कर्णाली सरकारद्वारा नीति तथा कार्यक्रमका लागि सुझाव संकलन

A+ A A-

आर्थिक वर्ष २०७७/०७८ को वार्षिक नीति तथा कार्यक्रमका लागि कर्णाली प्रदेश सरकारले साताव्यापी सुझाव संकलन कार्यक्रम सम्पन्न गरेको छ । सरकारले नीति तथा कार्यक्रममा लागि सबै समुदायको सहभागिता होस् भनेर सुझाव संकलनकाे थालनी गरेको थियो ।

गत १८ वैशाखदेखि २५ वैशाखसम्म नीति तथा कार्यक्रमका लागि समुदायस्तरमा सुझाव संकलन गरिएको मुख्यमन्त्री तथा मन्त्रिपरिषद्को कार्यालय कर्णाली प्रदेशले जनाएको छ ।

नीति तथा कार्यक्रममा समावेश गर्नुपर्ने विषयका सम्बन्धमा सुझाव दिन सबैलाई आग्रह गरिए र अहिले सुझाव संकलनको काम सकिएको मुख्यमन्त्री तथा मन्त्रिपरिषद्को कार्यालयका प्रवक्ता केशवप्रसाद उपाध्यायले बताए ।

‘हामीले प्रदेश सरकारको नीति तथा कार्यक्रममा अधिकतम समुदायको माग सम्बोधन गर्न सकियोस् भनेर सुझाव संकलन सुरु गरेका हौँ,’ उनले भने, ‘अहिले सुझाव संकलनकाे काम सकिएको छ ।’

कस्ता आए सुझाव ?

नागरिक स्तरबाट मागिएका सुझावमा कृषिक्षेत्र, पर्यटन, विकास निर्माण र अन्य धेरै क्षेत्रबाट सुझाव संकलन भएको कर्णाली प्रदेश योजना, अनुगमन तथा आर्थिक पूर्वाधार शाखाकी अधिकृत कल्पना अर्यालले बताइन् । ‘अधिकतम सुझावहरू कृषिक्षेत्रबाट आएका छन्,’ उनले भनि, ‘अन्य क्षेत्र सरकारका नीति तथा कार्यक्रममा समेटिनेछन् ।’

नीति तथा कार्यक्रमका लागि मन्त्रालयमा ९ वटा व्यक्तिगत तथा समूहगत सुझाव आएको र तीमध्ये कृषि, पर्यटन, स्वरोजगार, ऊर्जा, वन, भाषा तथा संस्कृति, निजी तथा सरकारी साझेदारीका कामलगायत क्षेत्रका विषयमा सुझाव आएको कर्णाली योजना, अनुगमन तथा आर्थिक पूर्वाधार शाखाकी अधिकृत अर्यालले बताइन् ।

प्रकाशित मिति: शुक्रबार, वैशाख २६, २०७७ १५:१४