लकडाउनको धज्जी उडाउँदै मुख्यमन्त्री नै हेलिकोप्टरमा सरर

A+ A A-

कर्णालीका मुख्यमन्त्री महेन्द्रबहादुर शाही र सामाजिक विकासमन्त्री दल रावललगायतको टोली सोमबारदेखि कोरोना भाइरस (कोभिड–१९) नियन्त्रण रोकथामका लागि कर्णालीका विभिन्न जिल्लाको भ्रमणमा निस्किएको छ ।

भ्रमणका क्रममा मुख्यमन्त्री शाही र सामाजिक विकासमन्त्री रावलले लकडाउनकै धज्जी उडाएका छन् ।

सोमबार हेलिकाेप्टरमार्फत जुम्लाहुँदै हुम्लाको सर्केगाड गाउँपालिकामा पुगेका सामाजिक विकासमन्त्री रावलले स्थानीयले स्वागत गर्दा मास्कसमेत निकालेर भीडभाडमा बसे । सोमबार कालिकोट पुगेका मुख्यमन्त्री शाही र मन्त्री रावलले बजारमा ठूलो भीड जम्मा पारेर स्थानीयको स्वागत स्वीकार गरेका छन् ।

सरकारले लकडाउनका बेला अत्यावश्यक काम भए २५ जनाभन्दा बढी भेला हुन नपाइने र सामाजिक दूरी कायम राख्ने नियम बनाएको छ । कर्णाली प्रदेश सरकारले त्यसविपरीत अहिले ठाउँठाउँमा जाने र नियमको उल्लंघन आफैँले गरेको भनेर आलोचनासमेत भएको छ ।

कांग्रेसको विरोध

कर्णाली प्रदेश सरकारका मुख्यमन्त्री शाही, सामाजिक विकासमन्त्री रावललगायतको टोलीले कोरोना भाइरसको रोकथाम तथा नियन्त्रणका लागि गरेको तयारीबारे अनुगमन गर्न हेलिकाेप्टरबाट जुम्ला, हुम्ला र कालिकोटको अनुगमन गरेपछि प्रतिपक्षी दल नेपाली कांग्रेसले विरोध गरेको छ ।

कोरोना भाइरस नियन्त्रणका लागि फोन वा निर्देशनमार्फत गर्न सकिने काम राज्यको करौडो ढुकुटी सक्ने गरेर हेलिकाेप्टरमार्फत अनुगमन गरेपछि नेपाली कांग्रेस विरोध गरेको हो ।

नेपाली कांग्रेसका महामन्त्री तथा पूर्वगृहमन्त्री पूर्णबहादुर खड्काले कर्णाली प्रदेश सरकारले सामान्य फोन वा अन्य निर्देशनात्माक काम पनि सरकारले सामान्य काम पनि हेलिकाेप्टर प्रयोग भएको भए दुर्भाग्य भएको बताए । ‘यदि त्यसो हो भने यो दुर्भाग्यपूर्ण घटना हो ।’ उनले भने, ‘फोन बाटै अनुगमन गरे भइहाल्छ नि ?’

आइतबार बिहान जुम्लाका लागि गएको मुख्यमन्त्री, सामाजिक विकासमन्त्री रावल, कर्णाली प्रदेश सरकारका प्रमुख सचिव टेकनारायण पाण्डे, प्रदेश स्वास्थ्य निर्देशनालयका निर्देशक रीता भण्डारी (जोशी) हेलिकाेप्टरमा जुम्ला पुगेका थिए । जुम्लाका पुगेको टोलीले आइतबार नै सामाजिक विकासमन्त्री रावल जुम्ला पुगेका थिए ।