काेराेना संक्रमितलाई जब स्थानीयले ताली बजाएर बिदाइ गरे...

A+ A A-

आइतबार बाँकेको नेपालगन्ज उपमहानगरपालिका– ८ चर्चामा रह्यो । कारण एकै दिन १५ जनामा कोरोना संक्रमण देखियो । ९० जनाको स्वाब लिइएको थियो । जसमध्ये ६० जनाको रिपोर्ट आयो । त्यसमा १५ जनाको रिपोर्ट पोजिटिभ आयो । ३० जनाको रिपोर्ट आउन बाँकी छ । शुक्रबार १ जनामा भेटिएको थियो । उनको ट्रेसिङका आधारमा ९० जनाको स्वाब संकलन गरिएको हो ।

समुदायमा स्वाब संकलन र कोरोना भाइरसबाट जोगिन सचेतना फैलाउने अभियानमा खटिएका थिए स्थानीय अगुवा शक्ति वंशकार । दिनभर स्वाब संकलन र संक्रमितलाई राति नै अस्पताल पुर्‍याउने काममा उनी पनि खटिएका थिए ।

उनले घर पुगेर सामाजिक सञ्जाल हेरे । सामाजिक सञ्जालमा साम्प्रदायिक कुराहरू लेखेको देखे । त्यसपछि उनी चिन्तित भए ।

सोमबार हामीसँग टेलिफोन सम्पर्कमा आएका उनले भने, ‘सामाजिक सञ्जालमा साम्प्रदायिक कुरा लेखेको पनि देखियो । यो राम्रो होइन । अहिले सबै मिलेर कोरोनाविरुद्ध लड्ने समय हो । कसैले पनि अफवाह फैलाउने काम नगरौँ । बरु परीक्षणको दायरा बढाऔँ ।’

स्थानीयले लकडाउननको पूर्ण पालना नगर्दा समस्या भएको उनको बुझाइ छ ।

‘स्थानीयले लकडाउनको पूर्ण पालना गर्नु भएन,’ उनले भने, ‘पुलिसको गाडी आए घरभित्र छिर्ने, गाडी जान्छ बाहिर निस्कने, घुमाघाम गर्ने गरेका कारण समस्या भएको हो ।’

समुदायमा अन्य कुनै समस्या नभएको उनले बताए ।

‘मुस्लिम समुदायको ७ वर्षकी बालिकामा पनि कोरोना पोजिटिभ देखिएको छ,’ उनले भने, ‘संक्रमित सबैलाई अस्पतालको क्वारेन्टाइनमा पठाउने समयमा स्थानीयले ताली बजाएर पठाउनुभएको छ । संक्रमण नफैलियोस् भनेर उहाँहरूले ताली बजाएर बिदाइ गर्नुभयो । एकै दिन १५ जनामा कोरोना देखिएपछि स्थानीयले लकडाउनको पालना गरेका छन् ।

‘कोरोना भाइरस देखिएपछि टोल सुनसान भएको छ,’ उनले भने,‘अहिले लकडाउनको पालना गरेर स्थानीय घरभित्रै बस्नुभएको छ । कतिलाई कोरोनाबारे थाहा पनि छैन । त्यसैले सचेतना फैलाउनु आवश्यक छ ।’

नेपालगन्जमा कोरोनाले झुक्यायो, संक्रमितमा लक्षण नै छैन

ट्रेसिङकै आधारमा पत्ता लाग्यो– भेरी अस्पताल

एकै पटक १५ जनामा संक्रमण देखिएपछि स्वास्थ्यकर्मीहरू पनि आश्चर्यमा परेका छन् । शुक्रबार ६० वर्षीय पुरुषमा कोरोना देखिएपछि उनको ट्रेसिङ गर्दा अरुमा पनि देखिएको हो ।

‘टेस्टको दायरा पनि बढाएका छौँ,’ भेरी अस्पताल नेपालगन्जका प्रमुख डा. प्रकाश थापाले भने, ‘नेपालगन्जको पहिलो संक्रमितको ट्रेसिङ गर्दा अरुमा पनि भेटिएको हो । ’

कोरोना पोजिटिभ देखिएका अधिकांशमा लक्षण नै नदेखिएको उनले बताए ।

उनले भने, ‘कति जनामा लक्षण नै छैन,’ उनले भने, ‘ज्वरो, खोकी, श्वासप्रश्वासमा पनि समस्या छैन । सामान्य अवस्थामा छन् । बिरामी भएर अस्पताल आउने अवस्थामा पनि छैन । तर, रिपोर्ट पोजिटिभ आएको छ ।’

संक्रमितको संख्या बढेसँगै अब परीक्षणलाई बढाउने अस्पतालको तयारी छ ।

‘ल्याब भेरी अस्पतालमै छ । परीक्षण भइरहेको छ,’ उनले भने, ‘स्थानीय तहको सहयोगमा कन्ट्याक्ट ट्रेसिङ र स्वाब संकलनलाई अहिले बढी प्राथमिकता दिएका छौँ ।’

नेपालगन्जमा भेटिएका १६ जनालाई अहिले सुशील कोइराला क्यान्सर अस्पतालमा राखेर उपचार भइरहेकाे उनले जानकारी दिए ।

प्रकाशित मिति: सोमबार, वैशाख २२, २०७७ १९:०५