ई-सेवाबाट अवैध सट्टेबाजीको रकम ट्रान्सफर, प्रहरीले थाल्याे अनुसन्धान

A+ A A-

विद्युतीय भुक्तानी सेवा ई–सेवामार्फत अवैध रूपमा आर्जन भएको रकम बाहिरिने गरेको तथ्य खुलेको छ ।

फुटबल, किक्रेटजस्ता ठूला अन्तर्राष्ट्रिय खेलमा हुने सट्टेबाजी (बेटिङ) को रकम, आतंकवादी गतिविधिमा प्रयोग हुने ठूलो रकम ई–सेवामार्फत १ व्यक्तिबाट अर्को व्यक्तिको खातामा ट्रान्सफर हुँदा अन्त्यतः ठूलो रकम देशबाट बाहिरिने गरेको प्रहरीको प्रारम्भिक अनुसन्धानबाट खुलेको हो ।

ई–सेवामार्फत अवैध रूपमा रकम ट्रान्सफर हुने गरेको सूचना प्रहरीको केन्द्रीय अनुसन्धान ब्यूरो (सीआईबी) मा पुगेपछि ई–सेवामार्फत नेपालबाट अवैध रूपमा रकम बाहिरिने गरेको तथ्यकाे खुलासा भएको हो । सीआईबी स्रोतका अनुसार ई–सेवामार्फत ठूलाे रकम ट्रान्सफर भएकाको खाता नम्बरबारे भने प्रहरीले गोप्य नै राखेर अनुसन्धान अघि बढाएको छ ।

यसरी ई–सेवालाई प्रयोग गरेर अवैध रूपमा ठूलो रकम आदान-प्रदान हुने सूचना ई–सेवा कम्पनीलाई थाहा हुँदाहुँदै पनि भित्री रूपमा मिलाउन खोजेको आरोप प्रहरीको छ ।

ई–सेवाका सहायक निर्देशक शिशिर पौडेलले एक ‘एकाउन्ट होल्डर'लाई ई–सेवालाई ‘बेटिङ’का लागि प्रयोग नगर्न अनुरोध गरेको चिट्ठी शिलापत्रले प्राप्त गरेको छ ।

हेर्नुहोस् पत्र :

पौडेल भने 'बेटिङ'भन्दा पनि ई–सेवाका ग्राहकलाई भिडियो गेम पप्जी खेल्नेहरूले विभिन्न प्रलोभनमा पारेर रकम पठाउन लगाउने र रकम पठाएपछि सम्पर्कमा नआउने गरेको बताउँछन् । उनले ग्राहकहरूले नै यसबारेमा कम्पनी र प्रहरीलाई उजुरी दिएको बताए ।

उनले यस विषयमा अनुसन्धान भइरहेको उल्लेख गर्दै बेटिङका लागि भने ई–सेवा प्रयोग नगरिएको बताए । ‘हाम्रा ग्राहक विभिन्न प्रलोभनमा परेर ठगिएका रहेछन् । उनीहरूले नै हामीलाई र प्रहरीमा उजुरी गरेका हुन्, पौडेलले भने 'अनुसन्धान हुँदै छ ।’

अनलाइन किनमेल र कारोबार गर्ने उद्देश्यले २६ जनवरी २००९ देखि सञ्चालनमा आएको ई–सेवाको कारोबार क्षेत्र नेपाल मात्र हाे । तर, ई–सेवाका ग्राहकले अवैध रकम एक व्यक्तिको खाता हुँदै विभिन्न व्यत्तिलाई ट्रान्सफर गर्दै बाहिरी मुलुकमा समेत पठाउने गरिएको छ ।

हाल देशभरका अधिकांश बैंकले ई–सेवामार्फत पनि कारोबार गर्ने गरेका छन् । जुन उच्च जोखिममा रहेकाे कतिपय बैंकरहरू नै बताउँछन् ।

यसरी आफ्नो ई–सेवा खाता प्रयोग गरेर एक व्यत्ति हुँदै अर्को व्यत्तिलाई रकम पठाउँदा उनीहरूले १० देखि १३ प्रतिशतसम्म कमिसन लिएर काम गर्ने गरेको प्रहरीको प्रारम्भिक अनुसन्धानले देखाएको छ ।

प्रकाशित मिति: शुक्रबार, जेठ ९, २०७७ १७:०६