लकडाउन अवधिभित्र विदेशमा १ सय ४४ नेपालीकाे मृत्यु, १ सय १४ शव अलपत्र

प्रतिकात्मक तस्वीर

A+ A A-

लकडाउन अवधिमा वैदेशिक रोजगारीका क्रममा मृत्यु भएका १ सय १४ नेपालीको शव विदेशमा अलपत्र छ । वैदेशिक रोजगारीका क्रममा मृत्यु भएका कामदारको शव अन्तर्राष्ट्रिय उडान बन्द हुँदा ल्याउन नसकिएकाले अलपत्र परेकाे वैदेशिक रोजगार प्रवर्द्धन बोर्डले जनाएको छ ।

बोर्डका अनुसार यूएईमा २ महिला र ३० पुरुष गरी ३२, साउदीमा १ महिला र ३३ पुरुष गरी ३४, मलेसियामा २९ पुरुष, कतारमा ३५ पुरुष, कुवेतमा तीन महिला र ४ पुरुष गरी ७ र बहराइनमा दुई पुरुषको मृत्यु भएको छ । उनीहरूको शव सम्बन्धित देशमै रहेको बोर्डले जनाएको छ ।

यसैगरी, सेल्सेमा १, दक्षिण कोरियामा २, टर्कीमा १, ओमानमा १ गरी १ सय ४४ जना नेपाली कामदारकाे मृत्यु भएको बोर्डको तंथ्याकमा छ ।

तीमध्ये १५ जनाकाे परिवारले विदेशमै अन्त्येष्टिका लागि सहमति दिएपछि ७ जनाको अन्त्येष्टि भइसकेको बोर्डले जनाएको छ ।

यसरी अन्त्येष्टि गरिएका कामदारका परिवारलाई सान्त्वना स्वरुप जनही ५० हजार क्षतिपूर्तिसमेत दिने गरिएकाे बोर्डका कार्यकारी निर्देशक राजनप्रसाद श्रेष्ठले बताए ।

अन्तर्राष्ट्रिय उडान बन्द हुनुअघि र यही अवधिमा अहिलेसम्म ११ देशमा १ सय ४४ नेपाली कामदारको मृत्यु भएको उनको भनाइ छ ।

बोर्डले मृतकका परिवारलाई राहत क्षतिपूर्तिस्वरुप ७ लाख रुपैयाँ र बालबच्चालाई छात्रवृत्तिलगायत सहयोग गरिरहेको छ । यसैगरी पीडित परिवारले बिमावापतकाे रकम पनि पाउने गरेका छन् ।

वैदेशिक रोजगारीमा गएका १ हजार कामदारकाे वार्षिक मृत्यु हुने गरेको छ भने ७ जनाभन्दा धेरै अंगभंग भएर स्वदेश फर्किने गरेका बोर्डको तथ्याङ्कमा छ ।

समस्या परेका कामदारलाई खान बस्न

सरकारले रोजगारदाता देशमा समस्या परेका कामदारलाई खाना बस्नका लागि ७० लाख रुपैयाँ पठाएको छ । साउदी, मलेसिया, यूएई र बहराइनमा रहेका नेपाली दूतावासले त्यहाँ समस्यामा परेका कामदारलाई खाना बस्न व्यवस्थापन गर्ने माग गरेअनुसार करिब ७० लाख रुपैयाँ परराष्ट्र मन्त्रालयमार्फत पठाइएको बोर्डले जानकारी दिएको छ ।

४ वटा देशले श्रमिकका लागि खान बस्नको व्यवस्था गर्न रकम आवश्यक परेको भन्दै माग गरेअनुसारको रकम उपलब्ध गराएको बोर्डकाे भनाइ छ ।

रोजगारदाता देशमा कोरोना भाइरसकाे संक्रमण बढेसँगै काम रोकिँदा, तलब नपाउँदा, घर फर्कन नपाएका कामदारलाई खाद्यन्न र बस्न समस्या भइरहेको विषयमा कूटनीतिक नियोगले सरकारलाई जानकारी गराएका थिए ।

कोरोनाका कारण रोजगारदाता देशबाट करिब ५ लाख कामदारकाे उद्धार अन्तर्राष्ट्रिय उडान खुलेपछि गर्नुपर्ने बोर्डले जनाएको छ ।

प्रकाशित मिति: बिहीबार, जेठ १, २०७७ १६:१८