भीमफेदी कारागारमा दमन भएको भन्दै कैदीले लेखे गृहमन्त्रीलाई चिठ्ठी

A+ A A-

मकवानपुरको भीमफेदी गाउँपालिकास्थित क्षेत्रीय कारागार भीमफेदीका कैदीबन्दी आन्दोलनमा उत्रिएका छन् । हातमा प्लेकार्ड बोकेर आफ्नो मागसहित कैदीबन्दीहरू आन्दोलनमा होमिएका हुन् ।

कारागार प्रशासनले कैदीबन्दीहरुमाथि दमन, शोषण गरेको आरोप लगाउँदै गृहमन्त्रीलाई चिठ्ठी लेखेका छन् । कारागारका जेलर र नाइकेको मिलेमतोमा खाद्यान्न, तरकारीमामा कमिशन लिएको, कैदीबन्दीहरूले पाउने सेवा सुविधाबाट बञ्चित गरेको, मानव अधिकार उल्लंघन हुने व्यवहार गरेको, टेलिफोन गर्न नदिएको लगायतका आरोप कैदबन्दीहरूको छ ।

‘भीमफेदी कारागारका हामी कैदीबन्दीमाथि विभिन्न समयमा विभिन्न तरिकाले दमन, शोषण भइरहेको छ । यो दमन, शोषण बन्द गरियोस र सम्पूर्ण कैदीबन्दीहरूले पाउने हक अधिकार पाउँ भनी सबैको समर्थनमा हस्ताक्षर गरेका छौँ’ कैदीबन्दीहरूले गृहमन्त्रीलाई लेखेको चिठ्ठीमा भनिएको छ । गृहमन्त्रीलाई लेखेको चिठ्ठीमा १७ जनाले नामसहित हस्ताक्षर गरेका छन् ।

कारागारको ‘क’ ब्लकका कैदीबन्दी आन्दोलित भएका हुन् । उनीहरूले कारागारको भित्रबाट तालाबन्दी गरेर आफूहरूको माग पूरा नभएसम्म आन्दोलन जारी राख्ने चेतावनी दिँदै आएका थिए । उक्त ब्लकमा ५ सय ३० जना कैदीबन्दीहरू छन् । कारागारमा ‘क’ र ‘ख’ गरी २ वटा ब्लका छन् । दुवै ब्लकमा कुल ९ सय ७६ जना पुरुष कैदीबन्दीहरू छन् ।

प्रमुख जिल्ला अधिकारी दीपक राज नेपालले भने कैदीबन्दीहरूले जथाभावीरूपमा परिवारभन्दा बाहिर फोन गर्न थालेपछि कारागारको संवेदनशील सूचना बाहिर जाने सक्ने अवस्थालाई बुझेर टेलिफोन सेवा बन्द गर्दा कैदीबन्दीले आन्दोलन गरेको बताए ।

प्रजिअ नेपालले कैदीबन्दी र कारागार प्रशासनबीच सहमती भएपछि आन्दोलन स्थगित भएको जानकारी दिए । कारागार प्रमुख प्रकाश खनालसँग यस विषयमा थप जानकारी लिन शिलापत्र संवाददाताले सम्पर्क गरे पनि उनले फोन उठाएनन् ।

‘टेलिफोनको कैदीबन्दीहरूले दुरुपयोग गरेको पाइएपछि आज बिहान लाइन काटिएको हो । उनीहरूले परिवारमा नभई अन्यन्त्र फोन गरेको पाइयो’ प्रजिअ नेपालले भने 'कारागार प्रशासन र सुरक्षाकर्मी टोलीले समस्याको समाधान निकालेको छ । अबदेखि कारागारको निगरानीमा परिवार भन्दा बाहिर फोन नगर्ने सहमती भएको छ ।'

लकडाउनको अवधिबाट कारागारभित्र बारिहको मानिस प्रवेशमा रोक लगाइएको छ । सरकारले लकडाउन घोषणा हुनुपूर्व सतर्कता अपनाउँदै कारागार प्रशासनले कैदीबन्दीहरूलाई कोरोना संक्रमणबाट बचाउन भेटघाटमा कडाई गरेको छ । कारागारमा दरबन्दी रहेको स्वास्थ्यकर्मी नहुँदा विगत ६ वर्षदेखि समस्या झेल्दै आएको छ ।

कारागार प्रशासनले कोरोना संक्रमणबाट बच्न चैत ८ गतेबाट थपिएका कैदीबन्दीलाई छुट्टै कोठामा राखेको छ । कारागार प्रशासनले २ वटा कोठालाई क्वारेन्टाइनको रुपमा प्रयोग गर्दै आइरहेको छ । कारागारभित्र कर्मचारी तथा सुरक्षाकर्मी प्रवेश गर्दा शरीरको तापक्रम नाप्ने, हात धुने र सेनिटाइजरको प्रयोग अनिवार्य गरिएको छ ।

करिब १ वर्षअघि पनि कैदीबन्दीहरू कारागारमा आन्दोलित भएका थिए । कारागारका कर्मचारी र सुरक्षाकर्मीहरूको मिलेमतोमा लागुऔषध गाँजा ओसारपसार भएको भन्दै कैदीबन्दीहरू आन्दोलित भएका थिए ।

प्रकाशित मिति: शनिबार, जेठ ३, २०७७ १७:४५