सिन्धुपाल्चोकका ६० जनाको पीसीआर नेगेटिभ

A+ A A-

सिन्धुपाल्चोक बाह्रबिसे नगरपालिका–९ राम्चेकी सुत्केरी महिलाको कोरोना संक्रमणबाट मृत्यु भएपछि उनका परिवार, आफन्त र छिमेकीलगायतको संकलन गरिएको स्वाबको रिपोर्ट आएको छ ।

सिन्धुपाल्चोकका ६० जनाको पीसीआर रिपोर्ट नेगेटिभ आएको बागमती प्रदेशको सामाजिक विकास मन्त्रालयले जानकारी दिएको छ । मन्त्रालयका अनुसार हेटौँडा प्रयोगशालामा १ सयभन्दा बढी प्राप्त स्वाब मध्ये ६० वटाको बुधवार रिपोर्ट नेगेटिभ आएको हो । अन्य स्वाब परीक्षणकै क्रममा रहेको मन्त्रालयले जानकारी दिएको छ ।

बागमती प्रदेश सरकारले र्‍यापिड रेस्पोन्स टोली पठाएर स्वाब संकलन गरिएको थियो । प्रदेश स्वास्थ्य निर्देशनालयका निर्देशक रमेश अधिकारीको नेतृत्वमा गएको टोलीले करिब ४ दिन लगाएर मृतक महिलाको परिवार, आफन्त, छिमेकीलगायतको स्वाब संकलन गरेको थियो ।

बागमती प्रदेशको ४ जिल्लाका ७४ जनाको आरडीटीबाट परीक्षण गर्दा पोजेटिभ देखाएको छ । बुधवार प्रदेश भरीका प्रयोगशालामा २ हजार १ सय १८ जनाको आरडीटी परीक्षण गरिएको थियो । जसमध्ये काठमाडौंका ३३, नुवाकोटका २२, काभ्रेका १२ र सिन्धुलीका ७ जनाको आरडीटी पोजेटिभ देखाएको मन्त्रालयका प्रवक्ता पुरुषोत्तम राज सेढाईंले जानकारी दिए ।

नुवाकोटमा परीक्षण गरिएको ५ सय ३६ जनाको आरडीटी मध्ये ककनी गाउँपालिकाको डम्पिङ साइटमा काम गर्ने १४ जना कामदार र त्रिशुली अस्पतालका स्वास्थ्यकर्मी तथा एम्बुलेन्स चालकहरुमा गरिएको परीक्षणबाट ८ जनामा गरी २२ जनामा आरडीटी पोजेटिभ देखिएको हो । आरडीटीमा पोजेटिभ देखिएका सबैको पीसीआरबाट परीक्षण हुँदैछ ।

यसैगरी ६ जेठमा पुष्टि भएको रामेछापका २३ वर्षीय कोरोना संक्रमित युवकको सम्पर्कमा आएका व्यक्तिहरुको कन्ट्याक्ट ट्रेसिङ गरी प्राप्त १५ जनाको स्वाब परीक्षण हुँदैछ । मन्त्रालयका अनुसार ५ जनाको आरडीटी रिपोर्ट नेगेटिभ आएको छ ।

७ जेठ बुधबार कोरोना संक्रमण पृष्टि भएका सिन्धुलीका व्यक्तिको सम्पर्कमा आएका व्यक्तिहरूको कन्ट्याक्ट ट्रेसिङबाट खोजी गर्न स्वास्थ्यकर्मीको टोली परिचालन भएको छ । सिन्धुली अस्पताल र स्वास्थ्य कार्यालय सिन्धुलीबाट परिचालन भएको स्वास्थ्यकर्मीको टोलीले संक्रमित व्यक्तिको परिवार, आफन्त र सम्पर्कमा आएका व्यक्तिहरुको कन्ट्याक्ट ट्रेसिङबाट खोजी कार्य भइरहेको मन्त्रालयले जनाएको छ ।

नेपालमा हालसम्म ४ सय ४४ जनामा कोरोना संक्रमण देखिएकोमा बागमती प्रदेशमा २६ जनामा संक्रमण देखिएको छ । कोरोना संक्रमणबाट बागमती प्रदेशका १ जनासहित ३ जनाको मृत्यु भएको छ ।

प्रकाशित मिति: बिहीबार, जेठ ८, २०७७ १६:४७