सरकारका सल्लाहकारले नै उल्लंघन गरे लकडाउनको नियम

A+ A A-

बेलायतमा लकडाउन सिफारिस गर्ने प्राध्यापक नील फर्गुसनले आफैंले सामाजिक दुरीको नियम पालना नगरेको भन्दै पदबाट राजीनामा दिएका छन् । उनी कोरोना नियन्त्रणसम्बन्धी बेलायती सरकारका प्रमुख सल्लाहकार हुन् ।

आफ्नो राजीनामामा उनले भनेका छन्, ‘मैले गल्ती गरेको स्वीकार गर्छु । यसकारण म आफ्नो पदबाट राजीनामा दिँदैछु । कोरोना नियन्त्रणका लागि सामाजिक दुरी कायम गर्नुपर्ने जुन स्पष्ट सन्देश दिइएको छ । मैले त्यसको पालना गर्न सकिनँ ।’

लण्डनको डेली टेलिग्राफ पत्रिकामा छापिएको रिपोर्टमा प्राध्यापक नील फर्गुसनले एक महिलालाई आफ्नो नजिक आउन दिएको र त्यो सामाजिक दुरी कायम गर्ने नियमको उल्लंघन भएको उल्लेख छ ।

उनी सेन्टर फर ग्लोबल इन्फेक्सन डिजिज एजालिसिसका निर्देशक हुन् । यो संस्थाले सरकार र विश्व स्वास्थ्य संगठनलाई अफ्रिकामा इबोलादेखि लिएर हाल रहेको कोरोना भाइरसबारे समेत सल्लाह दिँदै आएको छ ।

यही संस्थाले नै गत जनवरीमा कोरोना भाइरस विश्वव्यापी महामारी बन्न सक्ने बताएको थियो । यही संस्थाले चीनका वुहानमा केही दर्जन संक्रमित हुँदा नै संक्रमितको संख्या त्यो भन्दा बढी रहेको बताएको थियो ।

प्राध्यापक फर्गुसनको टिमले नै आफ्नो अनुसन्धानको आधारमा तत्काल कुनै कदम नचालेमा बेलायतमा कोरोना भाइरसका कारण ५ लाख मानिसको मृत्यु हुनसक्ने चेतावनी दिएको थियो ।

उनकै सल्लाहमा बेलायती प्रधानमन्त्री बोरिस जोनसनले २३ मार्चमा लकडाउन घोषणा गरेका थिए । त्यसबेलादेखि उनी बेलायतमा ‘प्रोफेसर लकडाउन’ भनेर चर्चित भएका थिए ।

यद्यपि उनी पदबाट राजीनामा दिने पहिलो स्वास्थ्य विज्ञ भने होइनन् । उनीभन्दा अघि ६ अप्रिलमा स्कटल्यान्डका प्रमुख मेडिकल अधिकारी डा.क्याथरिन क्यालरउडले लकडाउनका बेला दुई पटक आफ्नो अर्को घरमा गएका कारण पदबाट राजीनामा दिएका थिए ।