सिन्धुली, मकवानपुर र बाराका १ सय १० जनाको पीसीआर नेगेटिभ

A+ A A-

कोभिड–१९ संक्रमण देखा परेका जिल्ला सिन्धुली, मकवानपुर र बाराका १ सय १० जनाको पीसीआर रिपोर्ट नेगेटिभ आएको छ ।

सिन्धुलीका ५७, मकवानपुरका ३० र बाराका २३ जनाको पीसीआर रिपोर्ट नेगेटिभ आएको बागमती प्रदेशको सामाजिक विकास मन्त्रालयले जानकारी दिएको छ । हेटौंडास्थित किटजन्य रोग अनुसन्धान तथा तालिम केन्द्रमा रहेको कोरोना परीक्षण प्रयोगशालामा बिहीवार पीसीआरबाट स्वाब परीक्षण गरिएको थियो । अन्य स्वाब परीक्षणकै क्रममा रहेको मन्त्रालयले जानकारी दिएको छ ।

हेटौंडा प्रयोगशालामा हालसम्म १ हजार ६९ वटा स्वाब परीक्षणको लागि प्राप्त भएको छ । यहाँ गरिएको स्वाब परीक्षणमा हालसम्म ४ जनालाई पीसीआर पोजेटिभ देखिएको छ । मकवानपुरसहित बारा, पर्सा, रौतहत, चितवन, सिन्धुलीलगायतका जिल्लाबाट हेटौंडा प्रयोगशालामा पीसीआर परीक्षणको लागि स्वाब आउने गरेको छ ।

बागमती प्रदेश भरी बिहीवार एकैदिन ५० जनालाई आरडीटी पोजेटिभ देखिएको छ । बिहीवार गरिएको १ हजार २ सय ४२ जनाको आरडीटी परीक्षणबाट प्रदेशका ६ जिल्लाका ५० जनामा पोजेटिभ देखिएको मन्त्रालयका प्रवक्ता अस्पताल विभाग प्रमुख डा. पुरुषोत्तम राज सेढाईंले जानकारी दिए ।

काठमाडौंका २९, धादिङका १५, नुवाकोटका २, सिन्धुलीका २, मकवानपुर र काभ्रेका १–१ जनामा आरडीटी पोजेटिभ देखिएको हो । आरडीटीमा पोजेटिभ देखिएका सबैको पीसीआरबाट परीक्षण हुँदैछ । प्रदेशभित्र हालसम्म १९ हजार ९१ जनाको आरडीटी परीक्षण गरिएको छ । जसमध्ये २ सय ७१ जनामा पोजेटिभ देखिएको छ ।

बुधवार गरिएको आरडीटी परीक्षणमा प्रदेशका ४ जिल्लाका ७४ जनामा पोजेटिभ देखिएको थियो । जसमध्ये काठमाडौंका ३३, नुवाकोटका २२, काभ्रेका १२ र सिन्धुलीका ७ जनाको आरडीटी पोजेटिभ देखाएको मन्त्रालयका प्रवक्ता पुरुषोत्तम राज सेढाईंले जानकारी दिए ।

यसैगरी कोभिड–१९ संक्रमण पुष्टि भएका रामेछाप, सिन्धुली, काभ्रेलगायतका जिल्लाका संक्रमित व्यक्तिहरुको परिवार, आफन्त र सम्पर्कमा देखिएका व्यक्तिहरुको कन्ट्याक्ट ट्रेसिङबाट खोजी भइरहेको मन्त्रालयले जानकारी दिएको छ ।

बागमती प्रदेशमा हालसम्म २६ जनालाई कोभिड–१९ संक्रमण देखा परेको छ । प्रदेशका १३ वटै जिल्लामा ४ हजार ५ सय १ वटा क्वारेन्टाइन तयारी अवस्थामा छन् । क्वारेन्टाइनमा भने ३ सय ४४ जना बसेका छन् । प्रदेशभरी रहेका ९ सय ९५ आइसोलेसन बेडमा ६० जना मात्रै बसेका छन् ।

विगतका दिनमा भन्दा क्वारेन्टाइनमा बस्नेको संख्यामा वृद्धि भएको छ । प्रदेशभरीका जिल्लाहरु मध्ये सबैभन्दा बढी धादिङमा १ सय ४० जना क्वारेन्टाइन र आइसोलेसनमा १९ जना बसेका छन् । सिन्धुपाल्चोकमा ५५ जना, सिन्धुलीमा ५४ जना र नुवाकोटमा ४१ जना क्वारेन्टाइनमा बसेका छन् ।

कोरोना संक्रमणको उच्च जोखिममा रहेको काठमाडौंका क्वारेन्टाइन र आइसोलेसन खाली छ । काठमाडौंमा ७ सय ९९ क्वारेन्टाइन र २ सय २४ आइसोलेसन बेड तयारी अवस्थामा छन् ।

प्रकाशित मिति: शुक्रबार, जेठ ९, २०७७ १९:१८