हेटौंडाको कोरोना प्रयोगशालालाई ४ सय पीसीआर किट प्राप्त, परीक्षण सुरु

A+ A A-

हेटौँडास्थित कोरोना परीक्षण प्रयोगशालालाई परीक्षण किट प्राप्त भएको छ ।

संघीय सरकारले बागमती सरकारलाई उपलब्ध गराएको पीसीआर किट सकिएपछि बिहीवारदेखि प्रयोगशालामा पीसीआरबाट कोरोना परीक्षण रोकिएको थियो । राष्ट्रिय जनस्वास्थ्य प्रयोगशाला टेकुले हेटौँडास्थित किटजन्य रोक अनुसन्धान केन्द्रमा रहेको कोरोना परीक्षण प्रयोशालालाई पीसीआर किट पठाएपछि पुनः परीक्षण सुरु गरिएको हो ।

शुक्रबार साँझ पीसीआर किट हेटौँडा आइपुगेको प्रदेशको सामाजिक विकास मन्त्रालयका सूचना अधिकारी तथा चिकित्सा विभागका प्रमुख डा. पुरुषोत्तम सेढाईंले शिलापत्रलाई जानकारी दिए । ‘पीसीआर किट सकिएपछि परीक्षण रोकियो । यस विषयमा सरकारलाई जानकारी गराएपछि शुक्रबार साँझ किट प्राप्त भएको छ’ उनले भने ।

प्रयोगशालामा शुक्रबार कोरोना परीक्षणको लागि कुनै स्वाब प्राप्त नभएको सूचना अधिकारी सेढाईंले जानकारी दिए । प्रदेशमा हालसम्म ९ हजार १ सय ५ वटा आरडीटीबाट परीक्षण गरिएकोमा २० जनामा पोजेटिभ देखिएको छ । शुक्रबार आरडीटीबाट ६१ वटा परीक्षण भएकोमा सबैको नेगेटिभ देखाएको डा. सेढाईंले जानकारी दिए ।

हालसम्म हेटौंडामा ४ सय ६५ जनाको पीसीआर परीक्षण भएको छ । हेटौंडा–१० स्थित किटजन्य रोग अनुसन्धान तथा तालिम केन्द्रको पीसीआर मेसिनमा परीक्षण गरिएका मध्ये हालसम्म चार जनामा कोरोना पुष्टि भएको छ ।

हेटौंडामा चैत २७ बाट मकवानपुर, सिन्धुली, बारा, पर्सा र रौतहटबाट स्वाब संकलन गरेर कोरोना परीक्षण गरिँदै आएको छ । बागमती प्रदेशमा चितवन, धुलिखेल, टेकु र वीर अस्पतालमा पनि कोरोना परीक्षणको व्यवस्था मिलाइएको छ । नेपालमा हालसम्म १०९ जनामा कोरोना संक्रमण देखिएकोमा बागमती प्रदेशका ७ जनामा मात्रै संक्रमण देखिएको छ ।

प्रकाशित मिति: शनिबार, वैशाख २७, २०७७ १३:२६