कर्णाली प्रदेश सरकार भन्छ, ‘कोरोना देखिए पनि समुदायस्तरमा फैलिएको छैन्’

A+ A A-

कर्णाली प्रदेशमा संक्रमित १ जना व्यक्ति भेटिए पनि समुदायस्तरमा नफैलिएको कर्णाली प्रदेश सरकारले जनाएको छ । दैलेख आठविस नगरपालिका–१ निवासी ३५ वर्षीय पुरुषमा सोमबार कोरोना संक्रमणको पुष्टि भएको र समुदायमा नफैलिएको कर्णाली प्रदेश सरकारले जनाएको छ ।

कर्णाली प्रदेशमा संक्रमण हुननदिने उद्देश्यका साथ रोकथाम, नियन्त्रणमा उच्च सतर्कतासहित काम गरिरहेको अवस्थामा देखिएको यो घटना देखिएको सामाजिक विकासमन्त्री दल रावलले बताए । ‘छिमेकी मुलुक भारतबाट आई क्वारेन्टाईनमा राखिएका व्यक्तिमा संक्रमण देखिएको छ’ उनले भने, ‘व्यक्ति समुदायमा प्रवेश गरि नसकेको अवस्था रहेका कारण यस घटनाबाट भयभीत एवं त्रसित नहुन आवश्यक रहेको छ ।’

थप संक्रमण हुननदिन उच्च सतर्कता र सावधानीका उपाय अवलम्वन गर्न संक्रमित व्यक्ति, निजका परिवारजन तथा समग्र कर्णालीबासी सचेत हुन जरुरी रहेको सामाजिक विकासमन्त्री रावलले बताए ।

कर्णाली प्रदेशमा कोरोना परीक्षणका लागि प्रदेश अस्पताल सुर्खेत र कर्णाली स्वास्थ्य विज्ञान प्रतिष्ठान जुम्लामा आरटी पीसीआर मेशिनसहितको प्रयोगशाला स्थापना गरि दक्ष जनशक्तिद्वारा विश्वसनीय रुपमा परीक्षण कार्य सामाजिक विकासमन्त्री रावलले जानकारी दिए ।

‘पुनः पुष्टिका लागि अन्य ठाउँका प्रयोगशालामा पठाउनु पर्ने प्राविधिक प्रावधान बमोजिम यस प्रदेशमा गरिएको छ’ उनले भने,‘ आरटी पीसीआर परीक्षणको १० प्रतिशत नेगेटिभसहित सबै पोजिटिभ स्याम्पल पुनः पुष्टि गर्न नेपालगञ्ज अथवा राष्ट्रिय जनस्वास्थ्य प्रयोगशालामा पठाइने गरिएको छ ।’

स्वदेश तथा विदेशका विभिन्न ठाउँबाट यस प्रदेशमा भित्रिनेनागरिकको प्रदेश सीमा नाका मै अनिवार्य रुपमा दर्ता, यात्रा इतिहासको अभिलेखीकरण र आरडीटी टेस्ट सम्बन्धित स्थानीय तहमा पठाउने, स्थानीय तहले अनिवार्य रुपमा क्वारेन्टाइनमा राख्ने, क्वारेन्टाईन अवधि पुरा भएपछि अनिवार्य आरटी पीसीआर विधिद्धारा स्वाव परीक्षण गर्ने व्यवस्था मिलाइएको मन्त्री रावलले बताए ।

‘परीक्षण रिपोर्ट प्राप्त भएपश्चात संक्रमण नदेखिएका नागरिकलाई तोकिएको समयसम्म अनिवार्य होम क्वारेन्टाइनमा रहने गरी घर पठाउने व्यवस्था मिलाइएको छ’ उनले भने, ‘स्वदेश तथा विदेशका जोखिमयुक्त क्षेत्रबाट प्रदेश भित्रिने नागरिकको संख्या वृद्धि भएसँगै हरेक स्थानीय तहको वडास्तरसम्म परीक्षणको दायरालाई बढाउन प्रदेश सरकारको निर्णय बमोजिम परीक्षण कार्य तीव्रताका साथ अगाडि बढाइएको छ ।’

प्रकाशित मिति: मंगलबार, जेठ ६, २०७७ १७:४२