मकवानपुर, रौतहट र सिन्धुलीका ५६ जनाको पीसीआर रिपोर्ट नेगेटिभ

A+ A A-

हेटौंडाको किटजन्य रोग अनुसन्धान तथा तालिम केन्द्रस्थित कोरोना परीक्षण प्रयोगशालामा हेटौंडासहित रौतहट र सिन्धुलीका गरी ५६ जनाको कोरोना परीक्षण गरिएको छ ।

हेटौंडाका ४१, रौतहटका ११ र सिन्धुलीका ४ जनामा कोरोना नेगेटिभ देखिएको बागमती प्रदेशको सामाजिक विकास मन्त्रालयले जानकारी दिएको छ । संकलित स्वाबको सोमबार पीसीआरबाट परीक्षण गरिएको थियो ।

प्रयोगशालामा मकवानपुरसहित चितवन, बारा, पर्सा, रौतहटलगायतका स्थानबाट स्वाब संकलन गरी कोरोना परीक्षण गरिँदै आएको छ । कोरोना परीक्षणको लागि हेटौंडा प्रयोगशालामा हालसम्म ६ सय ८९ स्वाब प्राप्त भएको छ ।

प्राप्त स्वाबमध्ये ५ सय २१ वटाको परीक्षण भइसकेको छ । हेटौंडा प्रयोगशालामा परीक्षण गरिएकोमा ४ जनालाई कोरोना पोजिटिभ देखिएको मन्त्रालयका प्रवक्ता अस्पताल विकास तथा चिकित्सा महाशाखा प्रमुख डा. पुरुषोत्तम राज सेढाईंले जानकारी दिए । जसमध्ये ३ पुरुष र १ महिला छन् ।

बागमती प्रदेशमा हालसम्म १८ जनामा कोरोना संक्रमणको पुष्टि भएको छ । काठमाडौंका ७, चितवनका ३, भक्तपुरका २, धादिङका ३, मकवानपुरका १, काभ्रेका १ र सिन्धुपाल्चोकका १ जनामा कोरोना संक्रमण पुष्टि भएको हो । जसमध्ये सिन्धुपाल्चोक बाह्रबिसे नगरपालिका–९ राम्चेकी २९ वर्षीया महिलाको कोरोना संक्रमणबाट मृत्यु भएको छ ।

संक्रमित १८ मध्ये ११ जनाको उपचार भइरहेको मन्त्रालयले जानकारी दिएको छ । काठमाडौंमा ४, चितवनमा १, मकवानपुरमा १, धादिङमा २, काभ्रेमा १, भक्तपुरमा २ जनाको उपचार भइरहेको छ ।

बागमती प्रदेशमा ४ सय ६१ क्वारेन्टाइन तयारी अवस्थामा छन् । यो प्रदेशमा अहिले २ सय ८३ जना मात्रै क्वारेन्टाइनमा बसेका छन् । सबैभन्दा बढी धादिङका १ सय ४० जना व्यक्ति क्वारेन्टाइनमा बसेको मन्त्रालयले जनाएको छ । प्रदेशभरी ९ सय ९० आइसोलेसन बेड तयार छ । अहिले यो प्रदेशमा ६९ जनालाई आइसोलेसनमा राखिएको छ ।

सिन्धुलीका २० र काभ्रेका ७ जनामा आरडीटी पोजिटिभ

नेपालमा कोरोना संक्रमितको संख्या दैनिक बढिरहेको छ । सरकारले कोरोना संक्रमित बढिरहेको अवस्थामा परीक्षणको दायरा पनि बढाएको छ ।

बागमती प्रदेशमा हालसम्म १३ हजार जनाको आरडीटीबाट कोरोना परीक्षण गरिएको छ । बागमती प्रदेशका १३ वटै जिल्लामा गरी १३ हजार १ सय ९७ जनामा आरडीटी परीक्षण गरिएको हो । जसमध्ये १ सय १३ जनालाई आरडीटीबाट पोजिटिभ देखिएको छ ।

आरडीटीबाट परीक्षण गर्दा सिन्धुलीका २० जना र काभ्रेका ७ जनामा पोजिटिभ नतिजा देखिएको सामाजिक विकास मन्त्रालयले जानकारी दिएको छ ।

संक्रमित ७ वर्षीय बालकको परिवारकालाई कारोना नेगेटिभ

मकवानपुरको उत्तरी क्षेत्र थाहा नगरपालिकाका कोरोना संक्रमित ७ वर्षीय बालकको परिवार र आफन्तका सदस्यमा कोरोना नेगेटिभ देखिएको छ ।

हेटौंडा प्रयोगशालामा गरिएको परीक्षणमा बालकको घर र मामाघरका सदस्यको स्वाब परीक्षण रिपोर्ट नेगेटिभ देखिएको प्रदेशको सामाजिक विकास मन्त्रालयले जानकारी दिएको छ । काठमाडौंमा परीक्षण गराउँदा बालकमा कोरोना भाइरस संक्रमण पुष्टि भएको थियो ।

संक्रमित बालकका परिवार र गैरीगाउँमा रहेका मामाघरका परिवारका ११ जनालाई हेटौंडास्थित आइसोलेसन वार्डमा राखेर स्वाब परीक्षण गरिएको थियो । उनीहरुलाई स्वाब परीक्षणका लागि आइतबार बिहान हेटौंडा ल्याइएको थियो ।

‘बालकको परिवार आफन्तको परीक्षण रिपोर्ट नेगेटिभ आएको छ’ मन्त्रालयका सूचना अधिकारी तथा चिकित्सा महाशाखा प्रमुख डा. पुरुषोत्तम सेढाईंले शिलापत्रसँग भने । बालकमा कोरोना पुष्टि भएपछि थाहा नगरपालिकामा उच्च सतर्कता अपनाइएको छ ।

प्रकाशित मिति: मंगलबार, जेठ ६, २०७७ ०९:४४