हेटौँडामा सेनिटाइज मेसिन प्रयोगमा रोक, हतार गर्दा खर्च मात्रै

फोटो : हेटौंडा–१५ रातोमाटेमा हेटौंडा उपमहानगरपालिकाले राखेको अटोमेटिक सेनिटाइज मेसिनको उद्घाटन गर्दै मुख्यमन्त्री डोरमणि पौडेल । उद्घाटन गरेको केही दिनमै यस मेसिन प्रयोगमा रोक लगाइएको थयो ।

A+ A A-

कोरोना संक्रमणको जोखिमबाट बच्न बागमती प्रदेशको मुकाम हेटौँडामा राखिएका डिस्इन्फेक्टेन्ट सेनिटाइज मेसिन प्रयोगमा रोक लगाइएको छ ।

स्वास्थ्य मन्त्रालयको निर्देशनअनुसार यहाँ निर्मित सेनिटाइन मेसिन प्रयोगमा नआउँदै बन्द गरिएको छ । मानव स्वास्थ्यको लागि हानिकारक र कोरोना संक्रमणबाट बच्न उपयोगी नहुने चिकित्सकको सुझावपछि मेसिन बन्द गरिएको छ ।

हेटौँडा उपमहानगरपालिका कार्यालयले भारत र तराईका जिल्लाबाट हेटौंडा छिर्ने मुख्य नाका हेटौँडा–१५ चुरियामाईस्थित रातोमाटे र कार्यालय परिसरमा अटोमेटिक सेनिटाइज मेसिन जडान गरेको थियो । दुईवटा मेसिन जडान गर्दा ३ लाख २० हजार रुपैयाँ खर्च भएको कार्यालयले जनाएको छ ।

कोरोना भाइरस (कोभिड–१९) को संक्रमण बढिरहेको समयमा विशेषगरी भारतबाट सामान लिएर आउने चालक, सहचालकलाई लक्षित गरेर हेटौँडाको चुरियामाईमा हेटौंडा उपमहानगरपालिकाले सेनिटाइज मेसिन राखेको हो ।

जिल्ला प्रहरी कार्यालय मकवानपुर र हेटौंडा अस्पतालमा सेनिटाइज मेसिन राखिएको छ । हाल दुवै मेसिन प्रयोगमा छैनन् । जिल्ला प्रहरी कार्यालयमा राखिएको सेनिटाइज मेसिन उद्घाटनकै दिनदेखि प्रयोगमा नल्याइएको प्रहरी प्रवक्ता सुजन पाठकले बताए । यो मेसिन निजी संस्थाले राखिदिएको हो ।

कार्यालयले प्रदेश स्वास्थ्य निर्देशनालय तथा चिकित्सकहरुसँग परामर्श नगरी हतारमा मेसिन जडान गर्दा खर्च मात्रै भएको छ । हेटौंडामा सेनिटाइज जडान गर्न अघि प्रदेश स्वास्थ्य निर्देशनालयसँग कुनै परामर्श नगरिएको निर्देशनालयका निर्देशक रमेश अधिकारीले बताए ।

उक्त मेसिनको बागमती प्रदेशका मुख्यमन्त्री डोरमणि पौडेलले उद्घाटन गरेका थिए । उद्घाटन समारोहमा बोल्दै प्रदेशका अन्य क्षेत्रमा पनि मेसिन जडान गर्ने घोषणा मुख्यमन्त्रीले गरेका थिए । तर, सम्बन्धित स्वास्थ्य कार्यालय र चिकित्सकहरुसँग परामर्श नगरी मुख्यमन्त्रीले यस्तो घोषण गरेको भन्दै आलोचन भएको छ ।

प्रदेशको सामाजिक विकास मन्त्रालयका सूचना अधिकारी तथा चिकित्सा विभागका प्रमुख डा. पुरुषोत्तम सेढाईंले सेनिटाइज मेसिन मानव स्वास्थ्यको लागि हानिकारक भएको बताए । उनले मेसिनबाट क्लोरिन मिसाइएको पानी छर्किएको जानकारी प्राप्त भएको भन्दै यसले मानव स्वास्थ्यमा असर पुर्‍याउने बताए ।

प्रदेश स्वास्थ्य निर्देशनालयका निर्देशक अधिकारीले क्लोरिन छर्कदा मानव स्वास्थ्यमा असर गर्ने बताए । ‘क्लोरिन मिसाइएको पानी जिवित वस्तुमा छर्कने होइन । निर्जिव वस्तुमा छर्कने हो’ अधिकारीले भने ।

प्रकाशित मिति: शनिबार, वैशाख २७, २०७७ १६:५०