कोरोना संक्रमितले भरिए प्रदेश ५ का अस्पताल, व्यवस्थापन गर्न चुनौती

A+ A A-

दिनहुँ कोरोना संक्रमितको संख्या बढेपछि प्रदेश ५ मा संक्रमितको व्यवस्थापन चुनौती बनेको छ । आज मात्र यो प्रदेशमा ४७ जना संक्रमित थप भएसँगै प्रदेशमा संक्रमित हुनेको संख्या १ सय ५९ पुगेको छ । जसमध्ये १ जना रुपन्देही कोटइमाइका युवा निको भएर घर फर्केका छन् भने बाँके नरैनापुरका २५ वर्षीय युवकको ज्यान गएको छ ।

कोरोनोको इपीसेन्टर बनेको बाँकेमा हालसम्म ८१ जनामा संक्रमण पुष्टि भइसकेको छ । नरैनापुर गाउँपालिकाका ५६ र नेपालगञ्ज उपमहानगरपालिकाका २५ जनामा संक्रमण भइसकेको छ । संक्रमित बढ्दै गएपछि उनीहरूको उपचार कहाँ गर्ने भन्ने चुनौती बढेको छ ।

प्रदेशले निर्माण गरेका ४ वटा कोरोना विशेष अस्पतालमा बेड अभाव हुन थालेको छ । बुटवलको धागो कारखानामा बनाइएको कोरोना विशेष अस्पताल, भैरहवाको भीम अस्पताल, बाँकेको सुशील कोइराला प्रखर क्यान्सर अस्पताल र दाङको बेलझुण्डीमा कोरोना विशेष अस्पताल रहेको छ ।

बुटवल, भैरहवा र बाँकेका अस्पतालमा बेड खाली छैनन् भने बेलझुण्डीको कोरोना विशेष अस्पतालमा बाँके नरैनापुरका ८ जना संक्रमित रहेका छन् ।

आज संक्रमण पुष्टि भएका ४७ जनालाई गाउँकै क्वारेन्टाइनमै व्यवस्थापनको तयारी भइरहेको बताइएको छ । जिल्लाबाट स्वास्थ्यकर्मी नरैनापुर ल्याउने र क्वारेन्टाइनमै हाललाई व्यवस्थापन गर्ने तयारी भएको गाउँपालिकाले जनाएको छ ।

मुख्यमन्त्री भन्छन्ः आइसोलेसन बेड थप गरिँदै छ

कोरोनाको संक्रमण बढ्ने निश्चित भएपछि प्रदेश सरकारले कोरोना विशेष अस्पतालको क्षमता वृद्धि गर्ने तयारीमा रहेको छ । केही नयाँ बनाउने र भएका अस्पतालमा थप बेड तयार गर्ने प्रदेश सरकारको योजना रहेको छ । मुख्यमन्त्री शंकर पोखरेलले अवस्थालाई ध्यानमा राख्दै विभिन्न अस्पतालहरूको क्षमता वृद्धि गर्ने गरी काम सुरू भइसकेको उनले बताए ।

बाँकेमा डेण्टल अस्पताल र सैनिक अस्पतालमा १ सय बेड आइसोलेसन तयार गर्ने निर्णय भएअनुसार अहिले काम भइरहेको उनको भनाई छ । त्यस्तै, बुटवलको कोरोना विशेष अस्पतालमा २ सय बेड थप्ने उनले बताए । हाल ६ आइसोलेसन बेड र ५ आइसीयू बेड छन् ।

प्रदेश सरकारले भैरहवाको भीम अस्पतालमा १ सय बेड थप्ने तयारी छ । मुख्यमन्त्री पोखरेलले भीम अस्पतालका अन्य सेवाहरू भैरहवाकै युनिभर्सल मेडिकल केलजमा सोही मूल्यमा उपचार गर्ने गरी भीम अस्पताललाई आइसोलेसन अस्पतालको रुपमा विकास गर्न लागिएको जानकारी दिए ।

नरैनापुरमा सय बेडको आइसोलेसन तयारी

बाँकेको नरैनापुरमा अहिले पनि ७ सय ४४ जना क्वारेन्टाइनमा रहेका छन् । गाउँपालिकाका १३ वटा क्वारेन्टाइनमा रहेका उनीहरू सबैको रिपोर्ट अझै आइनसकेकाले संक्रमित बढ्ने आँकलन गरिएको छ । यसैलाई लक्षित गरि प्राथमिक स्वास्थ्य केन्द्रलाई १ सय बेडको आइसोलेसन अस्पताल बनाउन सुरू गरिएको छ ।

लक्ष्मणपुर प्राथमिक स्वास्थ्य केन्द्रलाई १ सय बेडको आइसोलेसन अस्पतालको रुपमा व्यवस्थापन गर्न सुरू गरिएको गाउँपालिका अध्यक्ष इस्तियाक अहमद शाहले जानकारी दिए ।

प्रकाशित मिति: सोमबार, जेठ ५, २०७७ २०:१५