चीनद्वारा रक्षा खर्चमा ६.६ प्रतिशत वृद्धिको प्रस्ताव

A+ A A-

कोरोना भाइरसको महामारीका कारण पैदा भएको आर्थिक संकटबीच चीनले आफ्नो रक्षा बजेटमा वृद्धि गर्ने तयारी गरेको छ ।

चीनले आफ्नो रक्षा बजेटमा २०१९ को तुलनामा सन् २०२० मा ६.६ प्रतिशत वृद्धि गर्ने भएको हो । यद्यपि पछिल्लो तीन वर्षमा चीनले रक्षा बजेटमा यो वर्ष कम वृद्धि गर्न लागेको हो ।

शुक्रबार जारी गरेको नयाँ राष्ट्रिय बजेटअनुसार चीनले रक्षा क्षेत्रका लागि १२.६८ खर्ब युआन अर्थात् १७८ अर्ब डलर छुट्याएको छ ।

शुक्रबार सुरु भएको वार्षिक संसदीय बैठक नेसनल पिपुल्स कंग्रेसमा प्रधानमन्त्री ली खछ्याङले महामारीका कारण देश अनिश्चिततामा फसेको र अर्थव्यवस्थामा नराम्रो असर परेको बताए ।

उनले अर्थव्यवस्थालाई नयाँ गति दिनका लागि सरकारी सहयोग रहने बताउँदै केही समयका लागि आर्थिक विकासको गतिबारे अहिले नै भन्न सकिने अवस्था नरहेको बताए ।

चीनले आर्थिक विकासको लक्ष्य निर्धारण नगरेको यो पहिलो पटक हो । एक वर्षअघिको तुलनामा सन् २०२० को पहिलो तीन महिनामा चीनको अर्थव्यवस्थामा ६.८ प्रतिशत गिरावट आएको छ ।

उनले देशको सेनामा सुधारको काम जारी राखिने जानकारी दिए । प्रधानमन्त्री लिले भने, ‘हामी राष्ट्रिय सुरक्षा र सेनामा सुधारको काम जारी राख्नेछौँ । हामी आफ्नो लजिस्टिक्स र स्रोत साधन सहयोगको क्षमता बढाउनेछौँ र रक्षासँग जोडिएका आधुनिक प्रविधि अपनाउनेछौँ ।’

कोरोना भाइरसको महामारीका बीच दक्षिण चीन सागरमा चीन–ताइवान विवादलाई लिएर चीन र अमेरिकी सेना सक्रिय रहँदै आएका छन् । यस्तै, हङकङमा नयाँ राष्ट्रिय सुरक्षा कानुन लागू गर्ने चीनको कोसिसमा विरोध हुन सक्नेसमेत उसको अनुमान छ ।

कोरोना भाइरसको उत्पत्तिलाई लिएर अमेरिकाले चीनमाथि लगातार आरोप लगाइरहेको छ । चीनको रक्षा मन्त्रालयले हालै प्रकाशित एक रिपोर्टमा कोरोना भाइरसको महामारीलाई लिएर अमेरिकासँग तनावपूर्ण सम्बन्ध रहन सक्ने र सैन्य टकरावको अवस्थासमेत आउन सक्ने उल्लेख छ ।

सिंगापुरको इन्स्टिच्युट अफ डिफेन्स एन्ड स्ट्राटेजिकमा रिसर्च फेलो कोलिन कोहले चीनले आफूमाथि खतरा रहेको महसुस गरिरहेको र छिटोभन्दा छिटो आफ्नो सुरक्षा बढाउन चाहेको उल्लेख गरेका छन् । सेनाको आधुनिकीकरणमा कम खर्च देखाएमा अन्य देशमा गलत संकेत जाने उनी बताउँछन् ।

रक्षा क्षेत्रमा चीनले लामो समयदेखि खर्च बढाउँदै लगेको छ । सन् २०२० मा चीनको रक्षा बजेट गत वर्ष अमेरिकाको रक्षा बजेटको एकचौथाइ थियो । गत वर्ष अमेरिकाको रक्षा बजेट ६८६ अर्ब डलर थियो । लामो समयदेखि चीन रक्षा क्षेत्रमा लगानी अमेरिकाकाे बराबर गर्न चाहन्छ ।

प्रकाशित मिति: शुक्रबार, जेठ ९, २०७७ १६:४६