बागमती प्रदेशका सांसदको स्वाब शुक्रबारदेखि संकलन

A+ A A-

जिल्लाकै १ मात्र सरकारी अस्पताल हेटौंडा अस्पतालमा बागमती प्रदेशका सांसदहरूको स्वाब संकलन गर्ने तयारी गरिएको छ ।

९ जेठ शुक्रबारदेखि अस्पताल परिसरमा सांसदहरूको पीसीआर परीक्षणको लागि स्वाब संकलनब गर्ने तयारी गरिएको प्रदेशका सभामुख सानुकुमार श्रेष्ठले जानकारी दिए । उनले आवश्यकताका आधारमा सांसदहरूको स्वाब संकलन गरिने बताए । संकलित स्वाबको हेटौंडास्थित किटजन्य रोग अनुसन्धान तथा तालिम केन्द्रमा रहेको प्रयोगशालामा परीक्षण गरिनेछ ।

कोरोना भाइरस संक्रमणको प्रभावले देशमा जारी लकडाउनकाबीच बागमती प्रदेशसभा बैठक बस्ने भएपछि सांसदहरुको स्वाब परीक्षण गर्न लागिएको हो । १२ जेठबाट बागमती प्रदेशको बजेट अधिवेशन सुरु हुँदैछ । १५ जेठअघि प्रिबेजट र नीति तथा कार्यक्रम संसदमा पेश गर्नुपर्ने भएकोले बैठक बस्न लागेको हो ।

प्रदेशसभा बैठक बस्नुपूर्व सबै प्रदेश सांसदको स्वाब परीक्षण गर्न प्रदेशसभा सचिवालयले बागमती प्रदेश सरकारलाई पत्राचार गरेको थियो । सभामुख श्रेष्ठले पीसीआर परीक्षण गराएर मात्रै बैठकमा सहभागी हुन पाउने बताए । ‘कोरोनाको लक्षण देखिएका र पीसीआर परीक्षणको लागि आवश्यक देखिएका सांसदहरुको स्वाब परीक्षण गर्न लागिएको हो’ सभामुख श्रेष्ठले भने ।

सांसदहरूको स्वाब परीक्षणको रिपोर्ट एक दिनमै आउने दाबी प्रदेशको सामाजिक विकास मन्त्रालयको छ । हेटौंडा अस्पतालमा स्वास्थ्यकर्मीहरुलाई पीपीई लगाएर सांसदहरुको स्वाब संकलन गर्ने गरी व्यवस्था मिलाइएको मन्त्रालयका प्रवक्ता पुरुषोत्तम राज सेढाईंले जानकारी दिए ।

सभामुख श्रेष्ठले कोरोना प्रभावकै बीच बैठक संचालन गर्नुपर्ने भएकोले स्वास्थ्य सुरक्षालाई ध्यानमा राखेर सबै सांसद, कर्मचारी, मर्यादापालक, सुरक्षाकर्मी र चालकको स्वाब परीक्षण गरेर मात्र प्रदेशसभा परिसरभित्र प्रवेश गराउने तयारी गरिएको जानकारी दिए । ‘प्रदेशसभा आफैंमा संवेदनशील क्षेत्र हो,’ श्रेष्ठले भने, ‘स्वाब परीक्षण अनिवार्य गर्नुपर्छ ।’

१ सय १० सांसद, ३५ जना प्रदेशसभाका कर्मचारी, मर्यादापालक, सुरक्षाकर्मी र चालकसहित करिब १ सय ५० जनाभन्दा बढीको स्वाब परीक्षण हुने जानकारी दिँदै बैठक अवधिभर स्वास्थ्य सुरक्षा सामग्रीको प्रयोग पनि अनिवार्य गर्नुपर्ने सभामुखले बताए । प्रदेशसभा भवनभित्र प्रवेश गर्दा अनिवार्य रुपमा साबुन पानीले हात धुनुपर्ने, स्यानिटाइजर लगाउने पर्नेछ ।

प्रकाशित मिति: बिहीबार, जेठ ८, २०७७ २२:११