहरुको पीसीआर परीक्षण गरिनेछ ।

प्रकाशित मिति: आइतबार, जेठ ११, २०७७ १४:३०