तयारी गरौँ भव्य मृत्यु उत्सवको

A+ A A-

महाप्रलयको सङ्घारमा उभिएर
मृत्युको प्रतीक्षा गरिरहेको छ
तथाकथित समृद्ध मानव सभ्यता ।

आदि र अन्त्यको कठोर सत्य
जन्म र मृत्युको नियमित आकस्मिकता
हकिङ्को भविष्यवाणी
ओशोको चेतावनी
प्रयोगशालामा साधनारत
आधुनिक ऋषिहरू
लालची मान्छेको जीजिविषा पूरा गर्न
घनघोर तपस्यामा लीन ।

उफ ! किन बुझ्दैनन् आखिर तिनीहरू
रचना गर्भको कठोर वास्तविकता
अर्बौं वर्षपश्चातको उदय
कुनै प्रलयको सहउत्पादन सायद
चिरञ्जीवी ठान्ने टिठलाग्दो मूर्खता
प्रकृतिको एउटा तुच्छ अंश
ईश्वरको सामान्य रहर
बहुरङ्गी सृष्टिको एउटा रङ
न थियो, न हुनेछ
अनन्तकालसम्म मान्छेको अस्तित्व
पदार्थ, आकाश र समयको
संयुक्त उपहार मान्छे
एउटा नूतन प्रयोग
अदृश्य सत्ताको
थाहा छ कि छैन
निरन्तर विस्तारित ब्रह्माण्डको कथा ?

पृथ्वी जाकिनेछ सायद
अपरिमीत ब्ल्याक होलमा
ग्यालेक्सी र ग्रहहरू
लुप्त हुनेछन् कालो गर्तमा
अनि कहाँ खोज्छौ ?
कसले खोज्छौ ?
जाबो मानव जाति
अदृश्य सत्ताको अधिनायकत्वले थिचिएको
अनिश्चित भविष्यको
कमजोर धरातलमा उभिएको
चुत्थो सुइखुट्टे मान्छे तिमी
पिट्दै थियौ हिजोसम्म डङ्का
ब्रह्माण्ड विजयको
हास्यास्पद दुश्साहस तिम्रो ।

न तिम्रो गन्ती, न त कुनै मूल्य
गजको पिठ्युँमा भुसुनाको प्रलाप
आखिर सुन्ने कसले
अर्थहीन बिलाप तिम्रो ?

थाहा छ कि छैन ?
तिम्रो अनुपस्थितिमा पनि
यो सृष्टि चल्छ
तिमी नबाँचे पनि
यो ब्रह्माण्ड बाँच्छ ।

अझ राम्रो सिँगारिएर
तिम्रो विकृत मस्तिष्कले
शरीरभर कोपरेका
आला घाउ र चोटहरूमा
खाटा बसाएर ।

त्यसैले ब्युँझ घोर निद्राबाट
र, छर्लङ्गै बुझ
बरु आनन्द उठाउन जति सक्छौ
त्यसैले सल्लाह गरौँ
तयारी पनि गरौँ
अभूतपुर्व मृत्यु उत्सवको
अनि उमङ्गले मनाऔँ
अनिर्वचनीय मृत्यु उत्सव ।

प्रकाशित मिति: शनिबार, जेठ ३, २०७७ ०७:३८