मन्त्री, प्रहरी र नेताको दबाबमा दैनिक ३ हजार मानिस उपत्यका भित्रिँदै

A+ A A-

सरकारले कोरोना भाइरसको संक्रमण रोक्न लकडाउन गरेसँगै देशको राजधानी काठमाडौंं छाड्ने मानिसको संख्या ह्वात्तै बढेको थियो । चैत र वैशाख दोस्रो सातासम्म करिब ९ लाख मानिसले राजधानी छाडेका थिए । गत सातादेखि तराईमा कोरोना भाइरसको संक्रमण बढेसँग राजधानी भित्रिने मानिसको संख्या दैनिक बढ्न थालेको प्रहरीले जनाएको छ ।

सरकारले लकडाउनमा ३९ वटा क्षेत्रका उद्योग, व्यवसाय सञ्चालन गर्ने दिने निर्णय गरेसँग त्यस्ता उद्योगमा काम गर्ने भन्दै धेरै मानिस राजधानी फर्कन थालेको नागढुंगा चेक पोस्टले जानकारी दिएको छ । नागढुंगा चेक पोस्टका अनुसार एक सातायता उक्त चेक पोस्ट हुँदै दैनिक ३ देखि ४ हजार मानिस राजधानी प्रवेश गरिरहेका छन् ।

यसरी फर्कने मानिस राजधानीमा पहिला बसोवास गरिरहेका र कोरोना भाइरस नियन्त्रण गर्न सरकारले लकडाउन गरेसँग राजधानी छाडेका भएको नागढुंगा चेक पोस्टमा ड्युटीमा खटिएका एक प्रहरीले जानकारी दिए ।

नागढुंगा चेक पोस्ट हुँदै दैनिक करिब ३ हजारसम्म मानिस र ५ हजारसम्म सवारी साधन राजधानी प्रवेश गरिरहेको ती प्रहरी बताउँछन् ।

‘सर, हाम्रो काम त ड्युटी गर्ने मात्र हो । माथिबाट कसैले यो मेरो मान्छे हो भन्यो भने केही नभनी पठाउनुपर्छ । उनीहरूको सामान्य ज्वरो नापेर पठाउने गरेका छौँ । केही भनेर सोध्यो भन्ने फलानाको मान्छे हो भन्दै फोन गर्छन्’, उनले भने, ‘कहिले पूर्वमन्त्री, वहालवाला मन्त्री, नेता र स्थानीय जनप्रतिनिधिको सिफारिसमा धेरै पहिला घर फर्किएका अहिले उपत्यका भित्रिरहेका छन् । यसरी भित्रिने धेरै तराईबाट आउँछन् । हामी त आदेश मान्ने हो । भनसुनमा आएकालाई पठाइदिन्छौँ ।’

कतिपय मानिसहरू त नागढुंगा चेक पोस्ट आगाडि नै गाडीबाट ओर्लिएर हिँडेरसमेत राजधानी प्रवेश गरिरहेको उनको भनाइ छ । प्रहरीले रोक्न डर भए पनि चेक पोस्टदेखि अलिक पर ओर्लिएर हिँडदै जाने गरेका छन् ।

पछिल्लो समय तराईका जिल्लामा कोरोना भाइरसको संक्रमण बढेसँगै उपत्यका भित्रिने मानिस राजधानी आइरहेको प्रहरीको भनाइ छ । राजनीतिक दबाबमा राजधानी प्रवेश गर्ने मानिसको संख्या बढेसँग कोरोना भाइरसको पनि उच्च जोखिम हुन थालेको छ ।

बिरामी बोक्न एम्बुलेन्स र प्रहरीले नै मानिस ओसार्ने काम गरिरहेको नागढुंगा चेक पोस्टमा पसल गर्दै आएकी एक महिलाले बताइन् । प्रहरी पोसाक लगाएर जाने अनि गाडीमा मान्छे लिएर आउने गरेको ती महिलाले जानकारी दिइन् ।

‘सर, एम्बुलेन्सले त झन् बिरामी बोक्ने वहानामा राती मानिस ओसार्ने गरेका छन् । बिरामी त हुँदैन एम्बुलेसभित्र सबै राजधानी प्रवेश गर्ने मानिस लिएर आउँछन् । नत्र एक दिन क्यामरा बोकेर बस्नु, सबै प्रत्यक्ष देख्नुहुन्छ’, उनले भनिन् ।

उनले यसो भनिरहँदा छेउमा उभिएका प्रहरी मुसुमुसु हाँसिरहेका थिए । ती प्रहरीले समेत टाउको हल्लाएर ती महिलाले भनेजस्तो भइरहेको स्वीकार गरेका थिए ।

प्रहरीका अनुसार उद्योग, बैंक र खाद्यान्नमा काम गर्ने भन्दै धेरै आइरहेका छन् । यस विषयमा पटक पटक सम्बन्धित निकायमा जानकारी गराइरहेको उनको भनाइ छ ।

तरकारी बोक्ने गाडी, मालवाहक ट्रक, दूध बोक्ने गाडी र औषधिका गाडीले समेत मानिस ओसार्ने काम गरिरहेको प्रहरी नै बताउँछन् ।

प्रकाशित मिति: बुधबार, वैशाख ३१, २०७७ १८:३०