अफगानिस्तानमा थप १०२ तालिवानी कैदी जेलमुक्त

A+ A A-

अफगानी सुरक्षा परिषद्ले १ सयभन्दा बढी तालिवानी बन्दीहरूको रिहाइको पुष्टि गरेको छ ।

अफगानिस्तानको सरकारले यो वर्ष फेब्रुअरीमा अमेरिका र तालिवान समूहबीच शान्ति सम्झौतामा कैदीबन्दीलाई रिहाई गर्ने सहमति अनुरुप १ सय २ थप तालिवान कैदीहरूलाई रिहा गरेको हो ।

‘राष्ट्रपति असरफ घानीको निर्देशनको आधारमा सरकारले तालिवानी नेता तथा लडाकूहरूलाई सोमबार रिहा गरिएको हो’ मंगलबार अफगानी सुरक्षा परिषद्वारा जारी विज्ञप्तिमा उल्लेख गरिएको छ ।

‘सहमति अनुसार अहिलेसम्म ८ सय ५० तालीवानी नेता तथा लडाकूलाई रिहा गरिसकिएको र अन्य ६ सय ५० जनालाई प्रक्रिया पुर्‍याएर क्रमशः रिहा गरिनेछ’ सुरक्षा परिषद्का प्रवक्ता जाविद फैसलद्वारा हस्ताक्षर गरिएको ट्वीटरमार्फत् जारी विज्ञप्तिमा भनिएको छ ।

तालिवान कैदीहरूलाई उनीहरूको उमेर, स्वास्थ्य र बाँकी सजायको आधारमा रिहा गरिने र उक्त कदम शान्तिका लागि अमेरिका र तालिवानबीच भएको प्रतिवद्धता र जेलमा रहेका कैदीलाई कोभिड–१९ जोखिमबाट कम गर्ने नीति अनुरूप भएको जाविद फैसलले २ दिन पहिले सञ्चारकर्मीसँगको कुराकानीमा बताएका थिए ।

यस वर्षको फेब्रुअरीमा तालिवान र संयुक्त राज्य अमेरिकाले शान्ति सम्झौतामा पुगेपछि अन्तर–अफगानी वार्ताको बन्दी र आदानप्रदान सम्भव भएको हो । यद्यपि यस अवस्थामा अफगानिस्तानको चुनावी झगडा र बन्दीहरूको रिहाइको विषयमा आपसी असहमतिका कारण वार्ता ढिला भएको छ ।

तालिवानी समूहले अफगानिस्तानको सरकारले शान्ति सम्झौताको आधारमा ५ हजार कैदीहरूलाई रिहा गर्न माग गरिरहेको छ । तर, अफगानिस्तान सरकारले बिस्तारै आन्दोलनका १ हजार ५ सय सदस्यलाई रिहा गर्न सहमत भएको र क्रमशः उनीहरूको रिहाई भइरहेको छ ।

प्रकाशित मिति: मंगलबार, वैशाख २३, २०७७ २१:२८