सांसदलाई पुग्यो कोरोना किट, जनताले अझै पाएनन्

A+ A A-

नेपालमा कोरोना भाइरस (कोभिड–१९) बाट संक्रमितको संख्या १ सय १ पुगेको छ । यो क्रम बढ्दो छ । सरकार कोरोना परीक्षणको दर बढाउनुको साटो झन् ढिलाइ गरिरहेको छ । कोरोना परीक्षणको किटको अभावका कारण सरकारले परीक्षणमा ढिलाइ गरेको हो ।

किट अभावमा प्रभावित क्षेत्रका जनताको परीक्षण हुन नसकेपनि सरकारले संघीय संसदका सदस्य र कर्मचारीका लागि भने दिनदिनै परीक्षण गरिरहेकाे छ।

सडकमा खटिएका सुरक्षाकर्मी र स्वास्थ्यकर्मीले समेत परीक्षण गर्न नपाइरहेका वेला नेपाली सेनाले ल्याउने भनेको किट आउन भने अझे एकसाता कुर्नुपर्ने भएको छ ।

सुदूरपश्चिम प्रदेशको सेती अस्पतालमा हाल कोरोना परीक्षण किट सकिएको अस्पतालले जनाएको छ । यसरी नै देशभरका कोरोना परीक्षण गरिने अस्पतालमा किटको अभाव छ । किट अभावकै कारणले गर्दा अहिले कोरोना परीक्षणका लागि नमुना संकलन गरिए पनि परीक्षणमा भने ढिलाइ भएको विभिन्न अस्पताल सूत्रले जनाएका छन् ।

यसको पछिल्लो उदाहरण नेपालगञ्जमा देखिएको कोरोना संक्रमितको ट्राभल रेकर्ड हेरेर परीक्षण हुन नसक्नु हो ।

हाल नेपालगञ्जमा मात्र २३ जनामा कोरोना पोजिटिभ देखिएको छ । भेरी अस्पतालका प्रमुख डा. प्रकाश थापाका अनुसार केही मात्रामा कोरोना परीक्षण किट भए पनि पर्याप्त मात्रामा नभएको स्वीकार गर्छन् ।

‘हामीसँग पर्याप्त मात्रामा चाहिँ छैनन् । आज शुक्रबार केहीको परीक्षणपछि पीसीआर परीक्षण किट नै सकिन्छ । केन्द्रबाट २ बजेसम्म पठाउने भन्ने कुरा छ,’ थापाले भने ।

हालसम्म सरकारले १४ हजार ५ सय ११ जनाको पीसीआर प्रविधिबाट कोरोना परीक्षण गरेको छ । यसरी नै आरडीटी परीक्षणबाट ५४ हजार ९३ जनाको कोरोना परीक्षण भएको स्वास्थ्य मन्त्रालयले जनाएको छ ।

आरडीटी परीक्षण भने विश्वासिलो नभएको चिकित्सकहरू नै बताउँछन् । स्वास्थ्य मन्त्रालयको तथ्यांकअनुसार १७ हजार ३ सय ७२ जना क्वारेन्टाइन र १ सय ३३ जनालाई आइसोलेसन वार्डमा राखिएको जनाएको छ । उनीहरूको कोरोना परीक्षण हुनै बाँकी छ । कोरोना परीक्षण स्वास्थ्य सामग्री खरिदका लागि सरकारले नेपाली सेनालाई जिम्मा दिएको छ ।

सेनाले स्वास्थ्य सामग्री खरिद गर्ने जिम्मा पाएको करिब २ महिनासम्म पनि स्वास्थ्य सामग्री उपलब्ध गराउने सकेको छैन । सेनाले चीनबाट २ अर्ब २५ करोडभन्दा बढी र भारतबाट १ करोड ५० लाखको स्वास्थ्य सामग्री ल्याउने सम्झौता गरिसकेको छ । तर, सेनाले सम्झौता भएको १ महिना पुग्न लाग्दा पनि स्वास्थ्य सामग्री ल्याउन सकेको छैन ।

सेनाले चिनियाँ कम्पनी सिनोफार्म इन्टरनेसनलसँग र भारतको बीपीपी कम्पनीसँग स्वास्थ्य सामग्री खरिदकाे सम्झौता गरेको हो ।

चीनबाट ल्याउने भनिएको मेडिकल सामग्रीको ढुवानी जिम्मा फ्ल्यास फ्रेट लजिस्टिकले पाएको छ । चीनबाट ३ सय ४२ टन स्वास्थ्य सामग्री ल्याउने नेपाली सेनाका प्रवक्ता सहायक रथी विज्ञानदेव पाण्डेको भनाइ छ । यसमध्ये २ ट्रिप वाइड बडी जहाजमार्फत र बाँकी स्थलमार्ग हुँदै ल्याइने पाण्डेले बताए ।

किन ढिलो भयाे सेनाले ल्याउने स्वास्थ्य सामग्री ?

