सेनाको हेलिकाेप्टर लिएर सशस्त्र प्रहरी कालापानी जाँदै

A+ A A-

दार्चुलाको कालापानी सीमाक्षेत्रमा सशस्त्र प्रहरीको टोली जाने भएको छ । दार्चुलाको व्यास गाउँपालिका– १, छाङ्गरुमा सशस्त्रको आउट बोर्डर पोस्ट (बीओपी) राख्ने गरेर सशस्त्र प्रहरीको टोली बुधबारसम्ममा कालापानी सीमा सुरक्षाका लागि जान लागेको हो ।

भारतले उत्तराखण्ड पिथौरागढ जिल्लाको गर्वाधारहुँदै चीनको मानसरोवर जाने सडकको उद्घाटन गरेपछि सशस्त्रको आउट बोर्डर पोस्ट तत्काल सीमाक्षेत्रतर्फ जान लागेको सशस्त्र प्रहरी बल मुख्यालयले जनाएको छ ।

देशको सीमा सुरक्षाको जिम्मा सरकारले हाल सशस्त्र प्रहरी बललाई दिएको छ । भारतले नेपालको सीमा कालापानी क्षेत्रबाट समेत बाटो लिएपछि नेपाल सरकारले उक्त सडकखण्डको विरोध गरेको छ ।

भारतका रक्षामन्त्री राजनाथ सिंहले उत्तराखण्ड पिथौरागढ जिल्लाको गर्वाधारहुँदै चीनको मानसरोवर जाने सडकको शुक्रबार उद्घाटन गरेका थिए । शनिबार विज्ञप्ति जारी गर्दै नेपाली भूमि मिचेर सडक बनाएकाेमा विराेध गरेको हो ।

कालापानी भौगोलिक हिसाबले विकट भएका कारण नेपाली सेनाको हेलिकोप्टरमार्फत बन्दोबस्तीका सामान लिएर सशस्त्र प्रहरीको टोली बुधबारसम्म छाङ्गरु पुग्ने सशस्त्र प्रहरी बल मुख्यालय स्रोतले बताएकाे छ ।

‘सशस्त्र प्रहरीले यसअघि नै बीओपी पोस्ट राख्ने तयारी गरेको थियो । तर, अहिले भारतले सडक नै निर्माण गरेपछि तत्तकालै जानुपर्ने अवस्था आएको हो,’ सशस्त्र प्रहरी स्रोतले भने ।

सशस्त्र प्रहरी बलको ५० नम्बर गुल्म दार्चुलाबाट सुरक्षाकर्मीको टोली कालापानी क्षेत्र जान लागेको हो । सशस्त्र प्रहरी निरीक्षकको नेतृत्वमा हरेक बीओपीमा ३५ जना सुरक्षाकर्मीकाे टाेली खटिँदै आएको छ ।

कालापानी सीमा सुरक्षाका लागि पनि प्रहरी निरीक्षकको नेतृत्वमा तत्काल ३५ जना नै पठाउने तयारी भएको सशस्त्र प्रहरी बल ५० नम्बर गुल्म दार्चुलाका प्रमुख सशस्त्र प्रहरी बलका डीएसपी डम्बरबहादुर विष्टले बताए ।

‘सशस्त्र प्रहरी बल मुख्यालयबाट कालापानी सीमा सुरक्षा खटिने सुरक्षाकर्मीलाई तयारी अवस्थामा रहन निर्देशन भएको छ । हामी त्यहीअनुसारको तयारीमा छौँ,’ डीएसपी विष्टले भने ।

कालापानी सुरक्षामा खटिने सुरक्षाकर्मीका लागि ६ महिनासम्म पुग्ने गरेर नेपाली सेनाको हेलिकोप्टरमार्फत हातहतियार, गोलीगट्ठा र बन्दोबस्तीका सामानलगायत राशन र मेडिकल सामग्रीहरूका लिने जनाइएको छ ।

छाङ्गरुमा बीओपी राख्न स्थानीयले जमिनसमेत उपलब्ध गराइसकेका छन् । भारतसँग सीमा जोडिएका १ सय २१ ठाउँमा सशस्त्र प्रहरीको बीओपी राखिएको छ ।

चीनसँग जोडिएको सीमामा समेत बीओपी राख्ने तयारी सशस्त्रको यसअघि नै थियो । सशस्त्र प्रहरीको बीओपीले सीमानाकामा हुने गतिविधिलाई निगरानी गर्ने र कुनै स्तम्भ हरायो, भत्कियो भने त्यसबारे प्रहरी प्रधान कार्यालयहुँदै गृह मन्त्रालयलाई जानकारी गराउँदै आएको छ ।