मलेसिया र कुवेतबाट साढे १५ हजार नेपाली तत्काल स्वदेश फर्कन सरकारकाे बाटाे हेर्दै

मलेसिया र कुवेतबाट साढे १५ हजार नेपाली तत्काल स्वदेश फर्कन सरकारकाे बाटाे हेर्दै

A+ A A-

कोरोना भाइरसका कारण वैदेशिक रोजगारीमा कार्यरत करिब ४ लाख नेपाली कामदार स्वदेश फर्काउनुपर्ने वैदेशिक रोजगार प्रवर्द्धन बोर्डले जनाएको छ । उनीहरूलाई तत्काल स्वदेश फर्काउने वातावरण मिलाउनुपर्ने अवस्था रहेको बोर्डले जनाएको छ ।

कोरोना भाइरस नियन्त्रण गर्न गरिएको लकडाउनको समय बढाएसँगै मलेसिया सरकारले अवैध रूपमा बसेर काम गर्दै आएका आप्रवासी श्रमिकमाथि धरपकड सुरू गरेको छ ।

२ साताअघि मलेसिया सरकारले अवैध विदेशी कामदार बसोबास गर्दै आएको शहरमा ठूलो संख्यामा प्रहरी परिचालन गरेर धरपकड गरेको थियो । उक्त धरपकडमा करिब १ हजार ३ सय विदेशी कामदार पक्राउ परेको मलेसियाका सञ्चारमाध्यमले जनाएका थिए । धरपकडमा कुनकुन देशका कामदार पक्राउ परे भन्ने खुलाइएको छैन ।

मलेसिया सरकारले लकडाउनको समयमा विदेशी कामदारमाथि गरिएको धरपकडको चर्को विरोध भएपछि रोकिएको थियो । मलेसिया र कुवेत सरकारले लकडाउनका बेला अवैध रूपमा काम गर्दै आएका विदेशी कामदार लेखट्ने नीति लिएका छन् । नेपाली कामदारहरू श्रम अवधि सकिए पनि स्वदेश नफर्की रोजगारदाता देशमै लुकेर काम गर्दै आएका छन् ।

कुवेतमा ३ हजार ६ सय

कुवेत सरकारले अवैध विदेशी कामदारलाई कोरोना भाइरस नियन्त्रण गर्ने गरिएको लकडाउनबीच आममाफी प्रक्रियामा जबर्जस्ती सहभागी गराएको थियो । हाल आममाफी प्रक्रियामा सहभागी भएका ३ हजार ६ नेपाली स्वदेश फर्कन बाटाे हेरिरहेकाे कुवेतस्थित नेपाली दूतावासले जनाएको छ । कुवेत सरकारले आममाफीमा सहभागी हुनेलाई आफ्नै खर्चमा सम्बन्धित देशसम्म जाने व्यवस्था मिलाउने जनाएको छ ।

२६ अप्रिलदेखि ३० सम्मको अवधिमा सहभागी भएका नेपालसहित, भारत, बंगलादेश, फिलिपिन्सलगायत देशका नागरिकलाई अहिले कुवेतले आफ्नै खर्चमा राखेको छ । जसमा ३ हजार ६ सय नेपाली तत्काल स्वदेश फर्कन प्रतीक्षारत रहेको दूतावासले जनाएको छ ।

कुवेतमा करिब ७० हजार नेपाली रोजगारीमा कार्यरत रहेको दूतावासको अनुमान छ । कुवेतमा १० हजारभन्दा धेरै नेपाली कामदार श्रम अवधि सकिए पनि अवैध बनेर रोजगारदाता कम्पनीमा शरण लिएर काम गर्दै आएको दूतावासको अनुमान छ ।

कुवेत–भारतहुँदै कुवेत गएका धेरै घरेलु महिला कामदार अवैध रूपमा उतै काम गरिरहेका छन् । कुवेत र नेपाल सरकारबीच सरकारीस्तरमा श्रम सम्झौता नभए पनि कामदार आपूर्ति भइरहेको छ ।

मलेसियामा १२ हजार

कुवेतपछि मलेसियाले पनि लकडाउनकै समयमा आममाफीको प्रक्रिया सुरू गरेको छ । अवैध रूपमा बसेर काम गरिरहेका विदेशी कामदारका हकमा मलेसियाले १४ दिने सूचना निकालेर आममाफीको प्रक्रियामा सहभागी हुन आग्रह गरिसकेको छ ।

मलेसिया सरकारले अवैधानिक रूपमा बसिरहेका विदेशी कामदारलाई आममाफीको घोषणा गत वर्षसमेत गरेको थियो । उक्त आममाफी १० अगस्टदेखि ३१ डिसेम्बरसम्मकाे समयावधि तोकिएको थियो ।

उक्त आममाफी प्रक्रियामा करिब १५ हजार नेपाली सहभागी भएको मलेसियास्थित नेपाली दूतावासले जनाएको छ । दूतावासका अनुसार गत वर्ष आममाफी प्रक्रियामा समभागी भएका करिब ७ हजार कामदार स्वदेश फर्कन पाएका छैनन् । उनीहरू ट्राभल डकुमेन्ट तयारी भए पनि लकडाउनका कारण स्वदेश फर्कन नपाएको दूतावासले जनाएको छ ।

हाल मलेसियास्थित रोजगारदाता कम्पनीबाट घरबिदा पाएका करिब ५ हजार कामदार स्वदेश फर्कन बाटो कुरिरहेको दूतावासले जनाएको छ । मलेसियाबाट तत्काल १२ हजारभन्दा धेरै नेपाली स्वदेश फर्काउनुपर्ने अवस्था रहेको दूतावासका एक कर्मचारीले जानकारी दिए । ती कर्मचारीले भने, तत्काल १२ हजार कामदारको ट्राभल डकुमेन्ट बनाउनुपर्ने अवस्था छ । करिब ५ हजारको चाहिँ ट्राभल डकुमेन्ट तयारी अवस्थामा छ ।

मलेसियामा करिब ५ लाख नेपाली कामदार कार्यरत रहेको दूतावासको अनुमान छ, जसमा १ लाख २० हजारभन्दा धेरै अवैध रूपमा बसेर काम गरिरहेको दूतावासले जनाएको छ । मलेसियामा करिब ३ सय नेपाली विभिन्न अभियोगमा जेलमा रहेको दूतावासले जनाएको छ ।

नेपाल सरकारले भने विदेशमा रहेका नेपाली कामदार तत्काल फर्काउने नीति अझै अख्तियार गरेको छैन । विदेशमा रहेका कामदार फर्काउनुपर्ने परिस्थति आए फर्काउन सकिने परराष्ट्र मन्त्रालयले जनाएको छ ।

प्रकाशित मिति: शुक्रबार, वैशाख २६, २०७७ १६:२३