रवीन्द्रको ५१औं जन्मजयन्तीका अवसरमा पोखरा प्रवेशद्वारमा ‘सेनिटाइजर टनेल’

रवीन्द्रको ५१औं जन्मजयन्तीका अवसरमा पोखरा प्रवेशद्वारमा ‘सेनिटाइजर टनेल’

A+ A A-

रवीन्द्र अधिकारी स्मृति प्रतिष्ठानले जन्मजयन्तीको अवसर पारेर पोखरा प्रवेश गर्ने नाका छोरेपाटनमा ‘सेनिटाइजर टनेल’ स्थापना गरेको छ । स्वर्गीय नेता रवीन्द्र अधिकारीको ५१ औं जन्मजयन्तीको अवसरमा प्रतिष्ठानले विश्वव्यापी रूपमा फैलिएको कोरोना भाइसरको संक्रमणलाई नियन्त्रण गर्नका लागि छोरेपाटनमा टनेल स्थापना गरेको हो ।

सिद्धार्थ राजमार्गको प्रवेश विन्दु र प्रसिद्ध पर्यटकीयस्थल पातलेछाँगो रहेको छोरेपाटनमा स्थानीय प्राविधिकका सहयोगमा बनाइएको टनेल सोमबार पोखरा महानगरपालिकालाई हस्तान्तरण गरिएको प्रतिष्ठानका सदस्य अर्जुन अधिकारीले जानकारी दिए ।

प्रतिष्ठानले स्वर्गीय अधिकारीको ५१औँ जन्मजयन्ती भब्यरुपमा मनाउने र रवीन्द्र स्मृति ग्रन्थको लोकार्पण गर्ने योजना बनाएको भएपनि कोरोना भाइरसको संक्रमणका कारण पोखराको बढीमानिसको आवत जावत हुने ठाउँ छोरेपाटनमा ‘सेनिटाइजर टनेल’ स्थापना गरेर रवीन्द्रलाई सम्झिएको हो ।

‘जन्मजयन्तीको अवसरमा औपचारिक कार्यक्रम सहित मनाउने योजना थियो । तर, असहज अबस्थाका कारण स्वर्गिय अधिकारीको सम्झनामा ‘सेनिटाइजर टनेल’ स्थापना गरेर सम्झियौँ’ प्रतिष्ठानका सदस्य अर्जुन अधिकारीले भने ‘कोरोना रोकथामका लागि केही सहयोग होस् भनेर सेनिटाइजर टनेल स्थापना गरेर महानगरलाई हस्तान्तरण गरेका हौँ ।’

गण्डकी प्रदेश सभा सदस्य कृष्ण थापा, महानगर प्रमुख मानबहादुर जिसी, उपप्रमुख मञ्जुदेवी गुरुङलगायतले स्वार्गिय अधिकारीको योगदानको स्मरण गरेका थिए ।

महानगर कोषमा ५० हजार सहयोग

प्रतिनिधिसभा सदस्य एवं रवीन्द्र पत्नी विद्या भट्टराईले पोखरा महानगरको प्रकोप व्यवस्थापन कोषमा ५० हजार रुपैयाँ सहयोग गरेकी छन् । दिवङ्गत नेता रबिन्द्र अधिकारीको ५१औँ जन्मजयन्तीको अवसरमा भट्टराईले पोखरा महानगर पालिकाका मेयर मान बहादुर जिसीलाई ५० हजारको चेक हस्तान्तरण गरेकी हुन् ।

भट्टराईले कोरोना नियन्त्रण र रोकथामको लागि आफुले सानो सहयोग गरेको बताउँदै ३ तहका सरकारले आपसी समन्वय गर्दै उच्चस्तरमा लाग्न जरुरी रहेको बताइन् । उनले कोरोना संक्रमणको नियन्त्रणका लागि सरकारले अघि सारेका कार्यक्रमलाइ साथ दिन समेत आग्रह गरेकी छन् ।

संस्कृति, पर्यटन तथा नागरिक उड्ययन मन्त्री रहेकै बेला अधिकारीको गत फागुन १५ गते हेलिकोप्टर दुर्घटनामा निधन भएको थियो । २०२६ साल वैशाख २२ गते कास्कीको भरतपोखरीमा बुवा इन्द्रप्रसाद अधिकारी र आमा लक्ष्मी अधिकारीको कोखबाट रवीन्द्रको जन्म भएको थियो ।

अनेरास्ववियुबाट राजनीति सुरु गरेका अधिकारी कास्कीबाट २०६४ र २०७० सालको संविधानसभा तथा २०७४ सालमा सम्पन्न प्रतिनिधि सभा निर्वाचनमा प्रत्यक्ष निर्वाचित भएका थिए ।

२०७० सालमा संसद्को विकास समितिको सभापति समेत भएर उनले विभिन्न योजनालाई अगाडी बढाएका थिए । आर्थिक समृद्धि र विकासको बहस गर्ने अधिकारी पछिल्ले पुस्ताका आशा लाग्दो युवा नेताको रूपमा चिरपरिचित थिए ।

प्रकाशित मिति: सोमबार, वैशाख २२, २०७७ १८:१३