पोखरा विश्वविद्यालयको लापरवाही, ४ सय बिद्यार्थी जाँच दिनबाट बञ्चित

A+ A A-

पोखरा विश्वविद्यालयको अष्पस्ट नीतिका कारण स्नातक तह पहिलो सेमेस्टरको परीक्षा स्थगित भएको छ । विश्वविद्यालय र सम्बन्धप्राप्त कलेजले स्नातक तहमा भर्ना गरेका विद्यार्थीको तह (ग्रेड) नमिलेको भन्दै विश्वविद्यालयले परीक्षा स्थगित गरेको हो ।

कक्षा ११ र १२ पास भएका विद्यार्थी भर्ना गर्दा विश्वविद्यालयको मापदण्ड अनुसार सम्बन्धन प्राप्त कलेजले भर्ना नगरेको भन्दै विश्वविद्यालयले व्यवस्थापन संकायका ३ सय ९१ जना विद्यार्थीको परीक्षा दिन नपाउने रोकेको छ ।

तर, सम्बन्धन प्राप्त कलेजले भने आफुहरुले विश्व विद्यालयले जारी गरेको सूचना अनुसार नै विद्यार्थी भर्ना गरेको बताउँदै आएकाछन् । विश्वविद्यालयले स्नाताक तहमा विद्यार्थी भर्ना सम्बन्धी बनाएको मापदण्ड आफैले पालना नगरेको पोखरा विश्वविद्यालय सम्बन्धन प्राप्त कलेजहरुको संस्था (ओपन) का अध्यक्ष प्राध्यापक डा. आरसी आचार्यले बताए ।

ग्रेडको अन्योल

पोखरा विश्वविद्यालयको ६८औँ प्राज्ञिक परिषद्को १८ जेठको बैठकले स्नातक तहमा भर्ना हुन पाउने योग्यतासम्बन्धी सूचना जारी गर्यो । विश्वविद्यालयको सूचना अनुसार व्यस्थापन संकायमा भर्ना हुनका लागि कक्षा ११ र १२ को फाईनल ग्रेड (अन्तिम तह) न्यूनतम ‘सी’ हुनुपर्ने लेखिएको छ । प्राज्ञिक परिषद्को यही निर्णय अनुसार विश्वविद्यालयका आंगिक र सम्बन्धनप्राप्त कलेजले विद्यार्थी भर्ना लिए ।

तर, परीक्षा नजिकिएपछि भने विश्वविद्यालयले आफन्ै निर्णय विपरित व्यवस्थापन संकायमा भर्ना हुनेले सबै विषयमा न्यूनतम ग्रेड ‘सी’ हुनुपर्ने बतायो । पोखरा विश्वविद्यालयले ११ माघमा आफ्ना आंगिक र सम्बन्धन प्राप्त कलेजलाई पत्र पठाएर व्यवस्थापन संकायका ३ सय ९१ जना विद्यार्थीको रजिष्ट्रेसन नगराउने जानकारी गराएको छ ।

विश्वविद्यालयको दोहोरो मापदण्डको चपेटामा परेका छन् व्यवस्थापन संकायका ३ सय ९१ जना विद्यार्थी । यी विद्यार्थीको कक्षा ११ र १२ को फाईनल ग्रेड ‘सी’ छ । कतिपय विषयमा भने ‘डी’ र ‘डी प्लस’ ग्रेड छ ।

पोखरा विश्वविद्यालयले आफूले व्यवस्थापन संकायमा विद्यार्थी भर्ना गर्ने समयमा सबै विषयमा ‘सी’ ग्रेड ल्याएका विद्यार्थीमात्र भर्ना गरेको छ ।

‘विश्व विद्यालयले कक्षा ११ र १२ मा फाईनल ग्रेड ‘सी’ ग्रेड भएका विद्यार्थीलाई भर्ना गरिने बतायो । तर, परीक्षाको समयमा आएर विश्वविद्यालयले सबै विषयमा न्यूनतम ‘सि’ ग्रेड ल्याएको विद्यार्थीले मात्रै परीक्षा दिन पाउने भन्यो’ आचार्यले सुनाए ।

विश्वविद्यालयको यही दोहोरो मापदण्डका कारण १५ चैतदेखि हुने भनिएको स्नातक तह पहिलो सेमेस्टरको परीक्षा रोकियो । परीक्षा रोकिएपनि व्यवस्थापन संकायका ३ सय ९१ जना विद्यार्थीलाई भर्ना लिने वा नलिने भन्ने विषयमा अझै केही निर्णय हुन सकेको छैन् ।

पोखरा विश्वविद्यालयको चार आंगिक र ५५ सम्बन्धन प्राप्त गरी कुल ५९ कलेज सञ्चालनमा छन् । जसमध्ये ४४ निजी कलेजमा व्यवस्थापनका कार्यक्रम सञ्चालन भइरहेको छ ।

यी मध्ये ४२ कलेजले एउटा विषयमा ‘डी प्लस’ ग्रेड ल्याएका विद्यार्थी भर्ना गरेकाछन् । यी विद्यार्थीले एउटा विषयमा ‘डी प्लस’ ग्रेड ल्याएपनि फाईनल ग्रेड भने ‘सि’ नै ल्याएकाछन् ।

‘हामीले विश्वविद्यालयले भनेअनुसार नै फाईनल ‘सि’ ग्रेड ल्याएका विद्यार्थी भर्ना गरेका हौ’ आचार्य प्रश्न गर्छन, ‘तर, अहिले विश्वविद्यालयले हाम्रो आशय सबै विषयमा ‘सी’ ग्रेड ल्याएको हो भन्छ, अब हामीले आशय बुझने कि लेखेको बुझ्ने ?’

