गण्डकी सरकारले शिक्षण अस्पताल चलाउने, प्रदेशका ११ अस्पताललाई गाडी

A+ A A-

गण्डकी प्रदेश सरकरले शिक्षण अस्पताल सञ्चालन गर्ने योजना बनाएको छ । प्रदेश सरकारले गण्डकी विश्वविद्यालय मातहत शिक्षण अस्पताल सञ्चालन गर्ने योजना अगाडि बढाएको हो ।

शिक्षण अस्पताल सञ्चालन गर्न मुख्यमन्त्री पृथ्वीसुब्बा गुरुङ र विश्वविद्यालयका कुलपति प्रा.डा गणेशमान गुरुङबीच छलफल भएको छ । अस्पताल सञ्चालन गर्नका लागि भएको छलफलमा दुईस्थान उपयुक्त देखिएको मुख्यमन्त्री गुरुङले जानकारी दिए ।

प्रदेश सरकरले विश्वविद्यालय गठन गर्ने कानुन बनाएर कुलपति नियुक्ति गरेपछि विश्वविद्यालय अन्तर्गत मेडिकल साइन्सेज कलेज सञ्चालनको गृहकार्य थालेको हो ।

प्रदेशका ११ जिल्ला अस्पतालाई गाडी

गण्डकी प्रदेश सरकारले प्रदेशका ११ वटै जिल्ला अस्पताललाई गाडी उपलब्ध गराउने भएको छ । सरकारले रकमान्तर गरेर यसै आर्थिक बर्षमा प्रदेशका सवै जिल्लाका अस्पतालहरुलाई गाडी दिने निर्णय गरेको हो ।

सरकारका प्रवक्ता तथा भौतिक पूर्वाधार विकासमन्त्री रामशरण बस्नेतले जिल्ला अस्पताका लागि ११ वटा स्कर्पियो किन्ने निर्णय मन्त्रिपरिषदको बैठकले गरेको बताए । उनका अनुसार गाडी खरिदका लागि सरकारले सम्बन्धित जिल्ला अस्पताललाई बजेट दिने छ ।

‘सम्बन्धित जिल्ला अस्पताललाई गाडी किन्नका लागि प्रदेशले बजेटको व्यवस्था गर्ने छ,’ उनले भने । गाडी खरिद गरेपछि त्यसको भुक्तानी आर्थिक मामिला तथा योजना मन्त्रालयले गर्ने उनले जानकारी दिए ।

स्कार्पिओ गाडीको अहिले बजार मूल्य ४८ लाख देखि ७१ लाख रुपैयाँसम्म रहेको छ । सरकारले भने नयाँ मोडेलका गाडी किन्ने जनाएको छ । नयाँ मोडेलको एउटा स्कर्पियोको मूल्य ७१ लाख भन्दा बढि रहेको छ ।

दुइ ठाउँमा विद्युतीय शवदाह गृह निर्माण गर्ने

गण्डकी सरकारले तनहुँको शुक्लागण्डकी र नवलपुरको त्रिवेणीमा विद्युतीय शवदाहगृह बनाउने भएको छ । शवदाह गृहका लागि आवश्यक सामग्री आयात गर्दा लाग्ने भन्सार छुटका लागि संघ सरकारलाई सिफारिस गर्ने मन्त्रिपरिषद् निर्णय गरेको छ ।

बजेटले शिक्षा, स्वास्थ्य क्षेत्रलाई प्राथमिकतामा राख्ने र पर्यटनलाई ब्युँझाउने गरी नयाँ प्याकेज ल्याउने लगायतका विषयलाई सरकारले प्राथमिकतामा राखेको जनाएको छ ।

प्रकाशित मिति: सोमबार, जेठ ५, २०७७ १४:२४