कर्णालीमा ३३ अर्बकाे बजेट : स्वास्थ्य, शिक्षा र राेजगारी प्राथमिकतामा

A+ A A-

कर्णाली प्रदेश सरकारले आगामी वर्षको बजेटमा स्वास्थ्य, शिक्षा र रोजगारीलाई प्राथमिकतामा राखेर बजेट बनाउने भएको छ ।

महत्वाकांक्षी बजेट ल्याएर कार्यान्वयन गर्न नसकेको भन्दै आलोचना खेप्दै आएको कर्णाली प्रदेश सरकारले आगामी वर्ष कार्यान्वयन गर्न सकिने गरी बजेट ल्याउन लागेको कर्णाली सरकारका आर्थिक मामिला तथा योजनामन्त्री प्रकाश ज्वालाले जानकारी दिए ।

शनिबार कर्णाली फाउण्डेसनको अग्रसरतामा भएको कर्णाली संवादमा सहभागी मन्त्री ज्वालाले कोरोना महामारीको जोखिम न्यूनीकरण गर्न स्वास्थ्य, शिक्षा र रोजगारीलाई प्राथमिकता दिएर बजेट बनाइने स्पष्ट पारे ।

‘सरकारको प्राथमिता पहिलो स्वास्थ्य र शिक्षा नै हुन्छ’, मन्त्री ज्वालाले भने, ‘यी प्राथमिकतामा पनि रोजगारी सिर्जना गर्ने गरी बजेट बनाउने तयारी गरेका छौ ।’

त्यसका लागि सरकारले पूर्वाधार निर्माण र उत्पादनमा विशेष ध्यान दिने उनले बताए । कर्णाली समृद्धिका लागि राज्यले लिएको तीन खम्बे अर्थ नीतिअनुसार सबै क्षेत्रसँग सहकार्य गर्न सरकार तयार रहेको उनको भनाइ छ ।

कर्णाली सरकारले वितरणमुखी नभई भन्दा पनि प्रतिफल देखिने गरी योजना बनाउन लागेको उनको दाबी छ ।

कार्यक्रममा कर्णाली प्रदेश योजना आयोगका उपाध्यक्ष डा. पुण्यप्रसाद रेग्मीले गरिबी न्यूनीकरण र प्रतिव्यक्ति आय बढाउने गरी बनाइएको पञ्चवर्षीय योजनाका आधारमा बजेट निर्माण गर्न सके समृद्धिमा महत्त्वपूर्ण हुने बताए ।

‘कर्णालीको विकासका लागि स्थानीय स्रोत पहिचान र परिचालनमा जोड दिने योजना बनाएका छौ,’ उनले भने ।

अर्थविद् डा. अच्युत वाग्लेले कर्णाली प्रदेश विकासका लागि राजनीतिक इच्छाशक्ति जरुरी हुने बताए । प्रदेश सरकारले आफ्नो अधिकार प्रयोगका लागि संघीय सरकारमाथि दबाब सिर्जना गर्नुपर्ने उनले बताए ।

‘प्रदेश सरकारहरू संघीय सरकारको हुलाकीजस्तो बनाइयो, त्यसैले पनि सरकारहरूले आफ्नो योजना कार्यान्वयन गर्न सकिरहेका छैनन्’, उनले भने ।

उद्योग वाणिज्य महासंघ कर्णाली प्रदेशका अध्यक्ष पदमबहादुर शाहीले लकडाउनका कारण समग्र क्षेत्र प्रभावित भएको भन्दै महामारी र त्यसपछिको अवस्थासँग जुध्न सक्ने गरी बजेट ल्याउनु पर्नेमा जोड दिए ।

कर्णाली फाउण्डेसनका अध्यक्ष नारायण भट्टराईले प्रदेश सरकारले ल्याउने आगामी वर्षको बजेट रोजगारी सिर्जना गर्ने खालको हुनुपर्ने बताए ।

३३ अर्बको बजेट ल्याउने तयारी

कर्णाली प्रदेश सरकारले आगामी आर्थिक वर्षका लागि ३३ अर्बभन्दा बढीको बजेट ल्याउने तयारी गरेको जनाएको छ । चालु आर्थिक वर्षको सञ्चित कोषमा जम्मा हुनसक्ने रकमलाई समेत अनुमान गरी झण्डै ३३ अर्बको बजेट ल्याउने तयारी गरेको कर्णाली सरकारका आर्थिक मामिला तथा योजनामन्त्री प्रकाश ज्वालाले बताए । यो बजेट सरकारले चालु आर्थिक वर्षमा ल्याएको बजेटभन्दा झण्डै एक अर्ब कम हो ।

चालु आर्थिक वर्षको बजेट ३४ अर्ब ३५ करोड ३४ लाख २५ हजार रुपैयाँको छ । तर, आर्थिक वर्ष सकिन दुई महिना मात्र बाँकी हुँदा विकास बजेट खर्च निराशाजनक छ ।

प्रकाशित मिति: आइतबार, वैशाख २८, २०७७ १५:५३