हिरासतमा रहेका अध्यक्ष छुटाउन वडा कार्यालयमा ताला, लकडाउन उल्लंघन गर्दै नाराबाजी

हिरासतमा रहेका अध्यक्ष छुटाउन वडा कार्यालयमा ताला, लकडाउन उल्लंघन गर्दै नाराबाजी

वडा अध्यक्ष कुटपिटबाट घाइते गाउँपालिका अध्यक्ष दम्पत्ति

A+ A A-

कालिकोटको पलाँता गाउँपालिका भएको विवादले चर्कोरूप लिएको छ । वैशाख २७ गते पलाँता गाउँपालिका अध्यक्ष लक्ष्मणबहादुर बम, पलाँता गाउँपालिका-२ का वडा अध्यक्ष मानबहादुर भण्डारी र नेपाल कम्युनिष्ट पार्टी (नेकपा)का गाउँपालिका अध्यक्ष विष्णु रोकायाबीच कुटाकुटको भएको घटनाले नयाँ रूप लिएको हो ।

पलाँता गाउँपालिका-२ को ग्रामीण सडक योजनाको उपभोक्ता समिति गठन गर्ने क्रममा गाउँपालिका अध्यक्ष बम, वडा अध्यक्ष भण्डारी र नेकपाका गाउँपालिका अध्यक्ष रोकाया पक्षबीच झडप भएको थियो । झडपमा परी गाउँपालिका अध्यक्ष बमकी श्रीमती गोरीकला बमलगायतका घाइते भएका थिए ।

श्रीमती घाइते भएपछि गाउँपालिका अध्यक्ष बमले वडा अध्यक्ष भण्डारी र नेकपाका गाउँपालिका अध्यक्ष रोकायाविरुद्ध जिल्ला प्रहरी कार्यालय कालिकोटमा मुद्दा दायर गरेका थिए ।

जिल्ला प्रहरी कार्यालय कालिकोटले वडा अध्यक्ष भण्डारी र नेपाल कम्युनिष्ट पार्टी(नेकपा)का गाउँपालिका अध्यक्ष रोकायालाई बुधबार पक्राउ गरेपछि अहिले वडा अध्यक्ष भण्डारी र रोकाया पक्षले गाउँपालिकामा तालाबन्दी गर्दै आएका छन् ।

गाउँपालिका अध्यक्षविरुद्ध नाराबाजी

स्थानीयले गाउँपालिका अध्यक्ष लक्ष्मण बमविरुद्ध चर्को नाराबाजी गरेका छन् । आक्रमण गरेको आरोपमा पक्राउ परेका नेकपा पलाता गाउँपालिका कमिटी अध्यक्ष इन्द्र रोकाया र सोही गाउँपालिका–१ का वडाध्यक्ष मानबहादुर भण्डारीका समर्थकले भ्रष्टाचारी नेता चाहिँदैन, गाउँपालिको खाता बन्द गर, नेता थुन्न पाइँदैन, पलाँता रेडियो खारेज गर, झुट्टा मुद्दा खारेज गर, जस्ता नारा लगाएका छन् ।

कालो झण्डासहित अध्यक्ष बमविरुद्ध उत्रेका स्थानीयले १० महिनादेखि शिक्षक कर्मचारीलाई तलतब नपाएको, अग्निपीडितलगायतका लागि आएको पैसा हिनामिना भएको आरोप लगाएका छन् । आन्दोलनमा उत्रेका स्थानीयले गाउँपालिकाका सबै वडा कार्यालयमा ताला लगाउने अभियान चलाएका छन् ।

बुधबार पक्राउ परेका वडा अध्यक्ष र पार्टी अध्यक्ष रिहा नगरेसम्म ताला नखोलिने उनीहरुले बताएका छन् । गाउँपालिका-१ र २ नम्बरमा तालाबन्दी गरिसकेको नेकपाका स्थानीय नेता मनप्रसाद न्यौपानेले बताए ।

गाउँपालिका अध्यक्ष पक्षधर कारबाही माग गर्दै आन्दोलनमा

गाउँपालिका अध्यक्ष लक्ष्मणबहादुर बम पक्षधरले वडा अध्यक्ष भण्डारी र नेकपा गाउँपालिका अध्यक्ष रोकायाको कारवाहीको माग गर्दै २ दिन पलाँता गाउँपालिकाको थिर्पु प्रहरी चौकीमा प्रदर्शन गर्दै आएका छन् ।

वडा अध्यक्ष भण्डारी र नेकपा गाउँपालिका अध्यक्ष रोकायालाई कारबाहीको माग गर्दै २ दिनदेखि प्रहरी चौकीमा प्रद्धर्शन भइरहेको स्थानीय पूर्णबहादुर बमले बताए ।

प्रकाशित मिति: बिहीबार, जेठ १, २०७७ १४:३६