ट्रम्पका पूर्व राष्ट्रिय सुरक्षा सल्लाहकार फ्लिनमाथि लागेको अभियोग फिर्ता

ट्रम्पका पूर्व राष्ट्रिय सुरक्षा सल्लाहकार फ्लिनमाथि लागेको अभियोग फिर्ता

A+ A A-

अमेरिकी राष्ट्रपति डोनाल्ड ट्रम्पका पहिलो राष्ट्रिय सुरक्षा सल्लाहकार माइकल फ्लिनमाथि लागेको अभियोग फिर्ता लिने तयारी भएको छ ।

न्याय मन्त्रालयका अधिकारीहरुले सन् २०१६ को अमेरिकी राष्ट्रपतीय निर्वाचनमा रूसी हस्तक्षेपबारे रोबर्ट मुलरद्वारा गरिएको अनुसन्धानको एउटा पाटो बनेको आफ्नो दलिल फिर्ता गराउन चाहिरहेका छन्।

सो अनुसन्धानमा दोषी ठहर गरिएका राष्ट्रपतिका पूर्व सल्लाहकारहरूमध्ये फ्लिन एक हुन् । उनले एक रूसी कुटनीतिज्ञसँगको सम्वादबारे संघीय जाँच एजेन्सी एफबीआईसँग झूटो बोलेको स्वीकार गरेका थिए । मन्त्रालयले अदालतमा नयाँ सूचनासहित मुद्दाको तथ्य र परिस्थितिका कारण अभियोग फिर्ता लिन लागेको जिकिर गरेको छ।

एफबीआई र फ्लिनबीच सन् २०१७ को प्रश्नोत्तर औचित्यपूर्ण नदेखिएको र त्यसक्रममा वैधानिक अनुसन्धानको आधार नअपनाइएको उनको दाबी छ ।

यसअघि मुख्य अभियोजनकर्ताले कुनै कारण नै नबताएर अचानक अभियोग फिर्ता लिएका थिए । राष्ट्रपति ट्रम्प र उनका सहयोगीले मुद्दाको आलोचना गरिरहेका बेला यो निर्णय आएको हो ।

ट्रम्पले उनी निर्दोष रहेको बताउँदै आएको र उनीविरुद्ध अनुसन्धान रोक्न एफबीआईलाई दबाव दिएको विवरणहरू आएका थिए । मन्त्रालयको निर्णयबारे प्रश्न गर्दा ट्रम्पले भने, ‘उनी निर्दोष थिए। राष्ट्रपतिमाथि आक्रमण प्रयासस्वरूप उनलाई निशाना बनाइएको थियो।’

फ्लिनले न्याय सबैका लागि भन्दै ट्वीट गरेका छन् । उनी सन् २०१६ को राष्ट्रपति निर्वाचनमा ट्रम्पका कट्टर समर्थक थिए । ट्रम्पले उनलाई सुरक्षा सल्लाहकारको जिम्मेवारी दिएका थिए।

तर अवकासप्राप्त सैनिक जनरल फ्लिनले रुसी राजदूतसँगको आफ्नो सम्वादबारे उपराष्ट्रपतिलाई गलत सूचना दिएको घटना प्रकाशमा आएपछि राष्ट्रिय सुरक्षा सल्लाहकारको जिम्मेवारी सम्हालेको २३ दिनमै पद गुमाउनु परेको थियो ।

प्रकाशित मिति: शुक्रबार, वैशाख २६, २०७७ ११:००