कोरोना भाइरसमा १९८ पटक परिवर्तन, खतरनाक हुँदै गएको हो ?

A+ A A-

अमेरिका र बेलायतका शोधकर्ताले नोवेल कोरोना भाइरसमा सयौँ परिवर्तनहरू देखिइसकेको बताएका छन् । तर, अहिलेसम्मको शाेधमा यसबाट संक्रमणमा के असर पर्छ र भाइरसविरुद्धको खोप कति प्रभावकारी हुन्छ भन्नेबारेमा भने केही पत्ता लागेको छैन ।

भाइरसमा परिवर्तन आउनु सामान्य कुरा हो । तर, सबैभन्दा महत्त्वपूर्ण कुरा भनेको यिनीहरूमा कुन परिवर्तनको असर संक्रमणको गम्भीरता र रफ्तारमा कति पर्छ भन्ने हो ।

अमेरिकामा भएको एक अनुसन्धानमा कोरोना भाइरसमा एक खास परिवर्तन–डी६२४जी बढी हावी भइरहेको छ । याे हुँदा कोरोना भाइरस अधिक संक्रामक हुन सक्छ ।

यद्यपि यो अनुसन्धानको प्रतिवेदन अहिलेसम्म औपचारिक रूपमा प्रकाशित भएको छैन भने अन्य वैज्ञानिकले समीक्षा पनि गरिसकेका छैनन् ।

न्यु मेक्सिकोस्थित लस ऐलेमस नेसनल ल्याबका शोधकर्ताले यसको आकार बदल्ने कोरोना भाइरसमा भइरहेको परिवर्तनलाई ट्रयाक गर्ने कोसिस गरिरहेका छन् ।

यो अनुसन्धान ग्लोबल इनिसिएटिभ अन सेयरिङ अन इन्फ्लुएन्जा डेटा (जीआईएसएडी) को डाटाबेसका आधारमा गरिरहेको छ । वैज्ञानिकले यो खास परिवर्तन (डी६१४जी) का कारण भाइरस तीव्र रूपमा बढ्छ । तर, यसको नतिजा के हुन्छ भन्ने अहिलेसम्म स्पष्ट भइसकेको छैन ।

कोरोना संक्रमित बिरामीबाट संकलन गरिएको तथ्यांकको विश्लेषण शेफिल्डमा बेलायती शोधकर्ताले समेत गरेका छन् । उनीहरूले यसको अध्ययनबाट कोरोना भाइरसका संक्रमितको संख्या बढी भएको पत्ता लगाएका छन् । तर यसबाट संक्रमितको अवस्था झनै गम्भीर भएको भने कुनै सबुद प्राप्त भएन । युनिभर्सिटी कलेज लण्डनमा भएको एक अध्ययनले कोरोना भाइरसमा भइरहेको १९८ परिवर्तन पत्ता लगाएको छ ।

यो सोधमा सामेल प्राध्यापक फ्रांस्वा बेलुले भने, ‘भाइरसमा परिवर्तन आउनु आफैँमा नराम्रो कुरा होइन । तर, सामान्यबाट तीव्र गतिमा परिवर्तन भइरहेको प्रमाण भने हामीले पत्ता लगाइसकेका छैनौँ । अहिलेसम्म सार्स कोभ–२ ज्यादा घातक र संक्रामक भइरहेको छ भनेर चाहिँ भन्न सक्दैनौँ ।’