चीनलाई थिङ्कट्याङ्कको गोप्य रिपोर्टः अमेरिकाविरुद्ध युद्धको तयारी गर्नू

A+ A A-

एक आन्तरिक रिपोर्टमा वैश्विक रूपमा चीनविरोधी भावना यतिबेला विश्वभर फैलिएको भन्दै चीन सरकारलाई सचेत गराइएको छ ।

रोयटर्सको रिपोर्टअनुसार रिपोर्टमा कोरोना भाइरसको महामारीका कारण चीनले बढ्दो द्वेषको सामना गरिरहेको र अमेरिका–चीन सम्बन्ध थप बिग्रिन सक्ने उल्लेख गरिएको छ ।

कोरोना भाइरस चीनको वुहानमा पहिलो पटक देखा परेको थियो । विश्वभरमा हालसम्म ३६ लाखभन्दा बढीमा कोरोना संक्रमण भइसकेकाे छ भने २ लाख ५० हजारभन्दा बढीको मृत्यु भइसकेको छ ।

चीनको सुरक्षा मन्त्रालयले यो रिपोर्ट गत महिना राष्ट्रपति सी चिनफिङसहित शीर्ष नेतालाई बुझाएको थियो । उक्त रिपोर्टमा चीनलाई अमेरिकासँग हतियारवद्ध युद्धको सबैभन्दा खराब स्थितिका लागि तयार रहन सुझाव दिइएको छ ।

यो रिपोर्ट चीनको रक्षा मन्त्रालयसम्वद्ध थिङ्कट्याङ्क चाइना इन्स्टिच्युट अफ कन्टेम्पोरेरी इन्टरनेसनल रिलेसन्स (सीआईसीआईआर) ले तयार गरेको हो । याे निकाय चीनको शीर्ष गुप्तचर एजेन्सी हो ।

चीन र अमेरिकाबीचको सम्बन्ध पछिल्ला केही दशकयताकै खराब स्तरमा पुगेकाे देखिएको छ । अनुचित व्यापार र प्राद्यौगिकी कार्यलाई लिएर अमेरिकाको अविश्वास र मनमुटावबाट सुरु भएर हङकङ, ताइवान र दक्षिण चीन सागरलाई लिएर अमेरिका–चीनबीचको सम्बन्धमा दरार उत्पन्न भएको छ ।

कोरोना भाइरसका कारण करिब ७० हजारको मृत्यु भइसकेको छ भने अर्थतन्त्रमा ठूलो क्षति पुगेको छ । अमेरिकी राष्ट्रपति डोनाल्ड ट्रम्पले चीनको आलोचना गर्नुका साथै थप कर लगाउने धम्की दिइरहेका छन् ।

यस्तै, चीनविरुद्ध अन्तर्राष्ट्रिय अदालतमा मुद्दा हाल्नेदेखि चीनलाई ऋण नतिर्नेसम्मका योजना बनाएको रिपोर्ट सार्वजनिक भएको थियो । अमेरिकाले विश्वमै पहिलो अर्थतन्त्र भएकाे देश बन्ने दौडमा रहेको चीनमाथि नियन्त्रण कायम गर्न खोजिरहेको चीनको बुझाइ छ ।

रिपोर्टकाे निष्कर्षमा वासिङ्टन चीनको उदयलाई आर्थिक र राष्ट्रिय सुरक्षाको खतरा र पश्चिमी लोकतन्त्रको चुनौतीका रूपमा लिन्छ । रिपोर्टमा अमेरिकाको लक्ष्य सत्तारुढ चिनियाँ कम्युनिस्ट पार्टीमाथि जनताको विश्वास कम गरेर कम्युनिस्ट पार्टीलाई सत्ताबाट हटाउनु रहेको बताइएको छ ।

चीनले कोरोना भाइरसका विरुद्ध वैश्विक लडाइँमा अग्रणी भूमिका निभाउने कोसिस गरिरहेको छ । चीनले अमेरिकादेखि युरोपेली राष्ट्रलाई अनुदान दिनुदेखि चिकित्सा उपकरण र आफ्नो अनुभव साटिरहेको छ । तर, आलोचकहरूले यो महामारीका लागि चीन जिम्मेवार रहेको भन्दै आरोप लगाइरहेका छन् ।

ट्रम्पले विश्व स्वास्थ्य संगठन (डब्लूएचओ) माथि चीनलाई लिएर पक्षपाती रवैया अपनाएको भन्दै अनुदानसमेत बन्द गरेको छ । अस्ट्रेलियाले पनि कोरोना भाइरसको उत्पत्ति र फैलिनुमा अन्तर्राष्ट्रिय जाँच हुनुपर्ने बताएको छ ।

गत महिना फ्रान्सले चिनियाँ दूतावासको वेबसाइटमा प्रकाशित एक लेखको विरोधमा चिनियाँ राजदूतलाई निकालेको थियो । यो लेखमा कोरोना भाइरस नियन्त्रणका लागि पश्चिमा देशले अपनाएको तरिकाको आलोचना गरिएको थियो ।

रिपोर्टमा चीनविरोधी भावना चीनको रोड इन्फ्रास्ट्रक्चरमा गरेको लगानी परियोजनाको विरोधको रूपमा भड्किन सक्ने औँल्याइएको छ र अमेरिकाले क्षेत्रीय सहयोगीलाई आर्थिक तथा सैन्य समर्थन दिएर एसियामा सुरक्षा अवस्थालाई थप लचिलो बनाउन सक्नेछ ।

तियानमेन नरसंहारपछि जुन परिस्थिति बनेको थियो, त्यस्ताे अवस्था छैन । किनकि चीन अब त्यस बेलाको भन्दा शक्तिशाली भइसकेको छ । त्यसबेला पनि पश्चिमा देशले चीनविरुद्ध प्रतिबन्ध लगाएका थिए ।

प्रकाशित मिति: मंगलबार, वैशाख २३, २०७७ १३:४१