नेपाली सेनाले चीनबाट ल्याउने भनिएको मेडिकल सामग्री २३ वैशाखमा आउने बताएको थियो । चीनको ग्वान्जाओबाट ल्याउने भनिएको उक्त सामग्री १ मेदेखि ५ सम्ममा विश्व श्रमिक दिवस परेका कारण चीन बन्द भएकाले ढिलाइ भएको ढुवानीकर्ता कम्पनी फ्ल्यास फ्रेट लाजिस्टिकले जनाएको छ ।

‘हामीले २३ वैशाखमै चार्टर्ड जहाजमार्फत मेडिकल सामग्री ल्याउने तयारी गरेका थियौँ । चीनमा बिदा परेका कारण ढिलो भयो । सामग्री ग्वाञ्जाओ अझै पुगेको छैन । अझै मेडिकल सामग्री पुग्न १ साता लाग्छ । हामीले १६ मेका लागि तयारी गरेका छौँ,’ फ्ल्यास फ्रेट लजिस्टिकल स्रोतले भन्याे । १६ मे आउन अझै ८ दिन बाँकी छ ।

उता सैनिक स्रोतले समेत मेडिकल सामग्री खरिदमा एकलौटी जिम्मा नेपाली सेनालाई नहुँदा खरिद प्रक्रिया नै ढिलाइ भएको जनाएको छ ।

‘मेडिकल सामग्री एक्लै सेनाले मात्र चाहेर आउने होइन, स्वास्थ्य सामग्रीको सूची बनाउनेदेखि हरेक काममा कोभिड–१९ विपद व्यवस्थापन केन्द्र (सीसीएमसी) को पनि भूमिका छ । त्यसरी नै रक्षा, अर्थ र परराष्ट्र मन्त्रालयसँग समेत खरिदबारे समन्वय गर्नुपर्छ । त्यस कारण केही ढिलो भएकै हो,’ सैनिक स्रोतले भन्याे ।

उपप्रधान एवं रक्षामन्त्री ईश्वर पोखरेलकाे संयोजकत्वमा कोभिड–१९ विपद व्यवस्थापन केन्द्र (सीसीएमसी) गठन भएको छ । सेनाले चीन र भारतबाट १ सय २० प्रकारका मेडिकल सामग्री ल्याउँदै छ । जसमध्ये चीनबाट ६७ प्रकारको र भारतबाट ५३ प्रकारको सामग्री आउनेछ ।

१६ चैतमा सरकारले सेनालाई कोरोना भाइरस (कोभिड–१९) को रोकथामका लागि आवश्यक औषधिदेखि अन्य स्वास्थ्य सामग्री समेत ल्याउने जिम्मा दिएको थियो ।

सहयोग पाएको किटको भरमा परीक्षण

नेपाली सेनाले काेभिड– १९ महामारीकाे राेकथाम तथा नियन्त्रणका लागि आवश्यक मेडिकल सामग्री समयमा खरिद गरी ल्याउन नसक्दा नेपालका विभिन्न अस्पतालमा विभिन्न देशबाट सहयोगस्वरुप प्राप्त भएका किटबाट कोरोना परीक्षण थालिएको छ ।

बिहीबार स्वीट्जरल्याण्डले कोरोना परीक्षणका लागि नेपाल सरकारलाई ३० हजार थान पीसीआर टेस्ट किट सहयोग गरेको थियो । स्वीट्जरल्याण्ड सरकार विकास सहयोग एसडीसीले नेपाल वायु सेवा निगमको वाइड बडी विमानमार्फत ल्याएको मेडिकल सामग्री नेपाल सरकारलाई हस्तान्त्रण गरेको थियाे ।

उक्त मेडिकल सामग्री त्रिभुवन विमानस्थल पुगेर नेपालका लागि स्वीट्जरल्याण्डकी राजदूत एलिजावेथ भोन क्यापलरले स्वास्थ्यमन्त्री भानुभक्त ढकाललाई हस्तान्तरण गरेकी थिइन् । उक्त पीसीआर किट लिएर शुक्रबार नेपाली सेनाको स्काई ट्रकबाट भैरहवा, नेपालगन्ज र धनगढीका लागि पठाइएको स्वास्थ्य मन्त्रालयले जनाएको छ ।

यसअघि समेत सरकारले चीन, भारतलगायत देशले सहयोगस्वरुप दिएका किटले कोरोना परीक्षण गरिँदै आएको छ ।

प्रकाशित मिति: शुक्रबार, वैशाख २६, २०७७ १५:३१