व्हाइट हाउस कोरोना भाइरस टास्क फोर्स खारेज गर्ने तयारीमा

A+ A A-

अमेरिकी राष्ट्रपति डोनाल्ड ट्रम्पले कोरोना भाइरसको महामारी नियन्त्रणका लागि भइरहेको प्रयासको समन्वय गरिरहेको ह्वाइट हाउस कोरोना भाइरस टास्क फार्स बन्द गर्ने जानकारी दिएका छन् ।

टास्क फोर्सले आफ्नो जिम्मेवारी कुशलतापूर्वक निभाएको र अब यसमा परिवर्तन गरिने बताएका हुन् ।

पत्रकारले टास्क फोर्स स्थापना गरेर जे गर्न खोजिएको थियो वा त्यसको मिसन पूरा भयो भनेर सोधेको प्रश्नमा ट्रम्पले भने, ‘भएको छैन, पक्कै पनि पूरा भएको छैन । मिसन त्यो बेला पूरा हुन्छ, जुन बेला यो महामारी अन्त्य हुन्छ ।’

उपराष्ट्रपति माइक पेन्सले अबको केही सातामा नै टास्क फोर्स बन्द गरिने जनाएका छन् । एरिजोना राज्यमा रहेको मास्क उत्पादन कम्पनीको भ्रमणका क्रममा राष्ट्रपति ट्रम्पले भने, ‘हामीले अमेरिकालाई पुरानै अवस्थामा फर्काउँदै छौँ, अब आर्थिक गतिविधि सुरु हुने छन् ।’

अमेरिकामा यतिबेला पनि दैनिक २० हजारभन्दा बढी कोरोना भाइरसका नयाँ बिरामी भेटिदै आएका छन् भने दैनिक १ हजारभन्दा बढीको मृत्यु भइरहेको छ ।

संक्रमित र मृत्युदरमा थोरै कमी आएपनि अझै अवस्था सामान्य बन्ने दिशातिर नपुगेको अवस्थामा ट्रम्पले देश अब पुरानै अवस्थामा फर्काउन सुरु गर्ने बताएका हुन् ।

अमेरिकी स्वास्थ्य अधिकारीले भने व्यवसायहरु खुला गर्दा कोरोना भाइरसको संक्रमण थप तीव्र गतिमा फैलिन सक्ने भन्दै चेतावनी दिएका छन् । व्यवसाय खुला गर्न हतारो गरेर ट्रम्पले अमेरिकीको जीवनमाथि खेलवाड गरेको आरोप विपक्षीले लगाउँदै आएका छन् ।

उनले आगामी नोभेम्बरमा हुने चुनावमा आफ्नो पक्ष बलियो बनाउनका लागि अर्थतन्त्र खुला गर्ने मार्गमा सर्वसाधारणको जीवन नै जोखिममा पारेको आरोप विपक्षीको छ । ट्रम्पको प्रमुख चुनावी मुद्दा आर्थिक वृद्धि हो । तर अहिले अमेरिकी अर्थतन्त्र अति गम्भीर रुपले प्रभावित भएको छ ।

कोरोना भाइरसको महामारी नियन्त्रणको प्रयासमा अहिले टास्क फोर्समा रहेका डा.डेबोराह बिक्र्स र डा.एन्थोनी फाउचीको संलग्नता कायमै रहेको बताए पनि ट्रम्पले उनीहरुको सट्टा अरु विज्ञ आउने स्पष्ट संकेत गरेका छन् ।

अमेरिकामा अहिलेसम्म १२ लाख ३७ हजार पाँच सय भन्दा बढीमा कोरोना भाइरसको संक्रमण पुष्टि भएको जोन हप्किन्स विश्वविद्यालयल र विश्व स्वास्थ्य संगठन डब्लुएचओको तथ्यांकमा उल्लेख छ ।

यस्तै अमेरिकामा ७२ हजार २७१ जनाभन्दा बढीको मृत्यु भइसकेको छ । विश्वभर कोरोना भाइरसबाट दुई लाख ५८ हजार ३०५ जनाको मृत्यु भएको छ भने ३७ लाख २६ हजारभन्दा बढी संक्रमित भइसकेका छन् ।

प्रकाशित मिति: बुधबार, वैशाख २४, २०७७ ०७:३३