राष्ट्रपतिले लगातार ३ वर्षदेखि १ वर्षे भाखा दिएका यी ५ आयोजना

A+ A A-

वर्तमान केपी शर्मा ओली नेतृत्वको सरकार गठन भएपछि सरकारले प्रत्येक वर्ष १ वर्षभित्र गौतमबुद्ध विमानस्थल निर्माण कार्य सम्पन्न गरी सञ्चालन गर्ने जनाएको पनि पूरा हुन सकेको छैन ।

राष्ट्रपति विद्यादेवी भणडारीले आगामी आर्थिक वर्ष (आव) मा गौतमबुद्ध विमानस्थल निर्माण तथा सञ्चालन गरिने उल्लेख गरेकी छन् ।

आव २०७५ /७६ को नीति तथा कार्यक्रमको ५९ नम्बर बुँदामा उनले १ वर्षभत्रि गौतमबुद्ध क्षेत्रीय अन्तर्राष्ट्रिय विमानस्थल सञ्चालन गर्ने उल्लेख गरेकी थिइन् ।

आव २०७६/७७ को नीति तथा कार्यक्रममा ४९औँ नम्बर बुँदामा सन् २०१९ भित्रै गौतमबुद्ध विमानस्थल निर्माण कार्य सम्पन्न गर्ने उल्लेख गरेकी छन् ।

राष्ट्रपति भण्डारीले शुक्रबार पुनः आगामी आवकाे नीति तथा कार्यक्रममा पनि गौतमबुद्ध विमानस्थल आगामी आवभित्र सम्पन्न गरिने उल्लेख गरेकी छन् ।

सन् २०१५ मा सुरु भएको यो आयोजना सन् २०१७ को डिसेम्बरमा सम्पन्न गर्ने लक्ष्य निर्धारण गरिएको थियो । भूकम्प, नाकाबन्दी, भुक्तानीमा समस्यालगायतका कारण समयमा निर्माण सम्पन्न हुन नसकेको उल्लेख गर्दै निरन्तर समय सारिए पनि अझै समय निश्‍चित गर्न सकिएको छैन ।

सरकारले चौथो पटक म्याद थपेर आयोजना मार्चमा सक्ने लक्ष्य निर्धारण गरेको थियो । यो समय गुज्रे पनि आगामी आवकाे लक्ष्य राखिएको छ ।

यो विमानस्थलको लागत ३० अर्ब ४१ करोड रुपैयाँ रहेको छ । चालू आव २०७६/७७ मा ३ अर्ब ३३ करोड रुपैयाँ विनियोजन गरिएकोमा १० महिना बितिसक्दासमेत १ अर्ब रूपैयाँ पनि खर्च भएको छैन ।

सरकारले आगामी आवमा पोखरा क्षेत्रीय विमानस्थल पनि निर्माण सम्पन्न गर्ने उल्लेख गरेको छ भने निजगढ विमानस्थलको कार्य थालनी गर्ने उल्लेख गरिएको छ ।

सन् २०११ मा आयोजनाको सुरु भए पनि नेपाल सरकार र चीन सरकारबीच २०१७ मार्चमा ऋण सम्झौता भएपछि सन् २०२१ सम्म सम्पन्न गर्ने लक्ष्यका साथ पोखरा क्षेत्रीय अन्तर्राष्ट्रिय विमानस्थल आयोजनाको काम अघि बढाइएको थियो ।

यो आयोजनाको अनुमानित लागत २१ अर्ब ६० करोड रुपैयाँ छ । यो आयोजनाको निर्माण सम्झौता भएको मितिभन्दा ६ महिनाअघि नै सकिने दाबी गरिए पनि कोरोना महामारीका कारण ढिलाइ हुने उल्लेख गरिएको छ ।

राष्ट्रपतिले माथिल्लो तामाकोसी आयोजना पनि पछिल्लो ३ वर्षदेखि लगातार आगामी आवमा सक्ने सरकारी नीति तथा कार्यक्रम पढेकी छन् । तर, पूरा हुन सकेको छैन ।

आगामी आवमा तामकोसी जलविद्युत आयोजनाको निर्माण कार्य सम्पन्न गर्ने लक्ष्य राखिएको छ । सरकारको नीति तथा कार्यक्रम सम्बोधन गर्दै राष्ट्रपति भण्डारीले आगामी आवमा तामाकोसीको निर्माण कार्य सम्पन्न गरिने उल्लेख गरेकी हुन् ।

यसअघिका नीति तथा कार्यक्रममा पनि आगामी आवभित्र अर्थात् चालू आवमा ४ सय ५६ मेगावट विद्युत राष्ट्रिय प्रसारण लाइनमा जोडिने बताइएको थियो ।

चालू आवमा काम निरन्तर भए पनि तेस्रौ चौमासिकपछि काममा परेको प्रभावका कारण आयोजना पछि धकेलिएको सरकारले जनाएको छ ।

६ महिनादेखि ९९ प्रतिशत काम सकिएको माथिल्लो तामाकोसीमा काम अझै अनिश्‍चितता देखिएको छ । गत आवमा माथिल्लो तामाकोसीका लागि १ अर्ब रुपैयाँ बजेट विनियोजन गरिएकाेमा हालसम्म ६६ करोड रुपैयाँ मात्र खर्च भएको छ ।

आव २०६७/६८ बाट सुरु गरिएको यो आयोजनाको निर्माण आव २०७३/७४ भित्र सम्पन्न गरी उत्पादन सुरू गरिने लक्ष्य राखिएको थियो । भूकम्पलगायतका कारणले आयोजनाको निर्माण प्रभावित भएपछि आव २०७५/७६ को पुस महिनाभित्र निर्माण सक्ने गरी नयाँ एकीकृत समय तालिका तय गरिएको थियो ।

भारतीय ठेकेदार कम्पनीको कमजोर कार्यसम्पादनका कारण निर्माण प्रभावित भएको हो । आयोजनाको विद्युत् गृह निर्माण सम्पन्न भई तयारी अवस्थामा छ । चैतभित्र सम्पन्न गर्ने तयारी गरिएको आयोजना अहिले पनि सम्पन्न हुन सकेको छैन ।

प्रकाशित मिति: शुक्रबार, जेठ २, २०७७ १८:०१