प्रदेश ५ का ९२ संक्रमितको उपचार कहाँ र कसरी हुँदै छ ?

A+ A A-

प्रदेश ५ मा हाल ९३ जनामा कोरोना संक्रमित पुष्टि भइसकेको छ, जसमध्ये रूपन्देही कोटइमाई गाउँपालिकाका २५ वर्षीय युवा उपचारपछि घर फर्किएका छन् । बाँकी ९२ जनाको प्रदेशका विभिन्न अस्पतालमा उपचार भइरहेको छ ।

संक्रमित अधिकांश लकडाउनको समयमा भारतीय सीमाबाट लुकीछिपी नेपाल प्रवेश गरेका थिए । हालसम्म जिल्लागत तथ्याङ्क हेर्दा कपिलवस्तु जिल्लामा सबैभन्दा धेरै संक्रमित छन् । त्यहाँ ३९ जनामा कोरोना संक्रमण पुष्टि भएको छ । ३९ जनामध्ये १ स्वास्थ्यकर्मी, ४ जना सुरक्षाकर्मी र २ जना कर्मचारीसमेत रहेका छन् ।

त्यस्तै, रूपन्देहीमा २८, बाँकेमा २५, बर्दिया र नवलपरासीमा १/१ संक्रमित रहेका छन् । संक्रमितका कारण अहिले प्रदेश ५ मा तयार भएका कोरोना विशेष अस्पतालहरूमध्ये दाङको बेलझुण्डीबाहेक सबै अस्पतालमा बेड भरिएका छन् ।

प्रदेश सरकारले बुटवलको धागो कारखाना, बाँकेको सुशील कोइराला प्रखर क्यान्सर अस्पताल, दाङको बेलझुण्डीस्थित कोरोना विशेष अस्पताल र भैरहवास्थित भीम अस्पताललाई कोरोना विशेष अस्पतालको रूपमा विकास गरिएको छ ।

बुटवलको धागो कारखानामा रहेको कोरोना विशेष अस्पतालमा ३६ जना रहेका छन् । रूपन्देहीका ११ र कपिलवस्तुका २५ जना अहिले त्यहाँ रहेका छन् । ५ बेडको आईसीयूसमेत यस अस्पतालमा उपलब्ध छ ।

भैरहवास्थित भीम अस्पतालमा १९ जनाको उपचार भइरहेको छ । ३० बेड रहेको भीम अस्पतालमा लुम्बिनी सांस्कृतिक नगरपालिकाका ४, गैडहवा गाउँपालिकाका १० जना, कपिलवस्तुका ३ जना र भीम अस्पतालमै कोरोनो पोजिटिभ देखिएका २ जना गरी १९ जनाको उपचार भइरहेको छ । भीम अस्पतालमा कोरोना पोजिटिभ देखिएका १ जना भारतीय र अर्का १ जना कपिलवस्तुका हुन् ।

त्यस्तै, बाँकेको नेपालगञ्जस्थित सुशील कोइराला प्रखर क्यान्सर अस्पतालमा २६ जनाको उपचार भइरहेको छ । त्यहाँ बाँकेका २५ जना र बर्दियाका १ जनाको उपचार भइरहेको छ । त्यसबाहेक परासी अस्पतालमा १ र कपिलवस्तु जिल्ला अस्पतालमा १ जनाको उपचार भइरहेको स्वास्थ्य निर्देशनालयका प्रवक्ता रोशनलाल चौधरीले जानाकारी दिए । संक्रमित कुनै पनि व्यक्तिमा संक्रमणको लक्षण भने छैन । उनीहरूको स्वास्थ्य अवस्था सामान्य रहेको बताइएको छ ।

अझै प्रदेश ५ मा कोरोना संक्रमितको संख्या बढ्ने आँकलन गरिएको छ । भारतीय सीमा क्षेत्रबाट लुकीछिपी नेपाल प्रवेश गर्नेहरू बढिरहेकाले संक्रमितको संख्या अझै बढ्ने आँकलन गरिएको हो । संक्रमितको संख्या बढ्दै जाने हो भने अहिले भइरहेका आइसोलेसन अस्पतालमा संक्रमितको उपचार गर्न बेड अभाव हुने निश्चित भएपछि बुटवलको कोरोना विशेष अस्पतालमा १ सय बेड थप गर्ने तयारीसमेत भइरहेको छ ।

प्रवक्ता चौधरीले ३ दिनअघि प्रदेश ५ का उद्योग, पर्यटन वन तथा वातावरणमन्त्री लीला गिरीको संयोकत्वमा बसेको बैठकले बेड थप गर्ने निर्णय गरेको र त्यसको तयारी भइरहेको जानाकारी दिए ।

