बागमती प्रदेशका ६ जिल्लाका क्वारेन्टाइन र आइसोलेसन खाली

फाइल तस्वीर

A+ A A-

देशमा कोरोना संक्रमणको अवस्था बढ्दो छ । हालसम्म कोरोना संक्रमितको संख्या १ सय ३४ जना पुगेको छ ।

कोरोनाबाट बच्न बागमती प्रदेशका १३ वटै जिल्लामा क्वारेन्टाइन र आइसोलेसन बेड स्थापना गरिएको छ । तर, कोरोना संक्रमितको संख्या बढिरहेको अवस्थामा भने प्रदेशका ६ जिल्लामा संक्रमितको उपचारको लागि तयारी अवस्थामा राखिएको क्वारेन्टाइन र आइसोलेसन बेड खाली छ । नयाँ बिरामी नभएको र कोरोना आशंका गरिएका व्यक्ति नभएका कारण क्वारेन्टाइन र आइसोलेसन बेड खाली रहेको मन्त्रालयले जनाएको छ ।

काठमाडौं, भक्तपुर, रसुवा, रामेछाप, दोलखा र काभ्रेका गरी २ हजार २ सय २८ क्वारेन्टाइन र ४ सय १६ आइसोलेसन बेड खाली रहेको सामाजिक विकास मन्त्रालयले जानकारी दिएको छ ।

काठमाडौंका ७ सय ९९ क्वारेन्टाइन र २ सय २४ आइसोलेसन, भक्तपुरमा ३ सय १३ क्वारेन्टाइन र ४२ आइसोलेसन, रसुवामा २ सय ८३ क्वारेन्टाइन र ३५ आइसोलेसन, रामेछापमा ३ सय ३१ क्वारेन्टाइन र ६१ आइसोलेसन, दोलखामा १ सय ६० क्वारेन्टाइन र ४१ आइसोलेसन तथा काभ्रेमा ३ सय ४२ क्वारेन्टाइन र १३ आइसोलेसन बेड खाली छन् ।

प्रदेशका १३ वटै जिल्लामा ४ हजार ४ सय ५६ क्वारेन्टाइन र ९ सय ७५ आइसोलेसन बेड स्थापना गरिएको छ । बागमती प्रदेशमा चालू अवस्थामा रहेका आइसोलेसन र क्वारेन्टाइनमा न्यून बिरामी छन् । मन्त्रालयका अनुसार प्रदेशका १३ जिल्लामा गरी कुल १ सय ९५ जना क्वारेन्टाइनमा बसेका छन् । आइसोलेसनमा २५ जनामात्रै बिरामी छन् ।

ललितपुरमा ३ जना क्वारेन्टाइन र ३ जना आइसोलेसनमा भर्ना भएका छन् भने नुवाकोटमा १–१ जना क्वारेन्टाईन र आइसोलेसनमा छन् । धादिङमा १ सय ४० जना क्वारेन्टाइनमा रह“दा भने २ जना आइसोलेसनमा छन् ।

चितवनमा १९ जना क्वारेन्टाइनमा १२ जना आइसोलेसनमा छन् ।सिन्धुलीमा २७ जना क्वारेन्टाइनमा बस्दा आइसोलेसन खाली छ । मकवानपुरको क्वारेन्टाइन खाली हुँदा ७ जना आइसोलेसनमा भर्ना भएका छन् । सिन्धुपाल्चोकमा ५ जना क्वारेन्टाइनमा बसेका छन् भने आइसोलेसन खाली छ ।

हालसम्म बागमती प्रदेशमा पीसीआर किटबाट परीक्षण गर्दा ७ जनामा कोरोना पोजिटिभ देखिएको सामाजिक विकास मन्त्रालयका अस्पताल विकास तथा चिकित्सा महाशाखा प्रमुख डा. पुरुषोत्तम राज सेढाईंले जानकारी दिए ।

कोरोना पोजिटिभ देखिएका ७ मध्ये ५ जना निको भइसकेका छन् भने २ जना उपचाररत रहेको मन्त्रालयले जनाएको छ । बागमती प्रदेशको ६ स्थानबाट कोरोना परीक्षण हुँदै आएको छ ।

राष्ट्रिय जनस्वास्थ्य प्रयोगशाला तथा शुक्रराज ट्रपिकल तथा सुरुवा रोग अस्पताल काठमाडौं, किटजन्य रोग अनुसन्धान तथा तालिम केन्द्र हेटौंडा, भरतपुर अस्पताल कोभिड–१९ प्रयोगशाला चितवन, वीर अस्पताल काठमाडौं, पाटन अस्पताल ललितपुर र काभ्रेको धुलिखेल अस्पतालबाट कोरोना परीक्षण हुँदै आएको छ ।

प्रकाशित मिति: मंगलबार, वैशाख ३०, २०७७ ०८:११