बागमती प्रदेशसभाको बजेट अधिवेशन सुरु गर्ने तयारी

A+ A A-

लकडाउनका कारण ६ चैतपछि स्थगित गरिएको बागमती प्रदेशसभाको बैठक सुचारु गर्ने तयारी गरिएको छ ।

४६ दिनसम्म स्थगित रहेको बैठक प्रदेश सरकारले नीति तथा कार्यक्रम र बजेट बनाउन सुरु गरेसँगै प्रदेशसभाले बैठक आह्वान गर्ने तयारी गरेको हो । लकडाउनपछि मन्त्रिपरिषद् बैठकले पाँचौ अधिवेशन अन्त्य भएको निर्णय गरेको थियो ।

कोरोना प्रभावकाबीचमा बैठक सञ्चालनका लागि आवश्यक तयारी गर्न मुख्यमन्त्री डोरमणि पौडेल, सभामुख सानुकुमार श्रेष्ठ र आन्तरिक मामिला तथा कानुन मन्त्री शालिकराम जमकट्टेलसहितको टोलीले प्रदेशसभा भवनको अवलोकन गरेका छन् ।

भौतिक दूरी कायम गरेर बैठक सञ्चालनका लागि आवश्यक तयारी गर्न आइतबार प्रदेशसभा भवनको अवलोकन गरिएको सभामुख श्रेष्ठले बताए । उनका अनुसार जेठ १ गतेसम्म बजेट अधिवेशनका लागि प्रदेशसभा सञ्चालन गर्न लागिएको छ ।

मुख्यमन्त्री पौडेल र सभामुख श्रेष्ठबीच प्रदेशसभा सञ्चालनबारे छलफल भएको छ । छलफलका क्रममा सभामुख श्रेष्ठले भौतिक दूरी कायम गरेर प्रदेश सांसदहरुलाई बस्ने व्यवस्था गरिने बताए ।

नीति तथा कार्यक्रम र बजेट ल्याउने बिषयमा सरकारले छलफल गरिरहेको मुख्यमन्त्री पौडेलको भनाइ छ । ‘तोकिएको समयमै नीति तथा कार्यक्रम र बजेट ल्याउन सरकारले तयारी गरिरहेको छ,’ उनले भने ‘हामी विषयगत छलफलमा जुटिरहेका छौँ ।’

लकडाउनका बीच समितिको बैठक

लकडाउनपछि प्रदेशसभा अवरुद्ध भए पनि समितिहरूको बैठक बोलाइएको थियो । कोरोना प्रभाव र लकडाउनका कारण भइरहेका समयसामयिक समस्याबारे समितिहरूमा छलफल भएको प्रदेशसभा सचिवालयले जनाएको छ ।

लकडाउनबीच प्रदेश मामिला समिति, उद्योग पर्यटन तथा कृषि समितिलगायतका बैठक सञ्चालन भएको सचिवालयको आधिकारिक वेभसाइटमा उल्लेख छ ।

साँघुरो सभा कक्षमा बैठक चलाउने तयारी

कोरोना प्रभाव कायमै रहेको अवस्थामा प्रदेशसभा बैठक बोलाउने तयारी भइरहेको छ । सरकार र संसदले भौतिक दूरी कायम गरेर बैठक सञ्चालन गर्ने तयारी गरेपनि सभाकक्षको संरचना त्यस किसिमको छैन ।

कोरोना प्रभाव अघि साँघुरो सभाकक्षमा बैठक सञ्चालन भइरहँदा पनि सांसदहरुका लागि सहज थिएन् । १ सय १० सांसद रहेको बागमती प्रदेशमा बैठकका लागि सबै उपस्थित हुँदा सभा कक्ष साँघुरो बनेको थियो ।

सभाकक्ष साँघुरो भएका कारण हालसम्म आवश्यक संरचना समेतको अभाव छ । सबै सांसद बस्ने कुर्चीको अगाडि डेस्क राखिएको छैन् । यस्तो अवस्थामा सभा कक्षको क्षेत्रफलअनुसार भौतिक दूरी कायम गर्न निकै समस्या पर्ने देखिन्छ ।

सभामुख सानुकुमार श्रेष्ठले सभाकक्ष साँघुरो भएको स्वीकार्दै मिडिया डेस्क हटाएर भौतिक दूरीका लागि व्यवस्थापन गरिने बताए । सभा कक्षको उत्तरी भागमा रहेको मिडिया डेस्क हटाएर त्यस ठाउँमा सांसदका लागि दूरी कायम गर्दै कुर्ची राखिने उनले जानकारी दिए ।

प्रकाशित मिति: सोमबार, वैशाख २२, २०७७ १८:०६