मकवानपुरमा उच्च सतकर्ताः तरकारी, फलफूल र कामदार ल्याउन प्रतिबन्ध

फाइल तस्वीर

A+ A A-

छिमेकी जिल्ला पर्सामा कोरोना संक्रमित बढेपछि मकवानपुरमा उच्च सतर्कता अप्नाइएको छ । आज मंगलबार जिल्ला समन्वय समितिमा भएको बैठकले जिल्लामा उच्च सर्तकर्ता अपनाउने निर्णय गरेको छ ।

बैठकले कोरोना संक्रमित जिल्लाबाट मकवानपुरमा तरकारी, फलफूल, माछामासु तथा तराईबाट कामदार ल्याउन प्रतिबन्ध गरेको छ । हेटौँडा उपमहानगरपालिकाका नगर प्रमुख हरिबहादुर महतले कोरोना संक्रमित जिल्लाबाट तरकारी, फलफूल, कामदार ल्याउन नपाइने निर्णय गरेको बताए ।

बैठकमा सहभागीहरुले हेटौँडाको चुरेको वनक्षेत्रबाट तराईका कामदार लुकेर आउने गरेको जानकारी गराएका थिए । कामदार लुकेर मकवानपुर प्रवेश गर्न थालेपछि कोरोना संक्रमणको जोखिम बढेको भन्दै कडाईका साथ रोक लगाइने निर्णय गरेको जनाइएको छ ।

चुरेको वनक्षेत्रबाट लुकेर आउने कामदार रोक्न सम्बन्धित वडाध्यक्ष, स्थानीयलगायतको सहभागितामा निगरानी बढाउने निर्णय भएको जिल्ला समन्वय समितिकी उपाध्यक्ष भगवती पुडासैनीले जानकारी दिइन् ।

जिल्लास्थित उद्योग, कलकारखाना र निर्माण क्षेत्रमा तराईका जिल्लाबाट कामदार ल्याउन रोक लगाईएको उपाध्या पुडासैनीले बताइन् । जेठ १ गतेबाट हेटौँडाको बसपार्कमा रहेको तरकारी बजार तथा माछामासु पसल पनि बन्द गर्ने निर्णय गरेको छ । तरकारी सहकारीमार्फत बिक्री वितरण गर्ने तयारी गरिएको छ ।

तराईबाट हेटौंडा प्रवेश गर्ने नाका बन्द

कोरोनाको संक्रमण बढ्दै गएपछि मकवानपुरमा बुधबारबाट पूर्व–पश्चिम राजमार्ग अन्तर्गत रातोमाटे नाका बन्द गर्ने निर्णय गरिएको छ ।

हेटौँडामा बसेको कमाण्ड पोष्टको बैठकले लकडाउनलाई कडा बनाउने निर्णय गर्दै दक्षिणीे नाकामा प्रहरी पोष्ट खडा गर्ने र मकवानपुर आउने सबारीसाधनको कडा निगरानी राखिने भएको छ ।

हेटौँडामा खाद्यन्न तथा ग्यास पसलमात्र खोल्न पाउने निर्णय गरिएको छ । बैठकले तराईका जिल्लाबाट मकवानपुर छिर्ने अन्य नाकामा समेत कडाई गर्ने निर्णय गरेको छ । बैैंकलाई विहान १० बजेबाट ३ बजेसम्म खुल्ला गर्ने तर भिडभाड गर्न नदिने निर्णय गरिएको छ ।

प्रकाशित मिति: मंगलबार, वैशाख ३०, २०७७ १९:५४