संघ नायकप्रति प्रार्थना

A+ A A-

अहिले उनको वरिपरि बुद्धका पवित्र वचन सुन्नेहरूको भीड छैन र छैन ध्यान सिक्नेहरूको जमात पनि । न दीक्षा लिन चाहनेहरू छन्, न त जीवन बुझ्न चाहनेहरू नै ।

अहिले उनी आफ्नो नियमित जीवन पद्धतिभन्दा विल्कुलै भिन्न तवरले धापाखेलस्थित सुमेरु अस्पतालका स्वास्थ्यकर्मीहरूको निगरानीमा सास लिइरहेका छन् ।

बाहिर १२ जना भिक्षुहरू छन् । भिक्षुहरूको मनमा आफ्ना गुरुको सम्बन्धमा खराब समाचार आउँछ कि भन्ने त्रास छ । कतै सबै रोगहरूलाई जितेर उठी पो हाल्छन् कि भन्ने झिनो आस पनि बाँकी नै छ । उनीहरूले पूरै आस मारिहालेकै छैनन् तर अवस्था जटिल छ ।

हो, अहिले सातौँ संघ नायक भिक्षु ज्ञानपूर्णिक महास्थवीर अहिले स्वास्थ्यकर्मीहरूको निगरानीमा छन् । सुमेरु अस्पतालको सघन कक्षमा उनको उपचार हुँदै छ । बाहिर उनैद्वारा दीक्षित उनका १२ जना शिष्यहरू छन्, जसले निरन्तर निगरानी गरिरहेका छन् ।

गत २१ वैशाखदेखि संघ नायक सघन उपचार कक्षमा उपचारत छन् । उनलाई उठाउने अनेक प्रयत्नमा जुटेका छन्, त्यहाँका स्वास्थ्यकर्मीहरू पनि ।

संघ नायक अहिले गम्भीर स्वास्थ्य समस्यासँग जुधिरहेका छन् । डाक्टरहरूको अथाह मिहिनेतका बाबजुद स्वास्थ्यमा कुनै सुधार देखिएको छैन र बरु स्वास्थ्य झन्झन् खस्किँदै गइरहेको छ । जटिलताहरू थपिँदै गएका छन् ।

संघनायकका शिष्य तथा लुम्बिनी विकास कोषका पूर्वउपाध्यक्ष भिक्षु निगरोधका अनुसार यस्तो जटिल परिस्थितिमा पनि उनको चेतनाले भने पूर्ण रूपमा काम गरिरहेको छ तर स्वास्थ्य चिन्ताजनक स्थितिमा पुगिसकेको छ ।

बोल्नै पर्ने अवस्थामा मात्र उनी अत्यन्तै कठिनाइपूर्वक एकाध शब्द बोल्छन् र ती शब्दहरूमा आफ्नो उपचारमा संलग्नहरूप्रति र शुभेच्छुकहरूप्रति कृतज्ञताको भाव हुन्छ । त्यस्तै, बुद्धको दया, माया, करुणा र सद्भाव तथा शान्ति, अहिंसा, ज्ञान र ध्यानको बाटोमा निरन्तर लागिरहन आफ्ना शिष्यहरूलाई निर्देशन हुन्छ ।

अस्पालको दृश्य यस्तो छ तर बाहिर भने अहिले उनको स्वास्थ्यलाभको कामना गर्दै करिव ४ सयवटा बिहारहरूमा विशेष प्रार्थना सुरु भएको छ, जसलाई थेरवाद परम्परामा परित्रान पाठ भनिन्छ ।

हिनयान भनेरसमेत बुझिने थेरवादी परम्परामा बुद्धका उपदेशहरूलाई जस्ताको त्यस्तै पालना गर्ने कुरामा विश्वास गरिन्छ । पाली भाषामा लेखिएको त्रिपिटक नै यस सम्प्रदायको मूल आदर्श हो । यिनीहरू बुद्धका उपदेशहरूलाई परिवर्तन वा परिमार्जन गर्नुहुँदैन, जुन रूपमा छन्, त्यही रूपमा पालना गर्नुपर्छ भन्ने मान्यता राख्छन् ।

जे होस्, अहिले विश्वभर ४ सयवटा बिहारहरू प्रार्थनाका पवित्र मन्त्रहरूले एकसाथ गुञ्जायमान छन् । ती प्रार्थनाहरूमा सातौँ संघ नायकको स्वास्थ्यलाभको कामना छ ।

संघ नायक विगत लामो समयदेखि मधुमेह र रक्तचापको समस्याबाट पीडित थिए । तर, करिव ४ महिनाअघि उनको मिर्गौलाले समेत काम गर्न छाड्यो । त्यसमाथि झन् नसामा समेत समस्या देखिएपछि उनी थला परेका छन् ।

'कहिलेकाहीँ अक्सिजन लेवल घटेर ६० सम्मसमेत पुग्ने गरेको छ‘, निगरोध भन्छन्, 'शरीर थला परे पनि शब्दहरू मौन भए पनि, उनको चेतना भने अहिले पनि दुरुस्त छ ।’

अहिले संघ नायकद्वारा प्रत्यक्ष रूपमा दीक्षित १ सय ५० जना शिष्यका अतिरिक्त उनले ज्ञान दिएका हजारौँ शिष्यहरू संसारभर छरिएर रहेका छन् ।

थेरवादमा संघ नायकलाई परम्पूज्य पद मानिन्छ । बुद्ध धर्मका प्रचारकका अतिरिक्त विपश्यना ध्यान पद्धतिका प्रचारकसमेत रहेका संघ नायकले ३ वटा ध्यान केन्द्र स्थापना गरेका छन् । नेपाली, पाली, संस्कृतलगायत विभिन्न भाषाका ज्ञाता रहेका उनले ६० वटा किताबहरू अनुवाद र सम्पादन गरेका छन् ।

संघ नायकका शिष्यहरूले अस्पतालको उपचारबाट आफ्ना गुरु उठ्लान् भन्ने आस गरिरहेकै छन् । उनलाई उठाउनका लागि सुरु गरिएको अनुष्ठान र विश्वव्यापी प्रार्थनाको असर कति हुन्छ ? त्यो भने हेर्न बाँकी छ ।

प्रकाशित मिति: मंगलबार, जेठ ६, २०७७ ०७:४९