हाल कोरोना विशेष अस्पतालमा पनि स्वीकृत बेड संख्यासमेत तयार हुन सकेका छैनन । बुटवलमा सुरुवाती चरणमा १ सय बेड भनिए पनि जम्मा ३६ बेड तयार भएका छन् । भीम अस्पतालमा ५० बेड स्वीकृत भए पनि आईसीयूसहित ३५ बेड मात्र छन् । त्यस्तै, सुशील कोइराला प्रखर क्यान्सर अस्पतालमा ५० बेड स्वीकृत भएकामा जम्मा २६ बेड तयार रहेका छन् । बेलझुण्डीमा २ आईसीयूसहित ८८ बेड रहेका छन् ।

बेलझुण्डी कोरोना विशेष अस्पतालमा संक्रमित लैजाने तयारी

बर्दियाकी ११ वर्षीया बालिकालाई दाङको बेलझुण्डीमा तयार भएको कोरोना विशेष अस्पतालमा लैजाने तयारी भइरहँदा दाङको शान्तिनगर गाउँपालिकाले विज्ञप्ति निकाल्दै विरोध जनायो । त्यसपछि ती संक्रमित बालिकालाई सुशील कोइराला प्रखर क्यान्सर अस्पतालमा लगिएको थियो । प्रदेश ५ का तराईका जिल्लामध्ये दाङमा अहिलेसम्म संक्रमण नदेखिएकाले गाउँपालिकाले विज्ञप्ति निकाल्दै संक्रमितलाई दाङ ल्याउने दुष्प्रयास नगर्न चेतावनी दिएको थियो ।

तर, अहिले भने कपिलवस्तुका सुरक्षाकर्मी र कर्मचारीलाई बेलझुण्डी कोरोना विशेष अस्पतालमा लैजाने तयारी भइरहेको स्वास्थ्य निर्देशनालय प्रदेश ५ का प्रवक्ता चौधरीले जानाकारी दिए । यहाँका अस्पतालका सबै बेड भरिएकाले बेलझुण्डीमा पनि संक्रमित लैजानुको विकल्प नभएको भन्दै संक्रमित लैजान छलफल भइरहेको उनले जानाकारी दिए ।

८ हजारभन्दा बढी क्वारेन्टाइनमा

लुकीछिपी नेपाल प्रवेश गरेका कारण प्रदेश ५ मा क्वारेन्टाइनमा बस्नेहरूको संख्या पनि बढिरहेको छ । बुधबार राती ८ बजेको तथ्याङ्कअनुसार प्रदेश ५ मा ८ हजार २ सय १९ जना क्वारेन्टाइनमा रहेका छन् । स्वास्थ्य निर्देशनालय प्रदेश ५ का अनुसार सबैभन्दा बढी कपिलवस्तुमा ४ हजार १ सय २६ जना रहेका छन् ।

त्यसबाहेक बाँकेमा ७ सय ४८, बर्दियामा ४ सय ५१ जना, अर्घाखाँचीमा ३३, रूपन्देहीमा १ हजार २ सय ४, पाल्पा ४८, गुल्मी ४९, नवलपरासी ३ सय २५, दाङ ८१, रोल्पा २ सय ९, रुकुमपूर्व २७ र प्युठानमा ९ सय १८ जना क्वारेन्टाइनमा रहेका छन् ।

४ हजार बढीको स्वाब सङ्कलन

हालसम्म प्रदेशमा ४ हजारभन्दा बढीको स्वाबको नमुना सङ्कलन गरिएको छ । स्वास्थ्य निर्देशनालयका अनुसार बुधबार ८ बजेसम्म ४ हजार १ सय २० जनाको नमुना लिइएको हो । तीमध्ये ९३ जनाको रिपोर्ट पोजिटिभ, ३ हजार ३ सय ७८ जनाको रिपोर्ट नेगेटिभ आएको छ । बाँकी ६ सय ४९ जनाको रिपोर्ट आउँन बाँकी छ । स्वाब परीक्षण राष्ट्रिय प्रयोगशाला काठमाडौं, प्रदेश प्रयोगशाला भैरहवा, भेरी अस्पताल, राप्ती हेल्थ साइन्स र गण्डकी प्रदेश प्रयोगशालामा भइरहेको छ ।

आरडीटी भने प्रदेश ५ मा ७ हजार ९ सय १५ जनाको गरिएको छ । त्यसमध्ये १५ जनामा आरडीटीमा पोजेटिभ देखिएको थियो ।

प्रकाशित मिति: बिहीबार, जेठ १, २०७७ १७:०५