कर्णाली प्रदेशमा चालूतर्फ २०, पुँजीगततर्फ १० प्रतिशत मात्र खर्च

A+ A A-

कर्णाली प्रदेश सरकारले चालू आर्थिक वर्षको चैत समान्तसम्म चालूतर्फ २०, पुँजीतर्फ १० प्रतिशत मात्र खर्च गरेको छ । गत वर्ष ३५ प्रतिशतको हाराहारीमा बजेट खर्चिएको कर्णाली प्रदेश सरकारको चालू आर्थिक वर्षमा पनि न्यून खर्च हुने देखिएको छ ।

कर्णाली प्रदेश कोष लेखा नियन्त्रण कार्यालयका अनुसार पुँजीगत बजेटतर्फको जम्मा बजेट २१ अर्ब २९ करोड ३७ लाख ७२ हजारमध्ये हालसम्म २ अर्ब ६ करोड ७१ लाख ६६ हजार रुपैयाँ मात्रै खर्च भएको छ । प्रतिशतमा हेर्दा जम्मा बजेटको हालसम्म १० प्रतिशतको हाराहारीमा खर्च भएको जनाएको छ ।

चालू आर्थिक वर्षको चालूतर्फ जम्मा बजेटको २० दशमलव ४३ प्रतिशत खर्च गरेको छ भने पुँजीगततर्फ जम्मा बजेटको १० प्रतिशत खर्च भएको छ । प्रदेश लेखा नियन्त्रक कार्यालयका अनुसार चालू आर्थिक वर्षमा जम्मा बजेटको १४ प्रतिशत मात्रै खर्च गरेको छ । जम्मा ३४ अर्ब ३५ करोड ३४ लाख २५ हजार बजेटमध्ये हालसम्म ४ अर्ब ७३ करोड ५४ लाख ७८ हजार रुपैयाँ खर्च भएको छ ।

मन्त्रालयगत बजेट कार्यान्वयन प्रगति हेर्दा सबैभन्दा बढी आन्तरिक मामिला तथा कानुन मन्त्रालयले खर्च गरेको छ । मन्त्रालयको जम्मा बजेटको झण्डै ४२ प्रतिशत बजेट खर्चेको छ ।

सबैभन्दा बढी बजेट रहेको भौतिक पूर्वाधार विकास मन्त्रालयको पौने ११ अर्ब रुपैयाँ बजेटमध्ये हालसम्म १३ प्रतिशत मात्रै खर्च भएको छ । मुख्यमन्त्री तथा मन्त्रिपरिषद्को कार्यालयले जम्मा २.६७ प्रतिशत, आर्थिक मामिला तथा योजना मन्त्रालयको शुन्य दशमलव ७५, उद्योग, पर्यटन, वन, तथा वातावरण मन्त्रालयले १५ दशमलव १८, भूमि, व्यवस्था, कृषि तथा सहकारी मन्त्रालयले १७ दशमलव ६८, सामाजिक विकास मन्त्रालयले २६ दशमलव ७३ प्रतिशत बजेट मात्रै खर्च गरेका छन् ।

यस्तै, प्रदेश व्यवस्थापिकाको ४५ प्रतिशत, मुख्य न्यायाधिवक्ताको कार्यालयको ३९ प्रतिशत, प्रदेश योजना आयोगको ६० प्रतिशत बजेट खर्च भएको छ । प्रदेश लोकसेवा आयोगका लागि वार्षिक बजेट २ करोड ९७ लाख ६१ हजार रुपैयाँ विनियोजन भएकोमा आयोग गठन गर्न नसकेकाले कुनै पनि रकम खर्च भएको छैन ।

प्रकाशित मिति: बिहीबार, वैशाख २५, २०७७ १४:४४