हेटौँडाका ६५ उद्योग आंशिक क्षमतामा चल्दै, दैनिक करोडौँ घाटा

A+ A A-

देशमा जारी लकडाउनले हेटौँडा औद्योगिक क्षेत्रका उद्योगहरू समस्यामा गुज्रिएका छन् । लकडाउनले करिब २ महिनासम्म बन्द रहेका उद्योगहरूले पूर्ण क्षमतामा चल्न नसक्दा दैनिक करोडौँ घाटा व्यहोर्दै आइरहेका छन् ।

क्षेत्रफलको दृष्टिकोणले देशकै ठूलो औद्योगिक क्षेत्र हेटौँडा औद्योगिक क्षेत्रका ५० प्रतिशत उद्योग आंशिक क्षमतामा सञ्चालन भएका हुन् ।

हेटौँडा औद्योगिक क्षेत्रमा रहेका ठूला र मझौला गरी ११२ उद्योगमध्ये अत्यावश्यक सामग्री उत्पादन गर्ने उद्योगहरू सञ्चालनमा आएको उद्योग संघ मकवानपुरले जानकारी दिएको छ ।

कोरोना संक्रमणलाई रोक्न सरकारले लकडाउन गरेपछि उद्योगहरू पूर्ण रूपमा बन्द भएका थिए । औद्योगिक क्षेत्रमा निजीक्षेत्रको ५ अर्ब ५० करोड र सरकारी ९० करोड लगानी छ ।

दुग्धजन्य उद्योग, खानेपानी उद्योग, बेकरी तथा बिस्कुट उद्योग, मैदा उद्योग, पशुपक्षी दाना उद्योग, प्लास्टिक उद्योगलगायतका अत्यावश्यक सामग्री उत्पादन गर्ने करिब ६५ वटा उद्योगहरू मात्र सञ्चालनमा आएको संघले जानकारी दिएको छ ।

करिब १ साताअघि ३० वटा उद्योग मात्रै सञ्चालनमा थिए । केही दिनअघि लकडाउन खुकुलो हुँदा उद्योगहरूले क्षमता बढाउँदै लगेका थिए । तर, सरकारले लकडाउनमा पुनः कडाइ गरेपछि उत्पादन क्षमता बढाउँदै गएका उद्योगहरुमा अप्ठेरो स्थिति सिर्जना भएको उद्योग संघका अध्यक्ष लेखराज पोख्रेलले बताए ।

‘यहाँका उद्योगहरू ३० प्रतिशत अर्थात् आशिंक क्षमतामा सञ्चालन भइरहेका छन् । हाल सरकारले लकडाउन कडा गरेपछि उद्योगहरू अप्ठेरो स्थितिमा छन्,’ अध्यक्ष पोख्रेलले भने ।

जारी लकडाउनले हेटौँडा औद्योगिक क्षेत्रका उद्योगले दैनिक ३३ करोड रुपैयाँबराबरकाे घाटा व्यहोर्नुपरेको छ ।

उद्योगहरूले ३ करोड ३३ लाख रुपैयाँ राजस्वमा घाटा व्यहोर्नु परेको संघका अध्यक्ष पोख्रेलले जानकारी दिए ।

सञ्चालनमा आएका उद्योगहरूले लकडाउन कडा हुँदा कच्चा पदार्थको उपलब्धतामा कठिनाइ, कर्मचारी तथा कामदारमा त्रास पैदा हुनु, उद्योगमा आवतजावतको अन्याेलले उत्पादन क्षमता घटेको उनले बताए । संघले लकडाउन देशमा अझै जारी रहे उद्योगहरू सबै बन्द हुने जनाएको छ ।

‘लकडाउन कडा भइराख्यो भने कच्चा पदार्थ आउँदैन, श्रमिक काममा आउँदैनन्, व्यक्तिहरूको आवतजावत हुँदैन । यस कारण उद्योगहरू चलाउन सकिने अवस्था हुँदैन । लकडाउन भएको यतिका दिनसम्म पनि अप्ठेरो स्थितिमा उद्योगहरू सञ्चालन गर्दै आएका छौँ,’ संघका अध्यक्ष पोख्रेलले शिलापत्रसँग भने ।

हाल सञ्चालन भइरहेका उद्योगहरूमा कच्चा पदार्थको अभाव, स्वदेशी कच्चा पदार्थमा आधारित उद्योगहरूमा ढुवानीको समस्या हुन थालेको पोख्रेलले बताए ।

औद्योगिक क्षेत्रमा ५ पाँच हजार कर्मचारीसहित मजदुर कार्यरत छन् । लकडाउनका कारणले उद्योगहरू बन्द भएपछि उनीहरूको रोजगारी पनि गुमेको छ । उद्योगका श्रमिकहरू कोरोना त्रासले गर्दा काममा आउने वा नआउने विषयमा अन्याेल सिर्जना भएको उनको भनाइ छ ।

उद्योगहरूले श्रमिकहरूको नियमित थर्मल गनबाट शरीरको तापक्रम नाप्ने, सेनिटाइज गर्ने काम गरिरहेको पोख्रेलले जनाए ।

प्रकाशित मिति: शुक्रबार, जेठ २, २०७७ १८:४२