कर्णालीमा २ महिना पुग्ने खाद्यान्न मौज्दात

A+ A A-

कर्णाली प्रदेशमा २ महिनालाई पुग्ने खाद्यान्न बचत रहेको छ । कर्णाली प्रदेश सरकारले १ हप्ताका लागि खाद्यान्न आयातमा रोक लगाएको छ ।

कर्णाली प्रदेश सरकारले खाद्यान्नमा आयातमा रोक लगाए पनि दुई महिनाका लागि पुग्ने खाद्यान्न मौज्दात रहेको खाद्य व्यवस्था तथा व्यापार कम्पनीको कार्यालय सुर्खेतले जनाएको छ ।

कर्णालीमा खाद्यान्न आपूर्तिमा रोक लागेको अवस्थामा २ महिना पुग्ने खाद्यान्न मौज्दात रहेको खाद्य संस्थान कार्यालय सुर्खेतका प्रमुख भीमबहादुर थापाले बताए । ‘हामीसँग २ महिना पुग्ने खाद्यान्न मौज्दात रहेको छ’ उनले भने, ‘कर्णालीको जनसंख्या १८ लाख हो । यो खाद्यान्नले कर्णालीमा २ महिना खाद्यान्न पुग्छ ।’

हाल कर्णाली प्रदेशका १० जिल्लामध्ये सल्यानमा खाद्य व्यवस्था तथा व्यापार कम्पनीको कार्यालय नभएको र अन्य जिल्लामा अहिले खाद्यान्न मौज्दात रहेको प्रमुख थापाले बताए ।

खाद्य व्यवस्था तथा व्यापार कम्पनी कार्यालय सुर्खेतका अनुसार सुर्खेतमा आठ हजार सात सय १५, हुम्लामा सात हजार ४०, मुगुमा ४ हजार ८ सय ७२, डोल्पामा ६ हजार ७ सय ७४, जुम्लामा ३ हजार १ सय ६१, दैलेखमा ५ सय, कालिकोटमा २ हजार ९ सय ११, जाजरकोटमा ४ हजार २ सय १८ र रुकुम पश्चिममा ३ सय ९० क्वीन्टल खाद्यान्न मौज्दात रहेको छ ।

कर्णाली प्रदेशमा अहिलेसम्म कोरोनाको संक्रमण नदेखिएको र अन्य प्रदेशमा कोरोनाको संक्रमण बढ्दै गएका कारणले सीमानाका ७ दिनसम्म बन्द गर्ने निर्णय गरेको छ ।

प्रकाशित मिति: मंगलबार, वैशाख २३, २०७७ १२:१९