यता पोखरा विश्वविद्यालयले आफूले व्यवस्थापन संकायमा विद्यार्थी भर्ना गर्ने समयमा सबै विषयमा ‘सी’ ग्रेड ल्याएका विद्यार्थीमात्र भर्ना गरेको छ ।

आफुले सबै विषयमा ‘सी’ ग्रेड ल्याएका विद्यार्थी भर्न गरेको कारण देखाउँदै विश्वविद्यालयले एउटा विषयमा ‘डी प्लस’ ल्याएका विद्यार्थी भर्ना रोकेको आचार्य बताउँछन ।

मन्त्रालयको निर्देशन नै मानेन विश्वविद्यालयले

१० माघमा विश्वविद्यालयले सबै विषयमा ‘सी’ ग्र्रेड नल्याएका विद्यार्थी भर्न गर्न नसकिने बताएपछि कलेजहरु शिक्षा मन्त्रालय पुगे । पोखरा विश्वविद्यालय सम्बन्धन प्राप्त कलेजहरुको संस्था ओपनले २४ माघमा शिक्षा मन्त्रालयलाई ज्ञापनपत्र बुझाएपछि मन्त्रालयले विश्वविद्यालयलाई १ फागुनमा पत्र लेख्यो ।

मन्त्रालयले प्राविधिक विषय बाहेक अन्य विषयमा ‘डी प्लस’ ग्रेडका विद्यार्थी भर्ना गर्न सकिने भन्दै आवश्यक कारबाही गर्नु भनेर पत्राचार गर्यो । तर, विश्वविद्यालयले मन्त्रालयको निर्देशन पनि सुनेको नसुन्यै गरेको बताउँछन आचार्य ।

त्यसो त ६ पुसमा विश्वविद्यालयले आफ्ना सबै आंगिक र सम्बन्धन प्राप्त कलेजलाई इमेल पठाएर व्यवस्थापन संकायमा एक विषयमा ‘डी प्लस’ ग्रेड भएका विद्यार्थीको विवरण पठाउन समेत निर्देशन दिएको छ ।

६ पुसमा विश्वविद्यालयले लेखेको ईमेलमा ‘एउटा विषयमा ‘डी प्लस’ ग्रेड ल्याएर व्यवस्थापन संकायमा भर्ना भएको विद्यार्थीको विवरण ९ पुस भित्र पठाउनुहोला’ लेखिएको छ ।

ग्रेडिङमा विश्वविद्यालयको धारणा नै विरोधाभाषपूर्ण

विश्वविद्यालयले विद्यार्थी भर्नासम्बन्धी जारी गरेको सूचनामा नै ग्रेडिङ सिस्टममा विश्वविद्यालय नै अन्योलग्रस्त देखिएको छ । विश्वविद्यालयले जारी गरेको सूचनामा ‘सी’ ग्रेडलाई कतै ४५ प्रतिशत भनिएको छ भने कतै ३५ प्रतिशत भनिएको छ । ग्रेडिङ सिस्टममा अलमलिएको विश्वविद्यालयले कतै ‘डी प्लस’ ग्रेडलाई पनि ३५ प्रतिशतमा राखेको छ ।

विश्वविद्यालयले व्यवस्थापन संकायमा भर्ना हुनकालागि न्यूनतम फाईनल ग्रेड ‘सी’ र मानविकीमा भर्ना हुनकालागि ‘डी प्लस’ तोकेको छ । तर, अंक पद्धति (नम्बर सिस्टम) बाट भर्ना हुनेले भने व्यवस्थापन र मानविकी दुवै संकायमा भर्ना हुनकालागि न्यूनतम योग्यता ‘पास’ मात्रै तोकेको छ ।

राष्ट्रिय परीक्षा बोर्डका अनुसार ३० देखि ४० नम्बर ल्याउने विद्यार्थी ‘डी प्लस’ ग्रेडमा पर्छन भने, ४० देखि ५० नम्बर ल्याउने विद्यार्थी ‘सी’ ग्रेडमा पर्छन् । अंक पद्धति अनुसार न्यूनतम ३५ ल्याउने विद्यार्थी पास मानिन्छ ।

विश्वविद्यालयको सूचना अनुसार व्यवस्थपन र विज्ञान तथा प्रविधि संकायमा भर्ना हुन न्यूनतम योग्यता ‘सी’ ग्रेड तोकिएको छ । तर अंक पद्धतिबाट आएका विद्यार्थीले भने न्यूनतम ४५ प्रतिशत ल्याएको हुनुपर्ने तोकिएको छ ।

‘सी’ ग्रेड नै तोकिएको व्यवस्थापन संकायकामा भर्ना हुनका लागि भने अंक पद्धतिका विद्यार्थीले भने उतीर्ण मात्रै भए पुग्ने व्यस्था गरिएको छ । ‘विज्ञान प्रविधिमा ‘सी’ ग्रेड ४५ प्रतिशत हुने व्यवस्थापनमा कसरी ३५ हुन्छ ?’ आचार्यले प्रश्न गरे ।

प्रकाशित मिति: सोमबार, चैत १८, २०७५ ००:३१