कास्कीमा लकडाउनमा समेत बैकिङ कसुर मुद्दा, ६ करोड ३७ लाखका बाउन्स चेक

A+ A A-

कास्कीमा पछिल्लो समयमा बैंकिङ कसुरका मुद्दा भयाबह बन्दै गएका छन् । व्यक्ति-व्यक्तिबीच आमसी समझदारीमा हुने लेनदेनले उग्ररूप लिएपछि पछिल्लो ४ महिनाको अवधिमा कास्की प्रहरीमा ४६ जनाविरुद्ध बैंकिङ कसुर मुद्दा दर्ता भएका छन् ।

गत माघदेखि वैशाखसम्म ४६ जनाविरुद्ध बैकिङ कसुरका मुद्दा दर्ता भएको जिल्ला प्रहरी कार्यालय कास्कीले जानकारी दिएको छ । प्रहरीले बैकिङ कसुरमा मुद्दा दर्ता भएका ४६ जनामध्ये ९ जना पक्राउ गरेको छ । त्यसमध्ये ३७ जना फरार रहेका छन् । बैंकिङ कसुरमा दर्ता भएका मुद्दामध्ये गत माघमा २३ जना, फागुनमा १३ जना, चैतमा ४ जना र वैशाखमा ६ जनाविरुद्ध छन् ।

व्यक्तिव्यक्तिबीच आपसी लेनदेनका क्रममा चेक दिने र बैंकमा रहेको खातामा पैसा नभएपछि बैकमार्फत् सम्बन्धित व्यक्तिलाई जानकारी गराई चेक बाउन्स गराएर प्रहरीकोमा कारबाहीका लागि उजुरी गर्ने गरिएको छ । खातामा नगद नभईकन चेक दिनेहरूलाई कास्की प्रहरीले यस अगाडि पनि मुद्दा दर्ता गर्दै आइरहेको थियो ।

वैशाखमा मुद्दा दर्ता भएकाहरु कसैलाई पनि पक्राउ नगरिएको जिल्ला प्रहरी कार्यलय कास्कीका प्रमुख एसपी दानबहादुर कार्कीले बताए। अहिले मुद्दा दर्ता भए पनि लकडाउनपछि मात्रै उनीहरूलाई पक्राउ गर्ने तयारी भएको कार्कीले बताए । ‘प्रहरीले उजुरी नलिँदा हदम्याद गुज्रिने भएकाले मुद्दा दर्ता गराएका छौँ,’ उनले भने, ‘पक्राउ र थुनछेक भने लकडाउन पछि हुन्छ ।’

बैकिङ कसुरमा चैतमा १ जना, फागुनमा ४ जना र माघमा ४ जना गरी ९ जनालाई प्रहरीले पक्राउ गरेको छ । पक्राउ परेका प्रायले धरौटी राखेर छुटेको कास्की प्रहरीका प्रवक्ता एवं प्रहरी निरिक्षक नरहरि अधिकारीले जानकारी दिए ।

४ महिनामा ४६ वटा मुद्दा दर्ता हुँदा माघमा २ करोड ६१ लाख, १७ हजार ५ सय रुपैयाँ, फागुनमा १ करोड ७१ लाख २३ हजार रुपैयाँ, चैतमा ४० लाख ६१ हजार रुपैयाँ र वैशाखमा १ करोड ३० लाख ७० हजार रुपैयाँ सहित कुल ६ कारोड ३७ लाखका चेक बाउन्स भएको प्रमुख कार्कीले बताए ।

बैंकिङ कसुर तथा सजाय ऐन, २०४६ को दफा ३ (ग) अनुसार आफ्नो खातामा मौज्दात रकम नभएको जानी जानी चेक काटिदिनु हुँदैन भन्ने उल्लेख छ । कसैले त्यस्तो गरेमा दफा १५ (१)ले सो कसुरमा बिगो भराई बिगो बमोजिम जरिवाना र ३ महिनासम्म कैद हुने कानूनी व्यवस्था रहेको छ ।

प्रकाशित मिति: बिहीबार, जेठ १, २०७७ १७:४०