भीमफेदी-कुलेखानी सुरुङमार्ग निर्माणमा लगानी गर्न संघीय सरकारलाई आग्रह

A+ A A-

बागमती प्रदेश सरकारले ‘पोष्टबहादुर बोगटी भीमफेदी–कुलेखानी सुरुङमार्ग’ निर्माणमा लगानी गर्न संघीय सरकारलाई आग्रह गरेको छ ।

मन्त्रिपरिषद् बैठकले सोमबार सुरुङमार्ग निर्माणका लागि बजेटलगायत सबै तवरमा सहकार्य गर्न संघीय सरकारलाई आग्रह गर्ने निर्णय गरेको हाे । भीमफेदी–कुलेखानी सुरुङमार्गलाई प्रदेशले गौरवको आयोजनाको रूपमा राखेको छ ।

सुरुङमार्ग निर्माणमा सहलगानी गर्न संघीय सरकारलाई आग्रह गर्ने निर्णय गरेको प्रदेशको आन्तरिक मामिला तथा कानुनमन्त्री शालिकराम जमकट्टेलले बताए । लक्ष्यअनुसार तोकिएको समयमै सुरुङमार्ग निर्माण गर्न संघीय सरकारलाई सहकार्य गर्न अनुरोध गरिएको उनको भनाइ छ । प्रदेश सरकारले चालू आवको अन्त्यसम्ममा परामर्शदाता र निर्माण कम्पनी छनोट गरिसक्ने लक्ष्य लिएको छ ।

प्राविधिक अध्ययन सकेर टेण्डर प्रक्रिया सुरु गर्ने चरणमा प्रदेश सरकार पुगेको छ । चार आर्थिक वर्षमा सुरुङमार्ग निर्माण गरिसक्ने लक्ष्यअनुरुप भौतिक पूर्वाधार विकास मन्त्रालयले सुरुङमार्गको टेण्डर निकाल्ने अन्तिम तयारी गरेको छ । सुरुङमार्ग, एप्रोच सडक र तीनवटा पुल निर्माण गर्न १८ अर्ब ७ करोड रुपैयाँ लाग्ने अनुमान गरिएको छ ।

सुरुङमार्ग निर्माणका लागि स्रोत सुनिश्चितता गरेको पत्र प्रदेश आर्थिक मामिला तथा योजना मन्त्रालयले भौतिक पूर्वाधार मन्त्रालयलाई पठाइसकेको छ । प्रदेश सरकारले पोष्टबहादुर बोगटी भीमफेदी–कुलेखानी सुरुङमार्ग नामकरण गरेर यसको निर्माणको तयारी थालेको २ वर्ष भइसकेको छ । प्रदेश सरकारले वैशाखमा टेण्डर आह्वान गर्ने योजना बनाए पनि कोरोना प्रभावका कारण समयमै टेण्डर आह्वान गर्न सकेन ।

निजीक्षेत्रको नेपाल पूर्वाधार विकास कम्पनीले हेटौँडा–भीमफेदी–कुलेखानी–काठमाडौं सुरुङमार्ग बनाउन संघीय सरकारलसँग लिएको अनुमति खारेज गर्न बागमती सरकारले पहिले नै पत्राचार गरिसकेको छ । तर, संघीय सरकारले अनुमति खारेज गरेको छैन ।

२० भदौ २०६८ मा स्थापना भएको पूर्वाधार कम्पनीले १ जेठ २०६९ मा सरकारसँग प्रारम्भिक परियोजना सम्झौता गरी अनुसन्धान कार्यारम्भ गरेकोमा उक्त कम्पनीले काम गर्न सकेको छैन । प्रदेश सरकारले सुरुङमार्ग बनाउने घोषणा गरेपछि कम्पनीले सुरुङमार्ग निर्माणमा अवरोध गर्न खोजेको आरोप लगाउँदै आएको छ ।

डीपीआर अन्तिमचरणमा रहेको भीमफेदीदेखि कुलेखानीसम्मकाे १५ किलाेमीटरकाे उक्त सडक सुरुङ निर्माणपछि ३ दशमलव २५ किलोमिटरमा सीमित हुनेछ ।

दुई लेनको सुरुङमार्गभित्र एकातर्फ ग्यास र अर्कोतर्फबाट तेल लैजान पाइपलाइनसमेत राख्ने ठाउँ छुट्याइने मन्त्रालयले जनाएको छ । सुरुङमार्ग निर्माण हुँदा हेटौँडा–काठमाडौंको यात्रा करिब २ घण्टामा गर्न सकिनेछ ।

प्रकाशित मिति: मंगलबार, जेठ ६, २०७७ १३:५५